Aqtóbede «Jyr arqaýy - jańǵyrý» atty respýblıkalyq aqyndar aıtysy ótti. Táýelsizdik kúnine arnalǵan aıtysta «Altyn dombyra» ıesi anyqtaldy, dep habarlaıdy Qamshy.kz aqparat agenttigi QazAqparatqa silteme jasaı otyryp.
Búgin Aqtóbede respýblıkalyq aqyndar aıtysy ótti. Barlyǵy 5 jup alty saǵat boıy aqtóbelikterdi jyrǵa bólep, el ishindegi ózekti máselerdi qozǵady. Aqyndar til, ulttyq rýh pen el bolashaǵy týraly jyrlady. Qyz ben jigit aıtysynda ádemi ázil aıtyldy.
Aqtyq synǵa Sara Toqtamys pen Jandarbek Bulǵaqov, Jarqynbek Naýshabek pen Syrym Áýesqan, Aınur Tursynbaeva men Áset Dúısebaev shyqty. «Aıtys - qazaq halqyna ǵana tán uly óner. Jigitti talantyna saı tústegen aqyndar aıtysy óte tartysty ótti. Eshkim eshkimnen kem emes»,- dedi Qazaqstannyń halyq aqyny, qazylar alqasynyń tóraǵasy Qonysbaı Ábil.
Keıin júldegerler anyqtaldy. Qazylar alqasynyń sheshimimen Danıar Aldabergenov, Qýanysh Sharmanov, Mýradym Erlanov jáne Saǵadat Nurmanovqa alǵys hat pen 350 myń teńge aqshalaı syılyqpen marapattaldy. İİİ oryn Aınur Tursynbaeva, Sara Toqtamys jáne Áset Dúısebaevqa buıyrdy. Olar 750 myń teńge kólemindegi syılyqqa ıe boldy. Ekinshi oryndy Jarqynbek Naýshabekov aldy. Oǵan 1 mıllıon teńge qarjylaı syılyq berildi. Birinshi oryn alǵan Syrym Áýesqanǵa 2 mln teńgelik syılyq tabystaldy. Al bas júldege tigilgen 3 mıllıon teńge men «Altyn dombyrany» Jandarbek Bulǵaqov jeńip aldy.
«Aqtóbelikter alty saǵat boıy aıtys tyńdap, tapjylmaı qurmet kórsetti. Aqyndarymyz ónerlerin aıap qalǵan joq. Aıbynymyzdy asyrdy, rýhymyzdy tasytty. Bárimiz shabyttanyp otyrmyz»,- dedi Mádenıet jáne sport mınıstrligi Tilderdi damytý jáne qoǵamdyq saıası jumys komıtetiniń tóraǵasy Qýat Borash.
