Jumystyń jeńili joq. Áıtse de, áıelder eń jıi keletin jer – shashtaraz ben manıkúr salony. Sholpannyń manıkúr salonyna jumysqa turǵanyna at basyndaı alty jyl bolsa da, ár áıeldiń saýsaǵyn qolyna ustaǵan sátte mańdaıynan qara teri burq ete qalady. Ne ádet ekenin?! Álde, adam terisiniń názik tusy bolǵandyqtan ba eken? Áıteýir, osy bir ishki qorqynyshtan esh aryla almaı qoıdy. 

Ne túrli saýsaq ustaıdy deseńshi?! Byrtıǵan, qısaıǵan, kón teri tyrnaǵyn kómip qalǵan. Qyryqtan asqan áıelderdiń aptasyna eki ret kelip, mıyn qaǵyp alatyny taǵy bar. Solarǵa aptalyq árleýdiń nege jetispeıtini ózderine ǵana aıan. Áli boıaýy ushyp, eti ósip úlgermegen saýsaqtardy ustaǵanda, qara teri kóldeı aǵa jóneledi. Arasynan saýsaqtary súırikteıine kezdese qalsa, jibitkish salynǵan jyly sý ishinde súırik saýsaqtardy sıpalaı bergisi keletini taǵy bar. Qoıshy áıteýir, qym-qýyt áıelder nópirinen tunshyqpaı, jaǵaǵa shyǵýǵa arpalyspen ýaqytyń ótedi. Bir ǵajaby, saýsaǵyn ustaǵan sátten-aq, áıel shirkin qulaǵy máńgilikke buralǵan radıosha sarnap qoıa beretini?.. Ádemi sóıleıtinderge óziń de qosyla ketesiń. Al, bylsh-bylsh saǵyz shaınap otyryp sóıleıtinderi?.. Byrrr.... 

Alǵashqy jyldary ár áıeldiń áńgimesine qulaq asyp, birge talqylasyp, keıine kúıip-pisip, aqylyn tyńdamaǵanǵa shat-shálekeı bop jatatyn. Ýaqyt bárin ornyna qoıady eken. Búginde, sańyraýǵa aınaldy. Tyńdaǵan bolyp, otyra beredi. Jumysy bitken soń, betine jáımen jymıa qaraıdy. Sol da jetkilikti. Tyrnaqqa jaqqan boıaýyn úpilegen kúıi kasaǵa qaraı qaıqańdaı bastaıdy. Jumys aıaǵy jaqyndap qalǵan kezde, tolyqsha kelgen áıel kelip, aldyna jalp etip otyra ketti. «Kezekti tetiksiz radıo saıraıtyn bolar ?» degen oıy dalaǵa ketti. Úndemeıdi?! Byrtıǵan saýsaqtaryn retke keltirýdiń qıametin oılaǵannan, Sholpannyń kóńil-kúıi buzylyp shyǵa keldi. Amal joq. Jospardy oryndaý degen páleketten asyp kete almaısyń. Bir qolynyń jartysyn aıaqtaýǵa jaqyn. Byrtıǵan saýsaqty áıel únsiz?.. İshteı tańdanǵan boıy jumysyn jalǵastyra berdi. Tyrs... Byrtıǵan qolǵa tamshy tamdy... «Sýymdy shashyratyp aldym ba?» degen oımen qasyndaǵy eritkish quıylǵan tostaǵanǵa qarap edi, ornynda tur. Ekinshi tamshy... Qaıdan tamǵanyn anyqtamaq bolyp kózin kóterip qarap edi, kórgenine tań qaldy?! Byrtıǵan saýsaqtardyń ıesi únsiz jylap otyr?! Jópeldemede ne aıtaryn bilmeı sasqan Sholpan, kidirip qaldy. Jylaýyq áıeldiń talaıyn kórgen. Biraq, tap mynaýsha ún-túnsiz jylaǵanyn alǵash kórýi. 

-Keshirińiz... Sizge ne boldy? – degen suraǵy, únsizdik áleminde tunshyqty.

Ne de bolsa jumysyn tezirek aıaqtaǵysy kelip, jyldamdata bastady.

-Men oǵan kórsetemin?!

Mylqaý áıeldiń dúńk etken daýysynan, Sholpan selk etti. Qoryqqanyn bildirgisi kelmeı, únsiz jumysyn jalǵastyra berdi.

-Ádemilip isteńiz!.. Men búgin eń sulý áıel bolýym kerek?!

Túıeniń jarty etindeı etsheń áıeldiń myna sózderi kúlkisin shaqyrsa da, kúlmeýge tyrysyp baqty.

-Bilgishterdiń aıtýynsha, áıel bitken shetinen sulý deıdi?! Bilgendikten aıtatyn bolar... Siz... – deı bergeni sol eken, - Ótirikti soqpańyz?! Men ol topqa jatpaıtynymdy bilemin. Áttasy?!.. Qudaı bermese-bermeı-aq qoısyn?! Sizder aqshama eń sulý áıel etińizder! Qansha aqsha kerek, alyńyzdar! Biraq, ana albastydan ádemi bolaıyn?! – dep, byrtıǵan saýsaqtyń ıesi shát-shálekeı bolsyn?!
Ne de bolsa, áldekimmen arada baqastyq baryn túsingen Sholpan, aldynda otyrǵan áıeldiń shynymen kiriskenin kórip, ishin túrtken saıtan kúlkisin áreń tyıyp;

-Árıne?! Bizdiń sán salonynan eń sulý áıel bolyp shyǵatynyńyzǵa senińiz?! Óz basym, myna saýsaqtaryńyzdy tek brıllıant taǵatyndaı árlep beremin, - dep, sóziniń shyndyǵyna kózin jetkizgisi kelgendeı jumysyn jalǵastyrdy. 

Tap sol sátte «Jansáýlem?!» degen erkektiń qulaqqa maıdaı jaǵymdy qońyr daýysy estildi. Sholpannyń qoly eriksiz kidirip, daýysqa qulaǵyn túre qoıdy. Burylyp qaraýǵa, aldynda otyrǵan nán áıelden bata almaı, jumysyn jalǵastyra tústi. Nán áıel únsiz. 

-Jansýálem-aý, «áý» deseń qaıtedi?! 

Dál qulaǵynyń túbinen estilgen daýysqa basyn kótere qaraǵan Sholpannyń aldynda, qapsaǵaı ıyqty, qarasań kóz toıattardaı boıshań jigit aǵasy turdy?! Tańyrqaǵannan Sholpannyń tili baılandy. Nán áıel únsiz, doldanyp jylap otyr. Kózdiń qurtyndaı jigit aǵasy nán áıeldiń ıyǵyna qolyn jáımen salyp; - Jansáýlem-aý, izdep júrip áreń taptym ǵoı seni?! – deı bergeni sol eken, aldynda otyrǵan nán áıel;

-«Sánıashty» kórsetemin saǵan?! Túbirkilez aýrýynan turǵandaı tyrqıǵan Sánıaǵa «Sánıash» dep úzilesiń de turasyń?! Men seniń «Sánıashyńnan» asyp túspeı toqtamaımyn?! – dep, burqan-tarqan boldy.

Kórkem erkek ashýǵa basatyn shyǵar degen oıy dalaǵa ketti?!

-Jansáýlem-aý, altyndaı bes birdeı bala syılaǵan seniń qasyńda Sánıash degeniń kim bolypty?! Men ony jáı, bergen tapsyrmamdy tas-túıindeı oryndaıtyn qabyletine bola syılaımyn ǵoı. Jansáýlem, jer betinde senen asqan sulý bar dep kim saǵan aıtty?! Men úshin, álemde senen asqan ajarly áıel joq! – dep nán áıeldiń qulaǵynyń túbine arsha boıyn ıip, názik ıiskedi!..

Nán áıeldiń kóńili birden jadyrap sala berdi. Aınala turǵan áıelderdiń kózderinen alýan túrli pıǵyldaǵy «ottar» shashyrady. Kúni boıy aınaǵa qaraýmen áýrege túsetin kasır kelinshek: «Sulý bolǵansha – baqytty bolyp dúnıege kel»?! – dep, kúrsinip saldy.

Sholpan jumysyn aıaqtady. Nátıje oıynan shyqty bilem, nán áıel syǵyraıǵan kózderin syqsıta kúlimsiredi. Áıel kózderinde teńizden tereń meıirim baryn Sholpan sol kezde ǵana baıqady. 
Baqytty eki jan, qoltyqtasa sán salonynan shyǵyp bara jatty...

Saıa QASYMBEK