Búgin Qazaqstannyń halyq jazýshysy, memlekettik syılyqtyń laýreaty, qazaq ádebıetinde soǵys surapylyn bastan keship kelgen qalamger Muzafar Álimbaev 94 jasynda dúnıeden ótti.
Ákeden 8 jasta, shesheden 13 jasynda aıyrylyp, «Týar-týmastan tonalǵan urpaqtyń ókili…». Sol tusta jetimektiń ne ekenin, jetimdiktiń zil men muń ekenin anyq ta tolyq sezdi. 1932-33 jylǵy alapat ashtyqty kóldeneń kózben kórip emes, óz basynan ótkergen. 1937 jyldyń stalındik soıqanynda halyqtyń zıaly ul-qyzdaryn zorlyq-zombylyqpen oqqa baılanǵanyn óz kózimen kórip, úreıi ushqan urpaq.
Soǵys bastalǵanda on segizge tolar-tolmasta bolǵan M.Álimbaevtyń pedýchılısheni endi bitirgen kezi edi. Kalının maıdanynda Rjevtiń túbinde 1942 jyldyń qarashasynan urysqa kirisip, 1943-tiń shildesine deıin soǵysty. Sol kezde saıası qyzmetkerler ınstıtýtyn joıyp, jaýynger komandır etip daıarlanyp, tank batareıasynyń komandıri boldy.
Soǵys bitkesin Muzafar Álimbaevty Shyǵys Germanıa jerinde áskerı qyzmetke alyp qalyp, odan elge 1948 jyly oralady.
Aqynnyń «Tý tikken» dastanynda Reıhstagqa alǵash tý qadaǵan qazaq batyry Rahymjan Qoshqarbaevtyń jan-dúnıesin, qaharman erligin shabytpen jyrlaıdy. Bul dastanda Sovettik Qazaqstannyń sańlaq perzentiniń súıkimdi beınesi nanymdy músindelgen.
Muzafar Álimbaev aqyndyq baqyty týraly aıtqanda onyń qazaq balalar ádebıetine sińirgen eńbegine toqtalý shart. Uzyna tarıhy qyryq jylǵa jýyqtaǵan «Baldyrǵan» jýrnalyn Muzafar Álimbaev qolymen quryp, 25 jyl bas redaktor retinde basqarýy qazaq balalar ádebıeti úshin yrys-qut boldy. «Baldyrǵan» jýrnaly arqyly dúnıejúzi balalar ádebıetindegi bar dástúrler men eksperımentter qazaq topyraǵyna aǵytyldy. Qazaq topyraǵynda boıyndaǵy bar juparyn balalarǵa arnaıtyn shyn mánindegi balalar qalamgeri «Baldyrǵan» arqyly qalyptasty.
M. Álimbaev qazaq balalar ádebıetiniń qatardaǵy qalamgeri ǵana emes. Aqyn, prozashy, aýdarmashy, synshy, jınaqshy, uıymdastyrýshy. Ádebıette talant beıimi bolmaı, eshteńe de ónbeıdi, ádebıet zorlyqpen jasalmaıdy. Muzaǵańnyń da balalar poezıasyna týa bitti beıimi bolǵany anyq. M.Álimbaev qazaq balalar ádebıetin damytýǵa kóp eńbek sińirdi. «Meniń oıynshyǵym», «Otpen oınama», «Oraq - olaq», «Shynyqsań - shymyr bolarsyń» taǵy basqa kitaptary qazaq balalar ádebıetine qosylǵan eleýli úles boldy. «Aspandaǵy ápke» jınaǵy úshin Qazaqstannyń Memlekettik syılyǵy berilgen. M.Álimbaev maqal - mátelderdi jınaý, zertteý, basqa halyqtar maqaldaryn qazaq tiline aýdarý jumystarymen de aınalysyp keledi. «666 maqal men mátel», «Maqal - sózdiń máıegi», «Órnekti sóz - ortaq qazyna», t.b. jınaqtar men zertteý eńbekteri bar. Syn - zertteý salasynda eńbekteri jaryq kórdi. Álem ádebıetiniń keıbir úzdik shyǵarmalaryn qazaq tiline aýdardy. Jazýshynyń óleńderi 38 tilge aýdarylǵan.
