Negizi quqyq qorǵaý organdaryn maqtap jazǵan emespin, tek synaımyn, sebebi, jumysymnyń reti solaı. Olar men bizder, ıaǵnı advokattar, eki barıkadanyń eki jaǵyndamyz. Al, myna joly Oraldyq quqyq qorǵaý organyn (naqty ataýyn aıtpaı-aq qoıaıyn, jaǵympazdanyp otyr dep oılap qalar) maqtaǵaly otyrmyn. Byltyr bir jas balany qorǵaǵan edim, tap-taza sálaf edi, "Dinı ekstremızmdi qarjylandyrý" degen aıyppen 3 jyl jalpy rejımge sottaldy. Ata-anasynyń jalǵyz uly, odan basqa qyzdary bar, biraq, qazaq úshin uldyń orny erekshe ekeni belgili ǵoı. Sheshesi baıǵus "jalǵyzym, jalǵyzym"-dep áli kúnge janyn shúberekke túıip shapqylap júr. Bala kóp uzamaı, merziminen buryn bosap shyǵýy tıis, sebebi, ol kolonıada bosqa jatpaı sondaǵy kásiptik mektepte oqyp, bilim aldy, qaýǵadaı saqalyn qyrqyp, jónge keltirdi, men de óz tarapymnan Abaıdyń, Shákárimniń kitaptaryn aparyp barymsha betiniń beri qaraýyna atsalystym. Ol maǵan kolonıadan bosap shyqqan soń, óziniń áıelimen ajyrasatynyn ashyq aıtty, sebebi, kelin bala ústindegi qap-qara hıdjabyn qansha jerden jalynsaq ta sheshpeı qoıdy, óziniń týǵan apa-jezdesi Sırıaǵa bala-shaǵalarymen attanyp ketken, januıalarymen túgel sol jolda, enesin syılaý degen atymen joq, óıtkeni ol kisi namaz oqymaıdy, t.b. aıta berseń áńgime kóp. Negizgi aıtaıyn degenim, jaqynda balanyń anasymen kezekti áńgime ústinde (jıi kezdesýdiń sáti túse bermeıdi) "Apa, Siz quqyq qorǵaý organdarynyń qyzmetkerlerine ómir boıyna rahmet aıtyp ótetin bolasyz"- dedim, ol kisi túsinbeı betime suraýly júzben qarady. "Qarańyz, balańyzdyń beti beri qarady ma, qarady, durys jolǵa tústi me, tústi. Mine endi memleket sonyń bárin eskerip, erterek kolonıadan shyǵarýǵa atsalysyp jatyr, al eger ol aldyńǵy qylmyspen ustalmasa ne bolar edi? Kelinińizdiń týystarymen nemerelerińizdi alyp Sırıaǵa attanyp ketpesine kim kepil?-dedim". Sheshesi baıǵus "Durys aıtasyń, durys aıtasyń Abzal"-dep jylap jiberdi.

(Abzal Quspannyń feısbýktegi paraqshasynan alyndy)