Jaınamaz ústinde ótirik sájdege bas ıgen bop, kózdi ala bere meshitte urlyq jasaıtyndar sany tyıylar emes. Keshe ǵana Elordadaǵy qulshylyq úıine namaz oqýǵa kelgen azamat uıaly telefony men syrt kıiminen aırylyp qalǵan. Aıazdy kúnde kúrtesiz qalǵan jigit polısıaǵa habar beripti. Meshit qyzmetkerleri qaýipsizdikti kúsheıttik degenine qaramastan, keıbir ákki urylar kamera turǵan oryndarǵa túspeı izin sýytyp ketetinin aıtady. Jalpy búginde bótenniń múlkin urlaý úlken máselege aınalǵany belgili. Degenmen adamnyń Allanyń úıinde bassyzdyq jasaýǵa ne ıtermeleıdi?
Buryndary «Meshitke baryp aıaqkıim jańartyp qaıtý kerek edi» degen qaǵytpa bolýshy edi. Biraq bul búginginiń shyndyǵy bolyp turǵany ókinishti. Jaqynda ǵana osy meshitke qulshylyqqa jigit syrt kıimi men uıaly telefonynan aırylyp qaldy. Uryny ustaý úshin beınekameradaǵy jazbany qaraǵan polıseıler ony kóp uzamaı qolǵa túsirgen.
Sońynan bul is sotqa deıin jetipti. Biraq júreginde ımany bar jigit, óziniń múlkin qoldy etken baýkespege keshirim bergen.
«Keshire beredi eken dep ary qaraı qylmysker adam óz isin jalǵastyra berýine bolmaıdy. Polısıa qyzmetkerleri ary qaraı onyń basqa da qylmystarǵa qatysy bar ma, joq pa ekenin anyqtap jatqan jaǵdaıda, basqa qoǵamdyq jerlerde osyndaı qylmysqa barǵan jaǵdaıda, jaýapqa tartylýy tıis» - deıdi «Nur Astana» ortalyq meshitiniń naıb ımamy Nurlan Ramazanov.
Al myna beınekadrler osy kúzde Túrkistan qalasyndaǵy meshitterdiń birinde túsirilgen. Onda tepse temir úzetin jigit, sadaqqa jáshigin jalań qolmen ashqysy kelgen kórindi. Biraq onysynan túk shyqpaǵan soń, syrttan temir zat alyp kelip, áýrege túsedi.
Al myna kadrlarda qulshylyq ornyna kelgen baýkespe áýeli jan-jaǵyna asyqpaı qarap tur. Sońynan kisi aıaǵy azaıǵan kezde bógde adamnyń kıiminen ámıannyn alyp, qasha jóneledi.
Al Almaty qalasyndaǵy meshitte urlyq ústinde qolǵa túsken suǵanaqty ımamdardyń ózi qolǵa túsirip, beınekamera aldynda qylmysyn moıyndattyrǵan. Qadrdan jas jigittiń qoldy bolǵan gadjetti kilemniń astynan jaıbaraqat alyp, ústeldiń ústine qoıǵanyn kórýge bolady. Júzinde «uıat boldy-aý»degen oıdyń ushqyny da joq. Jalpy mundaı suǵanaq qoldylardyń jer betindegi eń qasıetti jerde de taısalmaýyna ne sebep? Taıaýda ǵana elimizdiń burynǵy bas prokýrory, qazirgi joǵarǵy sot tóraǵasy Jaqyp Asanov olar óziniń qolǵa túspeıtinin jaqsy biletinin aıtqan edi.
«Biz ylǵı jaqsy kóremiz ǵoı, saqtyqta qorlyq joq dep aıtýdy. Onyń bári qazir eskirdi. Qazir degen urylar, burynǵydaı emes, óte qý. Olardyń qýlyqtary kóp. Jalpy halyq quqyq qorǵaý organdaryna senbeıdi. Óıtkeni tirkelgen urlyqtardyń 70 paıyzy jyl saıyn ashylmaı qalyp jatady» - QR burynǵy bas prokýrory Jaqyp Asanov.
Imamdardyń aıtýynsha, urlyq-qarlyq kóbine juma namazy sekildi, jurttyń qarasy qalyń kezderde bolady eken. Keıbir ákkiler kamera turǵan oryndardy bes saýsaǵyndaı jattap alǵan. Ol jerlerden júzin kórsetpeı óte shyǵady. Degenmen meshit qyzmetkerleri urlyqshy isin adamnan jasyrǵanmen, Alladan jasyra almaıtynyn aıtady.
«Urlyqshyǵa aıtarymyz, bul sharıǵatta durys emes. Urlyqtyń dinimizde eń úlken kúná ekenin eskertemiz. Sebebi paıǵambarymyzdyń hadısinde aıtady: Musylmannyń ary, onyń namysy, onyń mal-dúnıesi kelesi bir musylmanǵa ara delingen. Qurannyń aıattarynda da, urlyqtyń eń úlken kúnániń qatarynda ekenin eskertedi» - deıdi «Nur Astana» ortalyq meshitiniń naıb ımamy Nurlan Ramazanov.
Meshit qyzmetkerleri urylardyń ımandylyqtyń uıasy sanalatyn jerde de áreket etýi azamattardyń qulshylyq ornyna aıaǵyn ańdap basatyn halge jetkizdi deıdi. Degenmen mamandar qıamet kúni barlyq qylmystyń, jasyrylǵan jymysqy áreketterdiń beti ashylyp, kúnáliler jazalanatynyn aıtady. Ol kúni eshkim eshteńe de jasyra almaıdy.
Gúlnur Jaqsylyqova
