Opozısıa men bıliktiń kúsh-qýaty bir-birine týra proporsıonaldy bolmaǵany qoǵamnyń álsizdiginiń kórsetkishi. Ony qazaq akademıalyq bilimsiz-aq ómirdiń ózi usynǵan tájirıbeden túıindep, saralap sezgen. 19-ǵasyrdyń ekinshi jartysynda qazaq dalasyndaǵy opozısıa men bıliktiń tartysynda oryn alǵan keıbir mysaldy alyp qarasaq ta jetkilikti. Orazbaı baılyq pen bılikke qol jetkizgen ozbyr bıleýshi. Abaı oǵan qarsy turǵan oppozısıoner. Ekeýi burshaǵy bitispes qarsylas bolǵan. Orazbaı Abaıdyń kózin qurtý maqsatymen ısi Tobyqtyny ashsa alaqanynda, jumsa judyryǵynda ustaǵan shynjyr balaq, shubar tósteriniń qoldaryn qanǵa malyp, batalasýǵa deıin barǵan. Ol budan ózge de qaskóıliktiń san túrlisin uıymdastyrdy. Sol Orazbaı Abaı dúnıeden qaıtkanda qatty qaıǵyrǵan adamdardyń biri bolǵan. Onyń sebebin suraǵandarǵa: “Men kim? Abaı kim? Orazbaıdy qansha qazaq biledi? Orazbaı atymnyń shyǵýy Abaıdaı arysymnyń arqasy emes pe? Abaıǵa men jylamaǵanda kim jylaýy kerek?”-depti. Kesh bolsa da qarsylasyn joǵary baǵalaǵany, ádildikti moıyndaǵany emes pe? Muny bıliktiń opozısıany kereksingen kózqarasy desek, qandaı artyqtyǵy bar? Al, búgingi bılik tym quryǵanda Orazbaıdaı minez kórsete alyp otyr ma? Árıne joq. Bul onyń myqtylyǵy emes-úlken mini. Kerek deseń, qoǵamdaǵy tepe-teńdikti saqtaýǵa qulyqsyzdyǵy.

(Amangeldi Kerimtaevtyń feısbýktegi paraqshasynan)