Táýelsizdik jyldarynda otbasylyq-demografıalyq saıasat memleket damýynyń strategıalyq baǵyty retinde bekitilip, bul saladaǵy keleli máseleler kezeń-kezeńimen túpkilikti sheshimin taba bastaǵan edi. Shırek ǵasyrda Elbasy Nursultan Ábishulynyń básekege qabiletti ult, ál-aýqaty artqan otbasy, bilimdi urpaq qalyptastyrýǵa baǵyttalǵan syndarly saıasaty otbasylyq saıasatty jetildirýge, ana men balany memlekettik qoldaý boıynsha baǵdarlamalyq qujattardyń qabyldanýyna, osy baǵytta tutastaı júıeniń qurylýyna jol ashty. Igilikti ister nátıjesinde árbir bosaǵasy berik otbasy Otanymyzdyń baıandy bolashaǵynyń berik negizi retinde ornyqtyryldy. Jyr súleıi Súıinbaı Aronulynyń «Er jigit el-jurtynyń panasyndaı, Osy oraıda jaqsy áıel jalpy jurttyń anasyndaı» degen qanatty sóziniń jastar úshin tárbıelik máni zor. Ómirinen úlgi alatyn jany jaısań jandar az emes. Solardyń biri - Tasqala aýdanynyń týmasy Raýshan Sabyrǵalıqyzy bolatyn.
Raýshan Mýsalımova 2011 jyly «Qazaqstannyń úzdik adamdary» ensıklopedıasyna endi. QR Prezıdentiniń Qurmet gramotasymen, «Qazaqstan Respýblıkasynyń Táýelsizdigine - 10 jyl», «QR Konstıtýsıasyna - 20 jyl» merekelik medaldarymen marapattalǵan bolatyn. Eńbek jolyn zootehnıg bolyp bastaǵan ol óz isine tıanaqty, jaýapkershilikti sezinetin, uıymdastyrýshylyq qabileti bar maman retinde tanyldy. Ol aýdandaǵy asyl tuqymdy mal baǵatyn bólimsheni jeti jyldaı basqaryp, sharýashylyqtyń etti-júndi krosbred baǵytyndaǵy asyl tuqymdy qoı sovhozy atanýyna ózindik úlesin qosty.
Raýshan - óte eńbekqor, jumysty jaqsy-jamanǵa bólmeıtin, árdaıym batyl sheshim qabyldaı alatyn jan. Boıynda tek qazaq qyzyna tán qasıet kóp. Iaǵnı ol uıań, orynsyz sóz jarystyrmaıdy, sózdi ornymen taýyp aıtady, salt-dástúr, ádet-ǵurypty, maqal-máteldi bir kisideı biledi. Únemi at ústinde júretin adamǵa mundaı qasıetter ana sútimen, áke qanymen beriletini aıan.
Elimiz egemendik alyp, burynǵy basqarý júıesi ydyraǵan ótpeli kezeńde Raýshanǵa jaýapty jumys júkteldi, ol 2,5 myń halqy bar Atameken aýyldyq okrýginiń ákimi bolyp taǵaıyndaldy. Ol kezdegi aýyl ákiminiń basty mindeti halyqty aýyzbirshilikke, shydamdylyqqa shaqyryp, eldiń bolashaǵynan úmit kútip, eńbek etýge jumyldyrý bolatyn. Raýshan bul qyzmetti de abyroımen oryndap, sol aýyldyń úlken-kishisiniń aldynda qurmetke bólendi. 2003 jyly aýdandyq halyqty jumyspen qamtý jáne áleýmettik baǵdarlamalar bólimine basshy bolyp taǵaıyndaldy. Bile bilgenge bul aýyr ári jaýapkershiligi kóp qyzmet bolatyn. Biraq ol moıymady. Óziniń izdenimpazdyǵymen, tyń oılarymen kózge tústi, 2004 jyly aýdanda múgedekter qory qurylyp, múmkindigi shekteýli jandar arasynda túrli is-sharalar uıymdastyrýdy júıeli júrgizdi. Egde adamdarǵa arnalǵan oblystyq áleýmettik ınternatta jáne óńirimizdegi ózge de áleýmettik-medısınalyq mekemelerinde tárbıelenip jatqan tasqalalyqtarǵa baryp, olarmen emen-jarqyn sóılesip, syı-sıapat jasaý júıege qoıyldy. Qyzmetimen otbasyndaǵy áıel, ana ekenin umytpady. Onyń jaqsy qasıetteriniń biri - atqarylǵan isterdi árqashan ujymnyń, kóptiń eńbegi dep otyrady. «Ulyq bolsań, kishi bol» degen osy.
Óziniń eńbekqorlyǵynyń arqasynda birshama laýazymdy jumystardy atqaryp júrgen ortasynda syı-qurmetke bólengen Raýshannyń ómir joly kópshilikke, sonyń ishinde jastarǵa úlgi bolary sózsiz.
Gúlim AQAP,
Batys Qazaqstan oblysy
