Bizge eshteńe jaqpaıdy. Eshteńege kóńilimiz tolmaıdy. Tamaqtyń tuzy joq, eti qatty.. Kún sýyq, álde tym ystyq.. Adam kóp, jumys qıyn, jumys aýyr.. Sabaq sharshatty.. Ózgeniń zaty jaqsyraq, ómiri qyzyǵyraq, úıi úlkenirek, áıeli ádemirek...
Taǵy ne bar edi?... Jalpy túsinikti ǵoı.
Ómir – bitpeıtin problema. Uzaq keptelis. Mezi etedi, sharshatady. Kúndegi kúıbeń tirishilikten júıkeńiz juqarady.
Osydan keıin oryndalmaǵan maqsat, arman kúıinde qalǵan armandar tunshyqtyryp, dóńbekshigen túnderde uıyqtaı almaı barlyq álemge ókpeli bolyp jatasyz. Odan paıda joq bolǵan soń, joǵaryda jazylǵan nárseler bastalady-aı kep..
Árıne, siz muny baıqamaısyz. Siz úshin bári shynymen de nashar, sapasyz, tamaq dámsiz, ómir qyzyqsyz, ózgeniki jaqsyraq bolyp kórinedi. Tipti, barlyǵy sizge týra bir qasaqana, ádeıi josparly túrde uıymdastyrylǵan sekildi.
Ózine degen, ómirine degen kóńil tolmaýshylyq ózin qaz-qalpynda qabyldaı almaǵandarda bolady. Árıne, anda-sanda ózińdi qalyń orman oıǵa batyryp, áreketterińdi saralap, maqsattaryńdy jiktep, nysanańdy kózdep, dáldep, osy rette ózińdegi kóńil tolmaıtyn jaqtaryńa basa nazar aýdaryp otyrǵan durys. Alaıda, bul ózińe degen kóńil tolmaýshylyǵyńdy bar álemge kórsetý kerek degen sóz emes qoı?
«Qolda bar altynnyń qadiri joq» degen maqal bar emes pe edi? Qazekem sony beker aıtpaǵan eken. Jaqynda qatty syrqattanyp, janym kózime kórindi. Dúnıeń degen túk emes eken.. ESHNÁRSE qajet emes bolyp qaldy. «Jazylsam, boldy» degen oıdan basqa eshteńe mazalaǵan joq, sol sátte.
Ómirdiń qadirin, densaýlyqtyń qadirin, kórshiniń emes óz úıińdegi áıelińniń qadirin tek joǵaltqanda ǵana bilesiń. Jumyr basty pende ataýly osyny biledi, biraq túsinbeıdi.
Kóp adamdar ózderine ne qajet ekenin, ómirlerine ne sebepti kóńili tolmaıtynyn da bilmeıdi.
Eń birinshiden, ózińdi bireýmen, basqamen, kórshimen salystyrýdy qoıý kerek. Salystyrý degen óte nashar nárse. Ol- qyzǵanyshtyń basy, bastaýy. Eger siz bireýdiń qabileti myqtyraq ekenin nemese materıaldyq jaǵdaıyn jaqsyraq dep sanasańyz, siz ózińizdi tómendetkenińiz.
«Bolmasań da uqsap, baq
bir ǵalymdy kórseńiz». Demek, ózińiz myqty dep sanaǵan adamdy qyzǵanǵansha, jaqsy qasıetterin úırenińiz.
Adam damý úshin boıyndaǵy qorqynyshty jeńý kerek. Eshteńe istemegen adam ǵana shataspaıdy. Keıbir adamdar tabıǵatynan qorqynysh pen depressıaǵa túsýge beıim bolady. Sondyqtan táýekelge barýǵa qorqady.
Ózińde bardy qadirlemeý, ózgege qyzyǵý-búgingi zamannyń tendensıasy. Búgingi tańda keń qoldanystaǵy áleýmettik jeliler de oǵan sebep bolýda.
Qazir baıqasańyz, eki qurby-qurdas arasyndaǵy áńgime mynadaı: «Keshe ınstagrammnan Dınaranyń dosy oǵan ne syılaǵanyn kórdiń ba? Al, Adına bolsa Parıjge baryp qaıtypty.. Dáýlet kóligin aýystyrypty, men bolsam avtobýspen júrmin..» degen sıaqtyǵa aınalǵan. Bul tek jastar arasynda taralǵan ádet emes.
Bul qazirgi qoǵamnyń shyndyǵy. Adamdardyń ózgelerge qarap ómir súrý, ózgeler ne istese soǵan qarap elikteý tendensıasy damyp kele jatyr. Ózgeler degenimiz – sol adamdy qorshaǵan adamdar, qoǵam.
Aldaryńyzda, degradasıaǵa ushyraǵan qoǵam. Qashan ózimizdiń prınsıpterimiz, jeke ózimizdiń kózqarastarymyz, ózimizdiń qalaýymyz ben talǵamymyzben ómir súremiz? Qoldaǵy altynnyń qadirin qashan bilemiz? Kórshińiz sizdiń áıelińizge kóz salǵanda ma?
Nazerke MUSA
