Qazaq kıno ónerine áli kúnge deıin qabyrǵasy qatpaǵan balań óner túrine qaraǵandaı taptaýryn kózqarastan aryla almaı kelemiz. Qazaq kınosy jas emes. Ol ósýdiń, damýdyń, qalyptasýdyń talaı-talaı asýlarynan asty. «Lenfılmmen» birigip túsirgen alǵashqy kórkem fılm «Amangeldiden» beri qaraıǵy ýaqytta qazaq kıno óneri kásipqoı mamandarmen tolyǵa tústi. Talaı-talaı rejıserler men senarıster Máskeýde, Lenıngradta joǵary bilim alyp, Reseı kınematografısteriniń sheberlik shyńdaý mektepterinen bilim men tájirıbe jınaqtap, qazaq kınoóneri óz aldyna otaý tigip, kúni búginge deıin júzdegen kórkem lentalardy dúnıege ákeldi. Olardyń biraz bóligi burynǵy odaqtyq, qala berdi, álemdik ekrandarǵa jol tarta bastady. Halyqaralyq kınofestıvalderge qatysa qalǵan «Qazaqfılm» týyndylary ózgelerden oza shaýyp, qomaqty júldelerdi ıelene bastady. Demek, qazaq kınoónerine mesheý balaǵa qaraǵandaı kózqarastan arylyp, jetilgen, ýaqyt jaǵynan alǵanda tarlan ashatyn jasqa jetken, kınoónerine qoıylatyn eń joǵarǵy talaptardyń qandaı túrin artsań da beli qaıyspaı kóteretin kezge jetkenin este ustaýymyz kerek. Ásirese, Qazaq eli Táýelsizdik týyn kótergen kezden bastap, qazaq kınoóneri de ıdeologıalyq qursaýdan bosap, óz jolyn ózi tańdaıtyn, óz qolyndaǵy kınokameranyń obektıvin bireýdiń nusqaǵan jaǵyna emes, óziniń qalaǵan jaǵyna bura alatyn erkindikke ıe boldy.

Táýelsizdik alyp, Táýelsizdik rýhy sana­myzǵa jaıǵasyp, oń-solymyzdy tanyǵan shaqta qazaq kınogerleriniń aldynan úlken bir suraq atoı salyp shyǵa keldi. Ol suraq: «Biz kimbiz osy? Qaıdan shyqtyq? Qandaı oqıǵalardy bas­tan keshirdik? Memlekettiliktiń irge tasy qashan qalanǵan? Qazaq handyǵy qashan quryldy? Onyń basynda kimder turdy? Kimdermen jaýlastyq, kimdermen jaǵa jyrtystyq? Jarty Eýropa erkin syıyp ketetin myna Qazaqıa dalasyna biz qalaısha ıe bolyp qaldyq? Búgingi tańdaǵy zaıyrly memleket dárejesine qalaı qol jetkizdik?». Osy jáne basqa da tolyp jatqan saýaldar qazaq kıno­gerleriniń aldyna úlken mindet júktedi. Aǵa býyny, orta býyny, «Jańa tolqyn» dep atalatyn jas býyny bar rejıserlerimiz jurt shólirkep otyrǵan tarıhı taqyrypqa jan-jaqtan kirise bastady. Sondaı izdenisterdiń nátıjesinde qazaq kınoqory birneshe týyndylarmen tolyqty.  Áýeli ekranǵa jarnamasy jer-dúnıeni jańǵyrtqan «Kóshpendiler» shyqty. Kúlli Qazaq eliniń basyn biriktirip, ejelgi dushpanǵa oısyrata soqqy berip, Qazaq memlekettiliginiń irgesin nyǵaıtqan aılaly da aqylman Abylaı handy ekrannan kóremiz dep asyǵa kútken kórermenniń úmiti sý sepkendeı basylyp, uıalǵannan jer shuqyp qaldy. Dosqan Joljaqsynovtan basqa bir de bir qazaq akteri qatyspaǵan (onda da qalmaq Sharyshtyń rólinde) kınony qazaq kınosy dep ataýǵa bolatyn ba edi? Onyń áýelgi rejıseri amerıkalyq (Gollıvýdtan), ol bárine qolyn bir-aq siltep kelgen izimen keri qaıtyp ketken soń orys rejıseri S.Bodrov jalǵastyrsa, Abylaıdan bastap basty rólder shetinen sheteldik akterlerge berilse, senarıin jazý Ázerbaıjan dramatýrgine tapsyrylsa, qosalqy rejıser bolyp tarıhtan múldem beıhabar T.Temenov bekitilse, ol kınonyń jurtty jerge qaratýdan basqa «lajy» joq ekeni áý bastan-aq belgili bolatyn.  Eger dál osyndaı mol qarjymen dál osyndaı, aıtalyq, «Ivan Groznyı» fılmi túsirilgen bolsa, eń áýeli búkil orys qaýymy óre túregelip, kıno synshylary ony tas-talqan etip synap, memlekettik Dýmanyń keıbir depýtattary men pravoslavtyq shirkeý qyzmetkerleri kınojasaýshylardyń isin zań oryndaryna tapsyryp, bas-aıaǵy eki-aq serıaǵa ketken kól-kósir qarjyny memleketke qaıtarýdy talap etken bolar edi. Otyz serıaly «Shyńǵys han» fılmine qytaılyqtar 16 mıllıon dollar jumsasa, bizdiń kınogerlerdiń balalarǵa arnalǵan eki serıaly «Kóshpendiler» dep atalatyn blokbasterdiń quny 36 mıllıon dollar eken. Uıattan basqa bereri joq kınolentaǵa uıalmaı osynsha qarjy jumsappyz! Tarıhı shyndyq ataýlydan jurdaı, kórkemdik qundylyǵy joqqa tán fılmdi, ókinishke oraı, sol fılmdi jasaýǵa qatysy bar adamdardan basqa bir de bir jan jaqtaı almady.  Reseı ımperatory Nıkolaı İİ-niń bıshi Matıldamen ińkárlik sezimin kórsetkeni úshin búkil orys qoǵamy, basy patrıarh Kırıllden bastap bolashaq Reseı ımperatorynyń ar-namysyna tıgeni úshin memlekettik Dýmanyń depýtaty N.Poklonskaıa, shirkeý ókilderi, tipti, Ingýshetıanyń basshysyna sheıin bul kınolentanyń ekranǵa shyǵýyna tyıym salýdy prokýratýradan talap etip, rejıser A.Ýchıteldi júndeı tútip jatyr. Al bizdiń depýtattarymyz ben basqa da qaıratkerlerimiz kıno salasyndaǵy ult namysyna tıetin týyn­dymen sharýalary da bolmady. Tarıhı taqyryptaǵy osyndaı oısyraǵan olqylyqtan soń rejıserlerimiz kópke deıin bul mańaıǵa jolaýdan aıaqtaryn tartyp qaldy.  Sheteldik kınomamandarmen birigip ju­mys istesek paıdaǵa shash-etekten kenelemiz dep jurtty sendirip kelgen túsirýshi toptyń álgindeı sazǵa otyryp qalǵan keıpinen keıin araǵa biraz ýaqyt salyp jas rejıser Aqan Sataev táýekel dep tarıhı taqyrypqa qaıta tizgin burdy. Fılmniń aty – «Jaýjúrek myń bala». Bul fılmniń de jarnamasy «Kóshpendilerden» kem bolǵan joq. Alaıda, túsirýshi top ta, «Qazaqfılm» kınostýdıasy da sheteldik aýrýǵa shaldyqpaı ulttyq top qura bildi. Aqan Sataev jastyǵyna qaramaı el azattyǵy úshin kózsiz erlikke bel býǵan órimdeı jastardyń ósý, eseıý, erjetý, el qorǵanyna aınalýǵa deıingi aralyqtaǵy ómirlerin san qyrynan kórsete bildi. Tarıhı drama dep atalǵan bul fılm XVIII ǵasyrdyń birinshi jartysynda jońǵar basqynshylaryna qarsy kúreste taý-taýdy, saı-salany, shashyrap jatqan aýyl-aýyldaǵy órimdeı jas jetkinshekterdiń basyn qosyp, ózderinen kúshi áldeqaıda basym jaýǵa qarsy kótere bilgen Sartaı batyrdyń janqıarlyq erlik isteri «Kóshpendilerden» soń sý sepkendeı bolǵan kóńilimizdi qaıta kóterip, ótken ómirimizde búgingi urpaq maqtanarlyqtaı bolǵan batyrlarymyz ben aqylgóı abyzdarymyzdyń bolǵanyn, aq taban shubyryndydan soń eńseleri ezilip, eresekter jaǵynyń ózi áli es jıa almaı eseńgirep jatqan shaqta Sartaı týynyń astyna jan-jaqtan kelip qosylyp, at jalyn tartyp minýge jaraǵan jastardyń erlik shaıqasy rýhymyzdy kóterip ketken edi.  Bul fılm jaıly kezinde orys tilindegi gazetterdiń birinde («Vremá») jas rejıserdiń qıyn da kúrdeli taqyrypqa batyl baryp, kórermen kóńilin bir serpiltip tastaǵan sátti týyndy bolǵanyn atap ótkendikten, ol pikirimizdi qaıtalap jatýdy jón sanamadyq. Fılm túsirilip bite salysymen 2012 jyly Fransıada ótken aqyly Kann kınofestıvaline qatysyp, sátti týyndylardyń biri retinde atalyp ótti. Odan soń Tegeran halyqaralyq kınofestıvalinde júldeli orynǵa ıe boldy. Al, dál osy jyly ol ulttyq patrıottyq taqyrypta túsirilgen fılm retinde ulttyq kınematografıalyq «Qulager» syılyǵymen marapattaldy. Tarıhı jáne ulttyq salt-dástúr turǵysynan qaraǵanda kóptegen kórermenniń bul fılmge aıtar nazy da joq emes. Tarıhı turǵydan kelgende – Sartaı ómirde bolǵan adam. Ol qartaıyp, óz ajalynan qaıtys bolǵan. Al, salt-dástúr jaǵynan keletin bolsaq, qazaq eshqashan áıel adamǵa shańyraq kótertpegen.  «Qazaqfılm» kınostýdıasy sońǵy úsh-tórt jyldyń ishinde jańa ataýlarmen tolyǵa tústi. Ulttyq kınematografqa degen kózqaras ózgerip, ony san jaǵynan da, sapa jaǵynan da qoldaý saıasaty qyzý qolǵa alyna bastaǵany kóńilge qýanysh ornatady. Kıno salasyna qoldaý kórsetý Elbasy N.Á.Nazarbaevtan bas­taý alǵany da qazaq kınogerleriniń aldyna jańa mindetter júktep ótkendeı boldy. Ásirese, Qazaq handyǵynyń 550 jyldyǵyn búkil el bolyp toılaý qarsańynda Prezıdentimiz dál osy máselege erekshe kóńil bólip, bul taqyryptyń kıno salasynda erekshe izdenispen kórinis tabýy tıis ekenine toqtalyp ótip edi. Sonyń nátıjesinde keń tynysty, kóp serıaly tarıhı tuńǵysh teleserıal jobasy qolǵa alyna bastady. Joba avtory – Qazaqstannyń eńbek sińirgen qaıratkeri, Mádenıet jáne sport mınıstri Arystanbek Muhamedıuly. Alǵashqy kezeńdegi joba boıynsha fılm 20 serıaly bolyp jos­parlanǵan bolatyn. Senarı avtorlary bolyp belgili jazýshy Smaǵul Elýbaı men buǵan deıin «Jaýjúrek myń bala» fılmi arqyly tanylǵan kınosenarıst Tımýr Jaqsylyqov bekitildi.  «Teatr dramatýrgtiń jazý stolynan bastalady» demekshi, fılm de senarıstiń jartylaı bolsa da jazý stolynan bastalady. Jartylaı deıtin sebebim – jazý stolynda aqtyq núktesi qoıyldy dep eseptelgen ádebı nusqa rejıserdiń qolyna túsip, ol túsirý alańyna jetkenshe san túrli ózgeristerge ushyraıdy. Qoıýshy rejıser men senarı avtorlarynyń arasyndaǵy kelisý men ketisý aralyǵyndaǵy daý-damaı osy kezeńde sharyqtaý shegine jetedi. Óıtkeni, jazýshynyń óz rejıssýrasy bar da, túsirýshiniń óz rejıssýrasy bar. Keıde bul kózqarastar ot pen sý sıaqty oksúmoron deńgeıine deıingi alshaqtyqqa aparyp, onyń zardaby kınotýyndynyń sapasyna keri áserin tıgizetinin talaı kórgenbiz. Bul joly joba avtory retinde ári Mádenıet mınıstri retinde serıaldyń alǵashqy kadrynan bastap, «fılmniń sońy» degen tıtrdaǵy jazýǵa deıin jaýapty bolatynyn sezingen Arystanbek Muhamedıuly shyǵarmashylyq toppen áldeneshe ret kezdesip, olarǵa aqyl-keńesin berip, bul serıalǵa ózgerister engizip, 20 serıany 10 serıaǵa deıin qysqartýdy usynyp, basty róldegi akterlerdiń ózderine senip tapsyrylǵan keıipkerge qanshalyqty daıyn ekenine deıin kóńil bólip, qadaǵalap otyrdy. Buǵan deıin «Elbasy joly», «Quraq kórpe», «Stalınge syılyq» atty fılmderi arqyly kórermenderge kánigi rejıser retinde jaqsy tanylǵan Rústem Ábdirashev osy serıaldyń alǵashqy bólimi retinde İlıas Esenberlın romanynyń jelisi boıynsha túsirilgen «Almas qylysh» fılmin jurtshylyq nazaryna usynyp úlgerdi. Onda Altyn Orda ydyraǵan soń Kereı men Jánibek Shaıban-shahpen bitispes taıtalasqa túsip, óz tóńiregindegi ulystar men taıpalardyń basyn biriktirip, Moǵolstan shekarasyna, Shý ólkesine kelip, birjolata qonystanady. Fılm qazaq tilinde túsirilgenmen, jońǵarlar men shaǵataılardyń óz tilderinde sóıleıtin sátteri de bar. Qazaq kórermenderi úshin bul oǵash bolyp kórinbeıdi, kerisinshe, sol zamannyń rýhyna saı erekshelik retinde jatsynbaı qabyldanady.

Kóńilaýdararlyq taǵy bir eleýli oqıǵa – Mádenıet jáne sport mınıstrliginiń tapsyrysy boıynsha «Qazaq eli» dep atalatyn tolyq metrajdy anımasıalyq fılmniń dúnıege kelýi dep aıta alamyz. Balalarǵa arnalǵan bul fılmniń negizgi jelisi Qazaq handyǵynyń irgesin qalaǵan Kereı men Jánibektiń balalyq shaǵynan bastap handyq qurǵan kezine deıin balalardyń qyzyǵýshylyǵyn týdyratyn tartymdy, áserli sújet arqyly órilip otyrady. Eldi basqarý úshin qylyshtasý men naızalasýdy ǵana meńgerip qoıý azdyq etetinin bilgen aǵaıyndy eki balanyń ustazdary olardy Otyrar kitaphanasyna bilimin kóterý úshin jiberedi. Shaıban-shahtyń ozbyrlyǵyn kórip ósken eki jas sultan eseıe kele Qazaq handyǵyn qurý kerektigin túsinedi. Sol jolda bul ekeýi san túrli oqıǵalardy bastarynan keshirip, aqyry maqsattaryna jetedi. Aty anımasıalyq fılm degeni bolmasa, «Saq» kınostýdıasy túsirgen bul fılmniń kórermenge jaǵymdy áseri mol, ári balalar úshin tarıh tanýda sapaly sabaq bolary sózsiz. Balalar ǵana emes, eresekter de qyzyǵyp kóretin bul múltıplıkasıalyq fılmniń treıleri «Kann» kınofestıvalinde kórsetilip, sheteldik mamandardyń joǵary baǵasyna ıe boldy. Qarapaıym da tartymdy sújetke qurylǵan bul shyǵarmany eń alǵash Elbasy Nursultan Nazarbaev tamashalap, oǵan oń baǵasyn berýi de «Saq» kınostýdıasynyń shyǵarmashylyq izdený jolynda ekeniniń kýási bolsa kerek. Túsirýge kirispes buryn Mádenıet mınıstri Arystanbek Muhamedıuly qoıýshy-rejısser Batyrhan Dáýrenbekke fılmniń sol zamanǵa laıyq tildik, stıldik erekshelikterin qadaǵalaý úshin meni bas keńesshi retinde shaqyrýdy usynǵan eken. Men ol tilekti qýana qarsy aldym, sebebi «Saq» kınostýdıasy osyǵan deıin meniń «Muńlyq-Zarlyq» atty senarıim boıynsha anımasıalyq lenta túsirip, kóptiń kóńilinen shyqqan edi. Onyń ústine, Qazaq handyǵynyń negizin salýshy Kereı men Jánibek zamanyndaǵy tarıhı oqıǵalar men olardyń leksıkonyndaǵy tildik erekshelikterdiń saqtalý mádenıetin qadaǵalaýdy jón kórdim. Óıtkeni, balalarǵa arnalǵan spektáklder men múltfılmderde eresek adamnyń ózi áreń túsinetin sózder men sóz oramdary kóp kezdesip jatady. Osyndaı tildik orasholaqtyqtar bul fılmde de qaıtalanyp jatpasyn degen oımen senarıdi bastan-aıaq áldeneshe ret oqyp shyǵyp, óz bilgenimshe qalam tıgizgen jaıym bar edi. Qazaq tiliniń baılyǵyn mensiz de jaqsy túsinetin Batyrhan Dáýrenbek bul fılmdi halyqaralyq talǵamǵa tatıtyndaı dárejede túsirip, balalar úshin tanymdyq jaǵynan da, kórkemdik jaǵynan da qundy týyndy jasap shyqty. Sóıtip, Qazaq handyǵynyń 550 jyldyq toıyna oraı túsirilmek bolǵan «Qazaq eli» atty úlken jobanyń júzege asýyna «Saq» kınostýdıasy anımasıalyq janrda súbeli úles qosyp úlgerdi.

Sońǵy jyldardaǵy qazaq kınoóneriniń úlken tabystarynyń biri – rejıser Sábıt Qurmanbekov túsirgen «Oralman» fılmi bolǵanyn yrza kóńilmen atap ótýimiz kerek. Qazaqstan Mádenıet jáne sport mınıstrliginiń tapsyrysy boıynsha túsirilgen bul fılm ústimizdegi jyly ótken Hİİİ Halyqaralyq «Eýrazıa» kınofestıvalinde bas júlde – Gran-prıdi jeńip aldy.

Sońǵy jyldardaǵy qazaq kınoóneri birneshe ataýlarmen tolyqqanyn atap ótýge tıispiz. Mádenıet jáne sport mınıstrliginiń tapsyrysy boıynsha túsirilgen «Anaǵa aparar jol» fılmi Aqan Sataevtyń taqyryptyq izdenistegi taǵy bir belesi dep baǵalaýǵa turarlyq tolymdy dúnıe. Prodúseri – Álıa Nazarbaeva. Hronometrajy 3 saǵattyq kınodrama qazaq halqynyń basyna túsken 30-shy jyldardaǵy náýbetten bastap, soǵystan keıingi jyldar aralyǵyn qamtıdy.

Satybaldy Narymbetov qazaq kınorejıssýrasynda aǵa býyn ókili retinde qalyptasqan kánigi kınotarlandardyń biri. Onyń 2015 jyly ekran betin kórgen «Amanat» tarıhı dramasy da qazaq kınosyndaǵy eleýli týyndylardyń biri bolyp baǵalandy. Fılmde birneshe oqıǵa qatar baıandalady. Birinshisi, HİH ǵasyrdyń birinshi jartysynda ómir súrgen Kenesary hannyń taǵdyry, ekinshisi, Kenesary han týraly atyshýly kitap jazǵan Ermahan Bekmahanovtyń qýdalaýǵa ushyraǵan aýyr kezeńi, úshinshisi, Bekmahanovtyń ómirin zerttep júrgen jas jýrnalısiń bastan keshken oqıǵalary. Shıeleniske toly bul tarıhı drama birshama tartymdy bolyp shyqqanmen, úsh oqıǵa birinen soń biri alma-kezek baıandalyp, kórermenniń qabyldaýyna aýyr tıer tustary barshylyq. Alaıda, qazaq kınematografynda eskerýsiz qalyp kele jatqan uly tarıhshy Bekmahanovtyń ómirin, onyń ıdeıasyn rýhanı amanat bıiginen qarap túsirilgen bul fılm tarıhymyzdy túgendeýde jasalǵan sátti qadamdarymyzdyń biri. Halyqaralyq kınofestıvalde «Qazaq­fılm­niń» taǵy bir týyndysy úlken marapatqa ıe boldy. Ol kınotýyndynyń aty – «Jańǵaq tal». Qoıýshy-rejısseri Erlan Nurmuhambetov. Fransıanyń Vezýl qalasyndaǵy Azıa kınolarynyń 22-halyqaralyq festıvalinde ol eki birdeı júldege ıe boldy: qazylar alqasynyń jáne kınosynshylarynyń arnaý­ly júldesine. Konkýrsqa Qytaı, Japonıa, Ońtústik Koreıa, Iran, Fılıppın jáne Túrkıa elderinen uzyn sany 90-ǵa tarta kınotýyndylar usynylǵan bolatyn. Solardyń arasynan qazaq rejıseriniń týyndysy oza shaýyp, kórermender men synshylardyń ystyq yqylasyna bólendi. Eske sala ketsek artyq bolmas, Erlan Nurmuhambetovtiń bul fılmi budan buryn Koreıanyń Pýsan festıvaline qatysyp, álemdik premerasyn ótkizgen bolatyn. «Jańa aǵym» nomınasıasy boıynsha «Jańǵaq tal» onda da júldeli orynǵa ıe boldy. Dosqan Joljaqsynov túsirgen ómirbaıandyq «Qunanbaı» fılmi de kınoqorymyzdy ba­ıyta tústi. Qunanbaı beınesin somdaǵany úshin Dosqan Joljaqsynov ekinshi ret Memlekettik syılyqqa ıe boldy. Sháken Aımanov atyndaǵy «Qazaqfılm» kınostýdıasy sońǵy eki-úsh jylda óz kórer­menderimiz ben shet jurttyń kórermenderine uıalmaı kórsetetin birneshe kınotýyndyny ekranǵa shyǵardy. Olardyń birazy halyqaralyq kınofestıvalderde jeńimpaz atanyp, qazaq kınosyna degen jańa kózqaras qalyptastyra bastady. Osy jańa kózqarasty úzip tastamaı, jańa kınotýyndylarmen bekite túsýimiz qajet. Shynaıy ónerge sýsap otyrǵan halqymyzdy mándi de maǵynaly, kórkemdik sapasy joǵary fılmdermen qýantaıyq. Ekrandaǵy nársiz, sólsiz dúnıelerdi toqtatyp, rýhanı qundylyǵymen kórermendi baýrap ta, jaýlap ta alar jaýhar kınolarymyzdy kóbeıtkenimiz abzal. Biz jylyna 5-6 fılm túsirsek, sonyń ózine qanaǵat tutatyn sıaqtymyz. Jáne sol 5-6 ataý ózine jumsalǵan shyǵyndy óteı almady dep, kınoónimge kiná artatyn ádetimiz bar. Kıno ónimge kúndelikti, tutyný taýaryna qaraıtyndaı toǵyshar kózqaraspen qaraýdy qoıatyn kez áldeqashan jetken. Halqynyń sany bizden on esege jýyq kóp Reseıde 2016 jyly 68 kınofılm túsirilipti. Sonyń tórteýi ǵana ózine jumsalǵan shyǵyndy óteı alǵan, qalǵan 64-i shyǵynǵa ushyraǵan. Soǵan qarap, Reseıdiń qarjy mınıstrligi kınoóndirisine degen qarjy kólemin «paıda tappaısyńdar» dep qysqartýdy emes, ony aldaǵy jyly bir jarym esege kóbeıtýdi oılastyryp otyr. Halqymyzdyń sany 18 mıllıon ekenin, onyń ishinde qazaq kınosyna qyzyǵýshylyq bildiretin qazaqtildi kórermenderimiz bir-eki mıllıonnan aspaıtynyn eskersek, kez kelgen shedevr fılmderimizdiń ózi ishki prokatta paıda taba almaıdy. Prezıdentimiz Nursultan Nazarbaev «Bolashaqqa baǵdar: rýhanı jańǵyrý» degen áıgili maqalasyndaǵy «Álem bizdi qara altynmen ǵana emes, mádenı jetistikterimizben tanýy kerek» degen tujyrymdamasynda, sóz joq, óner men mádenıet, sonyń ishinde kınoóneri de memleket qamqorlyǵynda bolýy kerek degen oıdy bildirse kerek. Úsh jyldyń ishinde halyqaralyq kınofes­tıval­derden bir Gran-prı, tórt arnaıy júlde­lerge, bir Memlekettik syılyqqa ıe bolǵan «Qazaqfılm» stýdıasynyń shyǵarmashylyq múmkindikterine budan keıin de keńirek jol ashyp, oǵan memleket tarapynan udaıy qamqorlyq kórsetilip otyrsa, qazaq kınoóneriniń shyǵar bıigi búgingiden de joǵary bolary haq.

 Dýlat Isabekov,

Memlekettik syılyqtyń laýreaty,

jazýshy-dramatýrg