Búginde atalǵan joba aıasynda 102 úmitker irikteldi, dep xabarlaıdy Qamshy.kz aqparat agenttigi Mınıstrliktiń baspasóz qyzmetine silteme jasap.
"100 jańa esimniń" birinshi kezeńi aıaqtaldy. Sonyń qorytyndysy boıynsha biz 102 adamdy iriktep aldyq. Olardyń ómirlik joly men kúndelikti qyzmeti bolashaq urpaqqa úlgi bola alady. "100 jańa esim" jańa kózqarasty, jańasha oılaýdy qalyptastyrady degen úlken senim bar. Búgin kishigirim qupıany da ashyp bere alamyn. Jyldyń aıaǵyna deıin biz "100 jańa esimge" kiretinderdiń Elbasy Nursultan Nazarbaevpen kezdesýin uıymdastyrýdy josparlap otyrmyz", - dedi QR Aqparat jáne komýnıkasıalar mınıstri Dáýren Abaev Astanadaǵy xalyqaralyq konferensıada.
Mınıstrdiń aıtýynsha, «Sıfrlyq Qazaqstan» memlekettik baǵdarlamasy da qoǵam ómiriniń san salasyn jańǵyrtýdy kózdeıdi. Sonyń aıasynda el ekonomıkasyna aqparattyq texnologıalar keńinen engiziledi, ınovasıalardy jan-jaqty qoldanýǵa jol ashylady. Mektepter men joǵary oqý oryndarynyń bilim berý josparlary zaman talabyna qaraı ózgeretin bolady. Úzdik ýnıversıtetterde aqparattyq-kommýnıkasıalyq kafedralar ashylyp, baǵdarlamalaý negizderine arnalǵan sabaqtar engiziledi. Jańa texnologıalardy qoldaný jaǵynan muǵalimderdiń daıyndyǵyn arttyrýǵa basa nazar aýdarylady.
«Osylaısha, adam kapıtalyn damytý arqyly biz sanany jańǵyrtýǵa qatysty naqty maqsat-mindetterdi oryndaı alamyz», - dep atap kórsetti Dáýren Áskerbekuly.
Aıta keteıik, elordada «Jańa jahandyq bolmystaǵy Qazaqstannyń jańǵyrý modeli» taqyrybynda xalyqaralyq parlamenttik konferensıa bastaldy. Atalǵan shara QR Tuńǵysh Prezıdenti kúnine arnalyp otyr. Májiliske Reseı, Ázerbaıjan, Túrkıa, Ózbekstan, Armenıa, Italıa, Ispanıa, Qytaı, Birikken Arab Ámirlikteri, Bolgarıa, Majarstan jáne taǵy basqa uzyn sany on bes eldiń delegattary qatysýda. Budan bólek, AQSH-tyń sarapshylary da keldi.
