10 tamyz qazaqtyń birtýar uly, kórnekti memleket jáne qoǵam qaıratkeri, iri uıymdastyrýshy-basqarýshynyń, burynǵy Mınıstrler Keńesiniń Tóraǵasy, Sosıalısik eńbek eri Baıken Áshimovtiń týǵanyna 100 jyl, dep habarlaıdy Qamshy.kz aqparat agenttigi Aqmola oblysynyń ishki saıasat basqarmasynyń Óńirlik komýnıkasıalar qyzmetine silteme jasap.

Onyń ómirge kelgen ýaqyty elimiz eń kúrdeli jaǵdaılardy bastan ótkerip jatqan kez - 1917 jylmen tuspa-tus keledi.

Týǵanyna alty aı tolar-tolmastan aıaq astynan onyń ákesi Áshim aýyryp, qaıtys bolǵan. Biraz ýaqyt ótken soń, týystary anasyn ámeńgerlik salty boıynsha ákesiniń inisine turmysqa beredi. Qabdolla aǵataıy Báıeken aǵamyzdyń naǵyz tiregi, qoldaýshysy, ári ómirlik tálimgeri bola bilgen.

Ata-anasynyń  aıtýy boıynsha, on bes jasynda, 1932 jyly, tuńǵysh ret týǵan úıinen jyraqqa attanady. Aýyl men Kókshetaýdyń aralyǵy 150 shaqyrym. Jaıaýlatyp birneshe kún júrip, aqyry qalaǵa jetedi. Bul jaıly aǵamyz: «Kim biledi, olardyń sheshimi bolmasa, meniń taǵdyrym qalaı qalyptasar edi, meniń tiri júrýim múmkin be edi...» degen.

Qazaq úshin týystyq qatynastar – qasıetti sezim. Kókshetaýda jamaǵaıyn aǵaıyndary tabylyp,  jas Báıeken aǵamyzǵa Petropavl qalasyna barýǵa, temirjol FZO mektebine ornalasýǵa kómektesedi. Onda oqýshylarǵa kúnine 800 gram nan men bir ret ystyq tamaq berilgen. Aýylda kórgen asharshylyqtan keıin fabrıka-zaýyttyq ýchılıshe oǵan naǵyz peıishtiń jumaǵyndaı kórinedi.

Tek bir qıyndyq - ol orys tilin bilmegen. Múldem bilmegen. Biraq orys balalarmen aralasyp júrip, aqyry, úırengen. Birte-birte oqý men jazýdy da úırendi...

Oqýyn aıaqtap, parovoz jóndeýshi slesar mamandyǵyn alsa da, temir jolda jumys istemegen. Óz isiniń naǵyz sheberi bolǵysy keletin úmiti ony aýyl sharýashylyǵy tehnıkýmy bar Pokrovkaǵa jetelegen. Onda eki jyl oqyǵan soń, 1938 jyly ásker qataryna shaqyrylyp, Kıev Erekshe áskerı okrýginde áskerı qyzmetin atqarady. Al 1939 jyly gıtlerlik Germanıa Ekinshi dúnıejúzilik soǵysty Polshaǵa shabýylynan bastaǵanda Batys Ýkraına men Batys Belorýssıany bosatý boıynsha operasıalarǵa qatysqan.

Elge oralyp, Aıyrtaý aýdanynda áskerı daıyndyqtan sabaq berip júrgen kezinde súıgen jary ǵana emes, dosy, senimdi serigi bola bilgen Baqyt apaıymyzdy kezdestiredi. Jańa tanysyp, sezimderin bildire bastaǵan kezde 1942 jyldyń 9 shildesinde Baıken Áshimovty Qyzyl ásker qataryna qosylýǵa shaqyrtý keledi. Praga bekinisindegi urysta júrip qatty jaralanǵan aǵamyz on aı boıy gospıtálda jatqan.

Óziniń eńbek jolyn Saýmalkólde bastaǵan Baıken aǵamyz Qaraǵandyǵa qyzmet babymen aýysyp, sol jerde jas metalýrg Nursultan Nazarbaevpen tanysady. Zeınetkerlikke shyqqan shaǵynda elimizde bolyp jatqan oqıǵalardy muqıat baqylap, qalam terbegen sátteri de bolǵan.

Qazaqstan táýelsizdik alyp, óz prezıdentin saılaǵanda, Áshimov Nursultan Nazarbaevtyń eldiń ekonomıkasyn, turaqtylyq jáne ultaralyq kelisimniń, qazaqstandyq qoǵamdy nyǵaıtýǵa degen talpynysyn sózsiz qoldady. Sonymen qatar astanany Almatydan kóshirýdi qoldap, prezıdentimizge bata-tilegin beredi.

Qazaqstannyń jarqyn bolashaǵyna sengen jáne ómiriniń sońǵy kúnderine deıin eldiń amandyǵyn tileýmen bolǵan Baıken Áshimovtyń tilegi qabyl bolǵanyna senimdimiz.