Asyldyń búgingi kúni jemisti boldy. Asyl nátıjeli kúndi kúıeýimen ádemi romantıkalyq keshki aspen aıaqtaımyn dep oılady, biraq keshke qatysty josparynyń kúl-talqany shyqty. Danıar áriptesterimen kompanıanyń tenderdi utyp alǵanyn atap ótý úshin meıramhanaǵa barady eken.
Asyl úıge keldi. Qap-qarańǵy. Kúni boıy úıde eshkim bolmaǵannan keıin úı qońyr salqyn. Tynyshtyq... Asyl kóńil-kúıin túsirmeýi úshin óziniń súıikti qýyrdaǵyn jasap, dastarhandy jaınatyp qoıdy. Keshki asyn iship jatyp «shirkin balalarym bolsa, qazir shýlap birge tamaqtanýshy edik. Tynyshtyqty balanyń syńǵyrlaǵan kúlkisi almastyrýshy edi» dep oılady.
Danıar men Asyldyń otaý qurǵanyna bıyl 8 jyl tolady. Ókinishke qaraı, áli kúnge deıin balalary joq. Ekeýi talaı aýrýhananyń tabaldyryǵyn tozdyrdy. Dárigerler ekeýinen de esh kinárat tappady. Biraq áli kúnge deıin ańsap júrgen sábıine jete almaı júr.
Áriptesteri, dostary, týystary Asyl men Danıardy kóre qalsa bala týraly surap, jarasyn tyrnaıdy. Qansha mán bermeıin dese de «Ýaqyt bolsa ótip jatyr, tezirek balaly bolý kerek», «Mansap qýyp júrgende kesh bolyp júrmesin» degen sekildi eskertýlerin aıtýdy umytpaıdy. Quddy bir Asyl men Danıar balany qalamaıtyn sekildi. Keıdi istiń mán jaıyn bilmesten, bireýdiń jeke ómirine, jeke sharýasyna nelikten aralasady eken dep ashýlanatyn kezderi de bolyp turady.
Asyl men Danıar úılenbeı turyp-aq úlken otbasy bolýdy armandady. Kóp balamyz bolsa, qartaıǵanda balalary men nemereleri jınalǵanda úıge sıatyndaı záýlim úıde tursaq dep armandady.
Asyl men Danıar qalaǵandaı úlken úıi bar. Sonymen qatar, súıikti jumys ta, aıyrylmas dostar da bar. Tek bala joq.
Kútpegen jaǵdaı
Asyl jumysyndaǵy Aıdananyń júkti ekenin biledi. Aıdana Asyldan jasandy túsik jasatýǵa aqsha suraǵan edi. Asyl muny qudaıdyń belgisi retinde qabyldady. Danıarmen aqyldasyp, Aıdananyń balasyn asyrap alýǵa bekinedi. Danıar da birden kelisedi. Jaryq dúnıeni kórmegen balany óltirgenshe, ony asyrap alyp, bar meıirimin, mahabbatyn bergendi jón kórdi. Qabyldanǵan sheshimnen keıin Asyl men Danıar balaly bolǵandaı qatty qýandy.
Asyl men Danıar Aıdanany úıge shaqyryp, óz usynystaryn aıtady. Qomaqty somma usynyp, balany dúnıege ákelgenshe Aıdanany medısınalyq tekserýden ótkizý, jatyn orny men tamaǵy jáne t.b qajettiniń barlyǵymen qamtamasyz etetinin aıtady. Tek balany bosanǵannan keıin baladan bas tartatyny týraly qaǵazǵa qol qoısa bolǵany. Aıdana usynylǵan sommany estigende qalaı kelise ketkenin baıqamaı da qaldy. Ol qarjyǵa ózi armandaǵandaı qaladan páter ala alady. Onymen qosa aı saıyn óziniń jalaqysynan eki ese kóp aqsha alyp otyrady.
Asyl men Danıar Aıdanamen zańdy túrde kelisim shartqa otyrdy. Aıdana olardyń úıine kóship keldi. Jegeni aldynda, jemegeni artynda. Qajetti dárýmen, medısınalyq tekserý barlyǵy qarastyrylǵan. Aıdana kezekti tekserýge barǵanda dáriger onyń bir emes, eki emes, úshemge júkti ekenin aıtqanda Aıdana tóbesine muzdaı sýdy quıyp jibergendeı kúı keshti.
Aıdana bastapqy kezde aqshadan aıyrylyp qalamyn ba dep qorqyp Asyl men Danıarǵa bul jańalyqty aıtpady. Úshem ekenin bilgende kelisim shartty buzyp, ózin dalaǵa qýyp shyǵady dep oılady. Ózi mundaı jaǵdaıda qaıda baryp, kimniń esigin syǵalaımyn, dalada qalamyn dep qoryqty. Biraq Asyl da, Danıar da Aıdananyń densaýlyǵyn jiti baqylap otyrǵandyqtan Aıdana úshem týraly jańalyqty uzaq ýaqytqa jasyra almady.
Danıar men Asyl Aıdananyń úshemge júkti ekenin bilgende baqyttan bastary aınalǵandaı boldy. Birden úsh balanyń ata-anasy atanatynyna sheksiz qýanyshty edi. Mundaı baqyt olardyń túsine de kirgen emes. Asyl men Danıar úsh birdeı shaqalaqtyń ómirin aman alyp qalǵanyna da qýandy.
Kópten kútken qýanysh
9 aı, 9 kún ótti. Kópten kútken úshem dúnıege keldi. Asyl men Danıar shekesi torsyqtaı eki ul men bota kózdi qyzdyń ata-anasy atandy. Bul Asyl men Danıardyń ómirindegi eń baqytty kúnderdiń biri boldy.
Danıar burynǵydaı emes endi úıine asyǵyp keletin boldy. Ekeýi armanyna jetip baqytty ómir súrip jatty.
Asyl men Danıar Aman, Esen, Tursyndy uıyqtatqannan keıin tátti qıalǵa berilip kóz aldaryna Danıardyń Aman men Esenmen baqta fýtbol oınap, Asyl Tursynmen dámdi keshki as daıyndap jatqanyn elestetti. Barlyǵy quddy bir tátti tús sekildi.
Biraq munymen jaqsy jańalyqtar legi bitpedi. Kóp uzamaı Asyl júkti ekenin bildi. Muny Asyl men Danıar úshemdi baýyryna basyp, asyrap alǵany úshin jasalǵan qudaıdyń bergen syıy dep túsindi.
Ǵajaıyp
Asyl men Danıar búgin dárigerge tekserilýge barady. Ekeýi qobaljyp júr. Asyl men Danıar júktilikke, balaǵa qatysty kez kelgen nársege asqan jaýapkershilikpen qaraıdy, árkez kobaljıdy. Aman, Esen, Tursyndy kútkendegi baqyt, qýanyshty qaıta bastan ótkerip jatqanyna dán rıza.
Dárigerdiń búginge aıtqan jańalyǵy Asyl men Danıardy eseńgiretip jiberdi. Asyl úshemge júkti eken. Otbasy taǵy úsh adammen tolyqpaq. Asyl men Danıar bul qýanyshty jańalyqty et jaqyndarymen birge atap ótti.
Asyl eki qyz ben bir ul balany dúnıege ákeldi. Qazir Asyl men Danıar alty balanyń ata-anasy. Ekeýi armandaǵandaı kóp balaly ata-ana atandy. Muny olar qudaıdyń bergen baǵa jetpes syıyna balaıdy.
Ásem Álmuhanbet
