Búgin «Ekspo-2017» aýmaǵyndaǵy Ispanıa Koróldiginiń pavılonynda Ispan tiliniń kúni ótti dep habarlaıdy Qamshy.kz aqparat agenttigi. İs-shara kezinde qalaǵan adam ıspan tiliniń sabaǵyna qatysyp, ıspan ádebıeti týraly dáristi tyńdap, sondaı-aq, ıspandyq mýzykalyq dýettyń ónerin tamashalaı aldy. İs-shara Servantes ınstıtýtynyń (ary qaraı – Instıtýt) qoldaýymen uıymdastyryldy. Búkil álemde keń taralǵan úshinshi til (qytaı jáne hındıden keıingi) sanalatyn jáne de roman tilderi ishinde eń tanymal til bolyp tabylady eken.

«Ispan tilinde ǵalamsharymyzdaǵy 500 mln. asa adam tildesedi. Osy tildi bilý kez kelgen salada qajetke jaraıdy. Ispan tilin biletin adam Rıvera Maııa nemese Galapagoss araldary syndy ıspan tilinde sóıleıtin kórikti elderge erkin saıahat jasap, tildesý jaǵynan esh qıyndyqty sezinbeıtin bolady», – deıdi Máskeýdegi Servantes ınstıtýtynyń dırektory Abel Mýrsıa.

Mýrsıa myrza atap ótkendeı, Instıtýt qyzmeti búkil álem boıynsha ıspan tili men mádenıetin taratýǵa baǵyttalǵan.

«Servantes ınstıtýty ıspan tilin úıretetin betke ustar mekeme bolyp tabylady. Bizdiń qyzmetkerlerimiz ıspan tilin keńinen nasıhattaý úshin búkil janyn salyp eńbek etýde», – dep qosty ol.

Instıtýt ókilderi ıspan tili bilimin rastaıtyn resmı qujatty qalaı alýǵa bolatyndyǵy jaıly arnaıy sesıa ótkizdi. Qalaǵan adam óziniń til deńgeıin tekserip, DELE ıspan tiliniń dıplomy jáne Ispan tilin meńgerý deńgeıin baǵalaıtyn SIELE halyqaralyq servısiniń elektrondyq sertıfıkaty syndy búkil álem boıynsha moıyndalǵan dıplomdardy alý úshin emtıhandardy qalaı tapsyrý qajet ekendigi jóninde aqparat aldy.

Sondaı-aq, Ispan tiliniń kúninde ádebıet te áńgimege arqaý boldy. Instıtýttyń mádenıet bóliminiń jetekshisi Tatána Pıgaróva Mıgel Servantestiń «Lamanchtyq aılaker ıdalgo Don Kıhot» romanynyń bas keıipkeriniń qazirgi zamandaǵy ınterpretasıasy jaıly dáris oqydy.

«20 ǵasyrda Don Kıhottyń beınesi óz isine nyq senimmen qaraý ıdeıasymen tyǵyz ushtasty. Bizdiń qazirgi zamanymyzda Don Kıhot búgingi órkenıettiń bas beınesine aınalyp otyr. Eger adam óz isine sense, ol bizdiń ómirdegi qandaı qıynshylyq bolmasyn, álbette, jeńe alady degen oı jatyr. Ispanıa pavılonynyń taqyryby klımatty jandandyrýǵa, ekologıalyq kózqarastyń jeńisine arnalǵan. Al bul naǵyz «don kıhottyq» maqsat deýge bolady! Álemdi jutatqan tehnogendik órkenıette qalaı jeńiske jetýge bolady? Adamzat tiri ǵalamsharda ómir súrýi qajet degen «don kıhottyq» senim ǵana adamdardyń ekologıa men energıaǵa qatysty kózqarasyn ózgerte alady», – dep atap ótti óz sózinde Pıgaróva hanym.

Sondaı-aq, is-shara kezinde Ispanıanyń mádenı jáne týrısik murasy beınelengen ınteraktıvtik karta (90 sharshy metrlik) tanystyryldy. Kartany 29-31 tamyz kúnderi saǵat 10:00-den bastap 19:00-ge deıingi aralyqta Ispanıa Koróldiginiń pavılonynda kórýge bolady.

Kúnniń sońynda ıspandyq mýzykanttar – sazger ári ánshi Marıa Arnal (Barselona) jáne gıtarashy Marsel Bajes (Tarragona) óner kórsetti. Konsert kezinde dýettyń «Qyryq bes bas jáne bir júrek» atty álbomyna (2017 j.) engen jańa ánderi oryndaldy. Ispandyq baspasóz betterinde «2016 jyldyń basty mýzykalyq jańalyǵy» dep atalǵan bul dýet mýzyka salasyndaǵy Barselona júldesimen marapattalǵan, «Verbena» atty álbomy jyldyń eń úzdik áni dep tanylǵan.