Ortalyq Komýnıkasıalar Qyzmetinde Fransıanyń Qazaqstandaǵy Tótenshe jáne Ókiletti Elshisi Fransıs Eten myrzanyń qatysýymen «Fransıa-Qazaqstan arasyndaǵy dıplomatıalyq baılanysqa 25 jyl» atty baspasóz konferensıasy ótti dep habarlaıdy Qamshy.kz aqparat agenttigi.

Fransıa batys elderiniń arasynda eń alǵash bolyp, 1992 jyly 25 qańtarda Qazaqstannyń egemendigin moıyndaǵan memleket. 1992 jyldyń qyrkúıeginde Prezıdent Nazarbaevtyń Parıjge eń alǵashqy resmı issapary barysynda, Qazaqstan men Fransıa eki jaqty dıplomatıalyq qarym-qatynastyń ornaýy jaıynda protokolǵa qol qoıdy. Eki el arasyndaǵy yntymaqtastyqtyń negizgi baǵyttary men aldaǵy josparlary Fransıa Prezıdenti Fransýa Mıtterannyń 1993 jyly Qazaqstanǵa issapary kezinde talqylandy.

Qazaqstan – 2008 jyldyń maýsymynda Fransıamen strategıalyq seriktestik ornatqan Ortalyq Azıadaǵy jalǵyz el.

Saıasat, ekonomıka, mádenıet salalarynda tyǵyz ári mazmundy yntymaqtastyqtyń ornaýynyń 25 jyldyq mereıtoıy aıasynda Fransıa Elshiligi bıylǵy jyly Qazaqstannyń túkpir-túkpirinde  kóptegen mádenı-saıası issharalar uıymdastyrýda. Bul mádenı maýsym 2016 jyldyń maýsym aıynda General De Golldyń Baıqońyrǵa saparynyń 50 jyldyǵyn atap ótýmen bastalyp ketken edi.

Eki el Memleket basshylary, mınıstrler jáne parlamentarıler arasyndaǵy eki jaqty saıası dıalog qarqyndy túrde damýda. Biz únemi úkimetaralyq jáne vedomostvoaralyq konsýltasıalar uıymdastyramyz, kelesi úkimetaralyq komısıa ústimizdegi jyldyń 7-qyrkúıeginde, Astanada ótedi dep josparlanýda. 

2015 jyldyń naýryz aıynda Astana men Parıjdi jalǵastyratyn tikeleı áýe qatynasynyń ashylýy – eki el arasyndaǵy saıası, ekonomıkalyq jáne mádenı alys-beristiń damýyna yqpalyn tıgizdi.

Búginde Fransıa – Qazaqstannyń negizgi saýda seriktesteri tiziminde 6-orynǵa ornalasqan. Al fransýz kompanıalary – Qazaqstan ekonomıkasyna eleýli úles qosqan iri ınvestorlar qatarynan tabylady. Fransýzdardyń Qazaqstanǵa quıǵan kapıtalynyń jalpy somasy – 13,6 mıllıard eýrony quraıdy.

Qazaqstan-Fransıa saýda-ónerkásip palatasy Fransıa, frankofon seriktester men Qazaqstan arasyndaǵy iskerlik qatynastardy nyǵaıtýǵa jáne damytýǵa óz úlesin tıgizýde.

Ekonomıkalyq jaǵynan alar bolsaq, biz ýran óndirý (Katko-KazAtomÓnerkásip pen Areva arasyndaǵy ortaq ónerkásip), temir jol lokomotıvteri (Alstom),  tıtan quımalaryn óndirý (AIRBUS), munaı (Total), sement (Vicat), farmaseftıka (Sanofı), sýmen qamsyzdandyrý (Veolia), agro-ındýstrıa (Danone, Lactalis-Foodmaster, Soufflet) salalarynda qarqyndy baılanys ornattyq.

Astana Ekspo-2017 kórmesine de belsene qatysýdamyz. Fransıa eń alǵashqylardyń qatarynda bas komısaryn taǵaıyndap, 2015 jyldyń 5 qarashasynda "Astana Ekspo-2017-men" kelisimge qol qoıdy. Al, bizdiń pavılonymyz 1084 sharshy metr aýmaǵymen eń úlken úsh pavılonnyń qatarynda.

Mádenı jáne ýnıversıtettik baılanysymyz da damý úsitnde: 2014 jyldyń qyrkúıeginde Almatyda Ortalyq Azıa boıynsha teńdesi joq «Instıtýt Sorbonna-Qazaqstan» ashyldy, sonymen qatar Qazaqstanda úsh Fransýz Alánsy, al Astanada bir fransýz mektebi jumys isteıdi.

Joǵarǵy basqarý mamandaryn daıyndaý maqsatynda Qazaqstan Respýblıkasy Prezıdentiniń qasyndaǵy Memlekettik Basqarý Akademıasy men Fransıanyń Ulttyq Basqarý mektebi arasynda baılanys ornatylǵan.