QR Din isteri jáne azamattyq qoǵam mınıstrliginiń janyndaǵy jastar uıymdaryn damytý jónindegi Úılestirý Keńesiniń otyrysy ótti dep habarlaıdy Qamshy.kz aqparat agenttigi. Sharaǵa QR Din isteri jáne azamattyq qoǵam mınıstrliginiń vıse-mınıstri Abzal Núkenov, memlekettik organdardyń ókilderi jáne respýblıkalyq jastar uıymdarynyń basshylary qatysty.
Otyrys barysynda qatysýshylarǵa «Qazaqstannyń Jastar Kongresi» ZTB atqarýshy dırektory Aıdyn Sábıtov Qazaqstan Respýblıkasy Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» maqalasyna qoldaý retinde Qazaqstan jastarynyń arnaıy jasaǵan úndeýin oqyp berdi.
Úndeýdiń mátini:
«Biz, Qazaqstan jastary, ulttyq qundylyqtar men tarıhymyzdy dáripteıtin, halqymyzdyń ǵasyrlar boıy jalǵasyp kele jatqan adamgershilik qasıetterine súıenetin rýhy bıik Máńgilik eldi qurý jolyndamyz. Bul joldaǵy bas mindetimiz - ulttyq naqyshymyzdy saqtaı otyra zamanýı talaptarǵa saı bilimdi jáne progresıvti damyǵan el bolý.
Ulttyq qundylyqtar árqashan ana tilden bastaý alady. Sondyqtan til máselesi jyldar boıy eń ózekti másele pozısıasyn saqtap keledi.
Elimizdiń jarqyn bolashaǵyn qurý jolyn jalǵastyratyn biz, Qazaqstan jastary, latyn álipbıine kóshý ıdeıasyn qoldaıtynymyz týraly málimdeımiz. Sebebi, latyn álipbıi qazaq dybystaryn naqtyraq aıqyndaıdy. Kezinde «qazaq álipbıiniń atasy» atanǵan Ahmet Baıtursynulynyń da latyn álipbıin qoldanysqa engizgeni de sondyqtan.
Qazirgi tańda álem elderiniń basym bóligi tek qana latyn grafıkasyn qoldanady. Túbimiz bir túrki elderiniń de kóbisi derlik latyn álipbıimen oqıdy. Túrki tilderiniń ereksheligine saı dybystyq uqsastyqtar da osynyń dáleli.
Latyn grafıkasyna kóshýdiń jastarǵa yńǵaıly taǵy bir sebebi – latyn áripteriniń pragmatıkalyq yńǵaıly bolýy. Álemdegi ınovasıalyq jańashyldyqtardyń barlyǵy eń aldymen latyn grafıkasynda shyǵady. Biraz ýaqyt ótken soń ǵana, kırıll álipbıine kóshiriledi.
Latyn álipbıine aýysý qadamy bizge uzaq merzimdi keleshekte ekonomıkalyq paıda ákelip qana qoımaı, latyndanǵan ónimdi kırıllısaǵa aýdarýǵa jumsaıtyn ýaqytymyzdy únemdeýge múmkindik beredi dep oılaımyz.
Respýblıkamyzdyń jastary men jastar uıymdarynyń qaýymdastyǵy atynan, Qazaqstan jastary álemge myqty ári jaýapkershiligi joǵary birtutas ultty kórsetýge daıyn ekenin málimdeı otyra, Qazaq tiliniń latyn álipbıine aýysýyn biraýyzdan qoldaıdy!
Budan keıin, qatysýshylar jarıalanǵan úndeýge qol qoıý rásimine qatysty. QR Din isteri jáne azamattyq qoǵam vıse-mınıstri Abzal Núkenov óz kezeginde búgingi jarıalanǵan úndeýdiń mátini barsha Qazaqstan jastaryna jetýi-tıis dep atap ótti.
