Biz keıde kúndelikti kúıbeń tirshilikpen júrip shúkirshilikti umytyp ketemiz. Adam balasynyń ómirinde ózi kótere almaıtyndaı synaq berilmeıdi eken. Sondaı bir oqıǵalardyń birin Qamshy aqparattyq agenttigi mazhab.kz-ke silteme jasaı otyryp oqyrman nazaryna usynady.
Meshitte naıb ımam bolyp isteıtin Darhan ekeýmiz Quran oqıtyn bólmede otyrǵanbyz. Uzyn boıly, qyzǵylt shyraıly jigit ımene esik ashty.
- Assalamýǵalaıkým!
- Ýaǵalaıkýmýssalam! Kelińiz.
- Rahmet.
Oryndyqqa jaıǵasyp, qulaqshynyn qolyna alǵan jigit únsiz qalǵan soń, suraqty biz qoıdyq.
- Iá, Quran oqytaıyn dep pe edińiz?
- Joq, - Sál kúrsinip qaldy. – Bir suraqpen kelip edim.
- Jaqsy. Surańyz, bilsek, jaýap bereıik.
- Suraıyn degenim... – Tómen qaraǵan júzi qyzaryp, biraz únsiz otyryp qaldy.
- Aıta berińiz. Qysylmańyz.
- Suraıyn degenim... Dáreti toqtamaıtyn adam namazdy qalaı oqıdy?
- Toqtamaǵanda, qalaı toqtamaıdy?
- Tamshylap turady.
- A-a. Buny sharıǵatta «úzir» dep ataıdy. – Dakeń túsindirýge kiristi. – Qandaı da bir dáretti buzatyn nárse úzdiksiz bolatyn bolsa, mysaly: zár tamyp tursa nemese qan aǵyp tursa, ol adam ár namazdyń aldynda dáret alýy tıis. Al dáret alyp bolǵannan keıin namaz ústinde taǵy da tamyp jatsa, ol namazdy buzbaıdy. Basty sharty: ár namazdyń aldynda dáret alyp turý kerek.
- Iá, ony bilem. - Jigit tómen qarap otyryp sózin jalǵady. «Adamnyń betine qaramaıdy eken...» - Meniń suraıyn degenim: eger zár kıimge tıip ketse, ne bolady?
- A-a. Kıimge tıip ketse, bizdiń mázhab boıynsha, eger ol nájistiń kólemi alaqan aýmaǵynan aspasa, namaz oqı berýge bolady.
- Asyp ketse she?
- Asyp ketse, kıimin aýystyrýy kerek nemese jańaǵy jerdi úsh ret jýyp, jaqsylap syǵyp tastap, oqı berse de bolady.
- Al eger aýystyratyn kıimi joq bolsa nemese aýystyrýǵa yńǵaıly jer joq bolsa she?
- Jańa aıtym ǵoı, ondaı jaǵdaıda úsh ret jýyp jiberý kerek.
- Al qysta, aıazda she?
- Endi, ondaı jaǵdaı ylǵı bola bermeıtin shyǵar?
- Keshirińiz, ylǵı bolsa she?
- Qalaı sonda? – Dákeń tańyrqaı surady.
- Solaı, ylǵı tamyp tursa...
- Endi... Onda shúberek salyp júrý kerek.
- Shúberekten de ótip ketedi ǵoı... – Qolyndaǵy bas kıimin syǵymdaǵan jas jigit taǵy biraz únsiz qaldy. – Keshirińizder. Negizi, men ózim týraly surap otyrmyn... Namazymdy bastaǵaly eki aıdaı boldy...
- Bárekeldi! Qabyl bolsyn!
- Rahmet, aǵa...
- Sonda, qashannan beri bulaı aýyryp qaldyńyz? Emdelip kórdińiz be?
- Aǵa, men... – Kózderi jasaýrap, tómen qarap ketti. – Men týylǵan kezimnen osyndaımyn... Meni áýeli «ómir súrmeıdi» dep oılaǵan eken. Óıtkeni... Artym biteý bolypty... Operasıa jasap, ashypty... Bala kezimnen toqtamaıdy dáretim... Talaı jerge baryp kórdik, bolmady...
Darhan ekeýimiz bir-birimizge qaradyq. Ne aıtarymyzdy bilmeı daǵdaryp qaldyq.
- Jigit bolǵan soń qıyn eken, aǵa... Árıne, «Allaǵa shúkir» deımin... Kózimdi ashyp, bul ómirdiń synaq ekenin, qıyndyqtyń syıy – máńgilik Jumaq ekenin túsindirip qoıǵany úshin myń márte shúkir etem!.. Mine, namazymdy da bastadym. Biraq, «Qabyl bolmaı ma?» dep, qorqyp júrmin... Shalbaryma ótip ketedi...
- Keshirińiz, atyńyz kim?
- Janat.
- Jake, qalyń ǵylyp shúperek salyp alsańyz... Solaı istep kórdińiz be?
- Aǵa, men... Men pampers kıip júremin... Biraq toqtamaı tama bergen soń, odan da ótip, shalbarymdy bylǵaıdy... Namaz oqyǵaly kúnine úsh pampers aýystyryp kıemin...
- A-a... Bir pampers qansha turady sonda? – Ańǵal Dákeń suraqty qoıaryn qoıyp alyp, yńǵaısyzdanyp qaldy.
- Bireýi 500 teńge. Eń úlkenin alam ǵoı... Aǵa, men baı jigit emespin, biraq, taza júrý úshin, namazym úshin qaıtsem de alýym kerek... Jaraıdy, ony qoıyńyzshy. Shalbarǵa ótip ketken jaǵdaıda ne isteý kerek? Jańaǵy alaqandaı mólsherden asyp ketse?
- Ondaı jaǵdaıda, ıaǵnı aýystyrýǵa múmkindik joq bolsa, onda sol qalpymen oqı beresiz de... Nemese úıge barǵan soń, qaza qylyp oqısyz. Negizi, bul suraqty mýftıatta Pátýa bólimi bar, sol jerden baryp surasańyz, durys bolady.
- Jaqsy, aǵa. Negizi, biraz kisilerden surastyrǵam. Sizder sıaqty aıtqan. Biraq bir kúdik ketpeı-aq qoıdy: «Namazym qabyl ma? Joq álde...» - Janary botalap, býlyǵyp qaldy.
Meniń de óńeshime tolqyn tyǵyldy. «Ýaıymyńnan, kóz jasyńnan aınaldym, baýyrym! Qalaı jubatsam eken seni? Kóńilińe qalaı demeý bolsam eken?..»
- Baýyrym, Jáke, qoryqpańyz, ýaıymdamańyz, qabyl bolady, ınshaalla... Alla Taǵala adamǵa shamasy jetpeıtin júkti artpaıdy. Sondyqtan sharıǵatymyzdy barlyq jaǵdaı qarastyrylyp, jeńildikter belgilengen. Kez-kelgen qulshylyqty shamamyzdyń kelgeninshe atqaramyz. Estigen shyǵarsyz, mysaly: namazdy turyp oqı almasańyz, otyryp oqısyz, otyrý qıyn bolsa, jatyp oqısyz, tegi bolmasa ısharamen oqısyz; dáret ala almasańyz, táıammýmmen, ol da múmkin bolmasa, eshteńe istemeı-aq nıet etip, namazyńyzdy oqısyz. Qabyl bolady... Aıtaıyn degenim: sizdiki «úzir jaǵdaı» bolǵandyqtan, ár namazdyń aldynda dáret alsańyz boldy... Bilesiz be: sizdiń bir namazyńyz bizdiń júz, tipti myń namazymyzdan artyq bolýy múmkin! Óıtkeni, hadıste aıtylǵanyndaı, adam qulshylyǵyn qanshalyqty qıyndyqpen atqarsa, oǵan sonshalyqty eselenip saýap beriledi, dárejesi ósedi. Sondyqtan esh ýaıymdamańyz. Barynsha tyrysyp, saqtanyp, oqı berińiz namazyńyzdy. Alla razy bolsyn sizge!..
- Iá, ıá. Sizdiki úzirli jaǵdaı ǵoı. Qabyl bolady, ınshaalla. – Darhan da jigerlendire til qatty.
- Rahmet sizderge! Men onda júreıin.
- Jaqsy, baýyrym, jolyńyz bolsyn!
- Alla jar bolsyn, Jáke!
- Ámın. Rahmet. Saý bolyńyzdar.
- Saý bolyńyz.
Esik jabyla sala, ekeýmiz bir-birimizge qaradyq.
- Qandaı qıyn, á?
- Myqty jigit eken!
- Kúnine 3 pampers alsa, aıyna 45 myń teńge! Bul degenińiz kishi-girim bir aılyq qoı!
- Aıtpańyz, Dáke! Basqasyn aıtpaǵanda, tek dáreti men namazynyń qabyl bolýy úshin jumsalǵan shyǵyny!.. Shúkirsizbiz ekenbiz ǵoı biz!..
- Iá-á, Aleke... – Darhan kúrsindi. Men de kúrsindim. «Ia, Jaratqan ıem! Biz sıaqty álsiz pendelerińniń qatelik-kemshiligin keshire gór... Janat baýyrymnyń yqylasyndaı yqylas bere gór bizge... Baýyrymnyń ımanyna qýat, naýqasyna shıpa bere gór! Ózińniń razylyǵyń úshin jumsaǵan dúnıesin eselep qaıtara gór! İsin jeńildetip, ryzdyǵyn keńeıte kór!.. Ia, Alla, bergenińe sansyz shúkir!..»
Avtory: Alǵadaı Ábilǵazyuly
Sholýshy: Ásel Óteshova
