Masaget qazaq jastar portalynyń «AINA» atty jobasynda ishiaki syrymen bólisýge kelgen kezekti tulǵa belgili qazaqstandyq ǵalym jáne qoǵam qaıratkeri, fızıka-matematıka ǵylymdarynyń doktory (1988), profesor (1990), Qazaqstan UǴA-nyń akademıgi Asqar Jumadildaev.

Ár adam ózi tańdaǵan baǵyt boıynsha júredi, sol baǵyttyń tóńireginde oı tolǵaıdy, ton pishedi. Eń birinshi kezekte adaldyqty joǵary sanaıtyn Asqar Jumadildaev jeke týy bolsa, týǵa esektiń basyn beıneleıtinin aıtty.

Nege deseńiz, adamzatqa eń kóp paıda ákelgen janýar – esek. Otyndy da tasıdy, sýdy da tasıdy, tezekti de tasıdy, qara jumystyń bárin isteıdi, biraq jurttyń bári esekti sógedi de júredi. Ǵalymnyń aıtýynsha, matematıka da dál sondaı. Jurtqa eń kóp paıda ákeletin salalardyń biri – matematıka, biraq jurttyń záresin alatyn da – matematıka.

«Matematıkany men keı-kezde esekke teńeımin. Esektiń eti haram, isi adal», - deıdi Jumadildaev.

Ol úshin eń uly matematık – ál Horezmı. Ál-Horezmı ustanǵan prınsıp – mınýsty plúske aınaldyrý. Demek, teris sandy san dep moıyndamaǵan, teris bolsa ońǵa aınaldyryńdar degen.

Asqar Jumadildaevtyń da ustanymy osy – mınýsty plúske aınaldyrý. «Jeńilisińdi jeńiske, utylǵanyńdy utysqa, jamandyǵyńdy jaqsylyqqa aınaldyr» dedıi ustaz.

Suhbat barysynda eń basty taqyryp retinde sanalǵan máselelerdiń biri – úshtildilik, ıaǵgı aǵylshyn tilin qalaı da úırený. Osy másele tóńireginde oı qozǵaǵan profesor qazaqtardy qytaılyqtarmen salystyryp sóıledi:

«Aǵylshyn tilin úırenip otyrǵan úndi, qytaı, japon aqymaq emes, qazaq ta aqymaq emes. Aǵylshyn tilin qazaq ta úırený kerek. Biraq qazaqtyń aqymaqtyǵy men qytaıdyń aqymaqtyǵyn baıqap kóreıik. Qytaıda aǵylshyn tili qytaı tiline qosymsha retinde oqytady, birinshi synyptan on eknishi synypqa deıin barlyq sabaq qytaısha ótedi. Tipti, Úrimshide qazaq mektepteri jabylyp jatyr. 5-synpyqa deıin Qytaıdaǵy bar qazaq qytaıdyń tarıhyn oqıdy, somen qazaq tili bitedi. Al aǵylshyn tilinde qosymsha oqytylady. Al qazaq aǵylshyn tilin qazaq tiline qosymsha emes, qazaq tiliniń ornyna júrgizemiz deıdi. Osy jaǵy maǵan túsiniksiz. Meniń oıymsha, bastaýysh, orta mekteptiń barlyǵy da memlekettik tilde oqytylýy kerek. Al aǵylshyn tili qosymsha pán retinde eseptelsin. Osy baǵytpen kete bersek, qazaq tili – otbasy tili bolyp qalady. Qazaq tilinde tek ádebıetti, tarıhty ǵana aıtýǵa bolady, basqa eshteńeniń qajeti joq» dep sózin túıindedi Asqar Jumadildaev qoǵamdaǵy problemaǵa kóz júgirte otyryp.