Qazaqstan Respýblıkasy ishki ister mınıstri Q.N. Qasymov Aýǵanstan prezıdentiniń keńesshisi, Ulttyq qaýipsizdik jónindegi keńestiń basshysy Hanıf Atmarmen kezdesti dep habarlaıdy Qamshy.kz  aqparat agenttigi QR İshki ister mınıstrliginiń baspasóz qyzmetine silteme jasaı otryp.

İİM-de ótken kezdesýde Q.Qasymov sheteldik meımanǵa elimizdegi ishki ister organdary júıesi týraly áńgimeledi. Mınıstr óz sózinde qazaqstandyq polısıa qyzmetiniń basym baǵyttarynyń biri – esirtki bıznesine qarsy is-qımyl ekenin atap ótti. Bul baǵyttaǵy mindetter sheteldik áriptestermen ekijaqty, tipti keıde birneshe tarappen birlesip atqarylady.

Qazaqstan Respýblıkasynyń İİM Aýǵanstandaǵy esirtkige qarsy kúresti kúsheıtý sharalaryn qoldaý jónindegi halyqaralyq jobalarǵa belsenedi qatysady. Kezdesý barysynda bul másele de nazardan tys qalǵan joq.

Memleketter arasyndaǵy úkimetaralyq kelisim sheńberinde QR İİM Qaraǵandy akademıasynda «Quqyq qorǵaý qyzmeti» mamandyǵy boıynsha 73 aýǵan azamatyn oqytý qarastyrylǵan, onyń ishinde 26 kýrsant osy Akademıany támamdady.

 Aýǵanstanmen eki aradaǵy ózara yntymaqtastyq turǵyndardy azamattyq qorǵaý salasynda da iske asyrylady. Qazirgi ýaqytta bul memleketke Almaty qalasynda jańadan qurylǵan Tótenshe jaǵdaılar jáne dúleı zilzalalardy azaıtý jónindegi ortalyq janyndaǵy baqylaýshy mártebesi usynylǵan.

Kezdesýge qatysýshylar esirtki bıznesine, zańsyz kóshi-qonǵa qarsy kúrestegi yntymaqtastyq, azamattyq qorǵanys salasynda ózara is-qımyl jasasýdyń, aqparat almasý jáne basqa da óńirlik qaýipsizdikti qamtamasyz etý aspektileriniń negizgi formalaryn talqylady.

Kezdesý ózara túsinistik jáne konstrýktıvti dıalog túrinde ótti.