QR Mádenıet jáne sport mınıstrliginiń qoldaýymen «Qazaqkonsert» memlekettik konserttik uıymynyń «Astana Musical» teatry elimizdiń rýhanı qundylyqtaryna aınalǵan halyq ánderi men halyq kompozıtorlarynyń shyǵarmalary, ulttyq opera men klasıkalyq mýzykanyń injý-marjandary negizinde dala teatrynyń elementterin paıdalana otyryp «Uly Dala teatry» ataýymen «Qyz Jibek»  etno-folklorlyq múzıkli Astana jurtshylyǵynyń nazaryna usynylady dep habarlaıdy Qamshy.kz aqparat agenttigi. 

Eýropalyqtardy tánti etken múzıkl 16-17 jeltoqsan kúnderi Astana qalasynda qoıylyp, Táýelsizdik merekesine oraı Elorda turǵyndary men qonaqtaryna erekshe tartý bolmaq.

Qoıýshy-rejısseri jáne joba avtory – «Astana Musical» teatrynyń kórkemdik jetekshisi, «Qazaqkonsert» MKU dırektory, Qazaqstannyń eńbek sińirgen qaıratkeri Asqat Maemırov.  Sonymen qatar, qoıylym barysynda «Astana sazy» etno-folklorlyq ansambli óner kórsetedi.

Ǵasyrlar qoınaýynan syr shertetin «Qyz Jibek» qazaqtyń lıro-epostyq jyrynyń jaýhary. Tragedıa keıipkerleri Jibek pen Tólegen álemge áıgili Romeo men Djýlettadaı qazaq halqy úshin mahabbattyń sımvoly ispettes. Oqıǵalar negizinen jas batyr Tólegen, Qyz Jibek jáne el arasynda erjúrektigimen, kúsh-qaıratymen aty shyqqan batyr Bekejan arasyndaǵy qarym-qatynastar tóńireginde órbıdi de, aqyry Tólegen qyzǵanyshtyń qurbany bolady. Súıgeninsiz Jibekke de ómir joq...  El birligi men tutastyǵy ıdeıasy qatar órilip, halyqtyń oı-armany men ańsary tanylatyn, boıaýy jarqyn  qoıylymda ulttyń ómiri men tyǵyz baılanysty dástúrler de  - bata sóz, qarǵys, joqtaý, zar, kóńil aıtý, qoshtasý jáne t.b. – jaqsy kórinis tapqan. Jibek beınesi - sulýlyq pen ásemdiktiń nyshany, qazaq halqynyń maqtanyshy, rýhanı eskertkish. Dala teatrynyń negizinde sahnalanǵan «Uly dala teatry» etno-folklerlik múzıklinen kórermen qazaq halqynyń  ulttyq dástúrimen etene tanysýǵa múmkindik alady. Sondaı-aq, spektáklde qos aqynnyń sóz tartysy, oı qaqtyǵysymen qatar sýyrypsalmalyq qabyletin dáripteıtin qazaqtyń ulttyq óneri aqyndar aıtysy oryn alǵan.