Astanadaǵy mektepterde EXPO-ǵa baılanysty sabaqtar keıinge shegerilmeıdi, dep habarlaıdy Qamshy.kz aqparat agenttigi Tengrinews.kz saıtyna silteme jasap.

Bul týraly Astana qalalyq bilim berý basqarmasynyń baspasóz hatshysy Jazıra Asanova málimdedi.

Onyń aıtýynsha, 2017-2018 oqý jylyna arnalǵan saltanatty sap túzeý 2-qyrkúıekte ótedi.

"Qurmetti ata-analar! Birinshi qyrkúıek – Bilim kúni elimizdegi Qurban aıt meıramyna sáıkes kelýine baılanysty, mektepterdegi 2017-2018 oqý jylyna arnalǵan saltanatty sap túzeý 2-qyrkúıek kúni ótedi. Qalalyq mektepterde oqý úrdisi ózgerissiz osy kúni bastalady. Kolejderde sabaq 18 qyrkúıekte bastalady", – dedi Jazıra Asanova.

Eske sala keteıik, osyǵan deıin Astanada EXPO-ǵa baılanysty oqý jyly kesh bastalýy múmkin ekeni aıtylǵan bolatyn. "Astana jaıly aıtar bolsaq, EXPO-2017 kórmesine baılanysty shyn máninde jol-kólik jelisinde joǵary qysym bolýy múmkin degen boljam bar. Elordanyń bilim basqarmasy "Alǵashqy qońyraýdy" 1-qyrkúıekte ádettegideı ótkizse de, oqý jylyn 12-qyrkúıekte bastaý týraly usynys aıtty", – dep túsindirgen edi bilim jáne ǵylym vıse-mınıstri Elmıra Sýhanberdıeva.