Sońǵy ýaqytta organdardy transplantasıalaý jaıynda jańalyqtar kóbeıip ketti. Birneshe kún buryn kóz jumǵan jigittiń organdaryn ruqsatsyz alǵan dárigerler ol jigittiń týystary tarapynan úlken daýǵa ilikken bolatyn. Belgili bolǵandaı, otandastarymyzdyń kóbisi kóz jumǵannan keıin olardyń aǵzalaryn ózge bireýge salýǵa qarsy eken, dep habarlaıdy Qamshy.kz aqparat agenttigi Karavan.kz saıtyna silteme jasap.
Alaıda, bul máseleniń ekinshi jaǵy bar. Keıbir adamdar, tipti, kózi tirisinde ózderiniń ishki aǵzalaryn satylymǵa qoıyp, ınternetke jarıalaıdy eken. Ǵalamtorda aǵzalardy satylymǵa qoıatyn túrli forýmdardy kezdestirýge bolady. Olardyń ishinde eń kóp usynylǵan taýarlar – búırek pen baýyr.
Ózderiniń ishki aǵzalaryn satylymǵa qoıǵan birneshe qazaqstandyqtardyń pikirin nazarlaryńyzǵa usynamyz.
"Maǵan óte qomaqty qarjy kerek, sol sebepti de ózimniń búıregimdi forýmǵa jarnamalap, satylymǵa qoıdym. Ol jerdegi adamdar bul máselege shynaıy mán bermeıtin sekildi. Men baǵasyn aıtqanym joq, eger de maǵan jaqsy usynys túsip, kóp qarjy usynatyndar bolsa, men búıregimdi satýǵa daıynmyn.
Budan esh qoryqpaımyn. Eger baǵym jansa, bir búırekpen de ómir súre alamyn, bolmasa, taǵdyrdyń degenine kónemin.
Maǵan eki er adam habarlasty, alaıda olardyń daýystary maǵan unamaǵandyqtan bas tarttym. Sonymen qatar, meniń qasymda áke-sheshem otyrǵan bolatyn. Olar bul jaıynda bilmeýi qajet", - deıdi 19 jastaǵy Sáýle esimdi boıjetken.
Al, Aınur esimdi qyz óziniń búıregi men baýyrynyń bir bóligin satylymǵa qoıypty: «Maǵan shuǵyl túrde aqsha qajet, sol sebepti de búıregim men baýyrymnyń bir bóligin satylymǵa shyǵardym. Qazirgi maǵan kóptegen adamdar qońyraý shalady. Maǵan 5 mıllıon teńge usynǵan bolatyn, alaıda men bas tarttym. Sebebi, men ózimniń búıregimdi 10 mıllıonǵa baǵalaımyn.
Tipti, 10 mıllıon teńgeniń ózi az sıaqty. Sebebi men búıregimdi satyp jatyrmyn, al ony maǵan keıin eshkim de qaıtaryp bere almaıdy. Al eger baýyrymnyń bir bóligin satsam, ol keıin qalpyna keledi.
Men, árıne, qorqamyn. Bir búırekpen ǵana qalsam, ne bolar eken dep únemi oılap júremin. Ekinshi búıregimmen qıyndyqtar týyndamaıdy ma eken dep qorqamyn. Sonymen qatar, bul is zańdy ma, joq pa, ony da bilmeımin, sol jaǵynan da azdap qorqynyshym bar», - deıdi Aınur.
26 jastaǵy Sandýǵash esimdi qyzdyń jaǵdaıy múldem bólek eken: «Meniń jıenim qatty aýryp qaldy, oǵan ota jasatý úshin qomaqty qarjy kerek. Eger, aqsha qatty qajet bolǵan jaǵdaıda, óz ishki aǵzańdy satýǵa bolady degendi kóp estigenmin. Men ınternetten forýmdy taýyp alyp, ol jerge ózimniń búıregimdi satylymǵa qoıdym. Alaıda, qatty qorqamyn, degenmen satýǵa májbúrmin.
Maǵan eki adam habarlasyp 2,5 jáne 3 mıllıon teńge usyndy. Ol adamdar barlyq jaýapkershilikti óz moıyndaryna alyp otyr jáne de maǵan alańdaýǵa esh sebep joq ekendigin aıtady. Olar meni dárigerge týysymyz nemese dosymyz dep tanystyrmaq.
Bul másele qazir sheshildi. Mundaı qadamǵa shynymen de barýym kerek pe, joq pa dep múldem oılanbaımyn da», - deıdi ol.
23 jastaǵy Aıdos esimdi jigit óziniń búıregin satpaq eken.
«Men ıpotekany qalaı tóleıtinimdi bilmeımin. Sol sebepti de óz búıregimdi satylymǵa qoıdym. Adamdar ózderiniń ishki aǵzalaryn satylymǵa shyǵaratyndyǵyn kóp estigenmin. Keıin men de ǵalamtorda forýmdy taýyp alyp, habarlandyrý berdim.
Qorqamyn, biraq qalaı da ómir súrý qajet. Meniń basqa amalym joq. Ákem qaıtys bolyp ketken, qazir kishkentaı inimiz ekeýmiz ǵana qaldyq. Tamaqqa aqsha tabý kerek jáne de páterdiń aqysyn tóleý qajet.
Búıregimdi 4 mıllıon teńgege satpaqpyn. Alaıda maǵan qońyraý shalǵandar 2 nemese 3 mıllıon ǵana usynyp otyr. Ol maǵan jetpeıdi, sondyqtan da qolaıly usynystardy kútemin», - deıdi jas jigit.
Qazirgi tańda túrli forýmdardaǵy búırektiń baǵasy 3 mıllıonnan 5 mıllıonǵa deıin barady. Alaıda, kebir habarlandyrý berýshiler 10 mıllıon men 30 mıllıon teńgege deıin baǵalap jatyr.
Ótken jylǵa qaraǵanda búırektiń baǵasy tym tómen túsip ketkendigin baıqaýǵa bolady. 2016 jyldyń aıaǵyna qaraı búırektiń baǵasy 4 mıllıonnan bastalyp 125 mıllıon teńgege deıin jetken. Al baýyrdyń bir bóligin $20 000-ǵa alýǵa bolady eken.
Daıyndaǵan: Nazerke Labıhan
