Memleket basshysy Nursultan Nazarbaev Qazaqstan halqyna arnaǵan Joldaýynda memlekettiń básekelestik jaǵdaıda damý qarqynyn údetý qajettigin jetkizdi. Sondyqtan memleket damýy úshin 10 baǵytty júzege asyrý qajet bolyp otyr. Bul týraly QR Parlamenti Májilisiniń depýtaty, Halyq Qaharmany, general-leıtenant Baqytjan Ertaev aıtty, dep habarlaıdy Qamshy.kz aqparat agenttigi Baq.kz-ke silteme berip.

«Negizgi on baǵyt naqtylanǵan Prezıdent Nursultan Nazarbaev Joldaýynyń eń basty ıdeıasy da osynda. Baǵamdap qarasańyz, dúnıejúziniń órkenıetti elderiniń jańartylǵan energıa kózderin, ıaǵnı, balamaly qýat kózin ıgerýge kóship ketýiniń astarynda úlken mán jatyr. Ásirese, Japonıa, Ońtústik Koreıa, Germanıa, AQSH elderinde bul úrdistiń aıryqsha jolǵa qoıylǵany da nazar aýdararlyq jaǵdaı. «Jasyl ekonomıkaǵa» kóshý jolyndaǵy qadamdar bizdiń Qazaqstanda da baıqalyp otyr. Ótken jyly ǵana álemniń 119 eli men 22 halyqaralyq uıymynyń ǵylymı qaýymdastyǵymen birge, tórt mıllıonǵa jýyq adamdy ortaq alańda toǵystyrǵan EHRO–2017 kórmesi «jasyl» tehnologıalardyń otandyq ekonomıkaǵa ený prosesin odan ári jetildire tústi. Munyń barlyǵy saıyp kelgende, tabıǵı resýrstarǵa degen ǵalamdyq deńgeıdegi muqtajdyq siz ben biz ómir súrip otyrǵan HHİ ǵasyrda aıqyn sezilip otyrǵanyn kórsetedi. Sondyqtan, Joldaýdaǵy resýrstyq áleýetti odan ári damytý taqyrybyn eń ózekti baǵyt retinde ataǵan bolar edim», - deıdi Májilis depýtaty.

Onyń aıtýynsha, aldymyzda Qazaqstandaǵy balamaly qýat úlesin 30 paıyzǵa jetkizý mindeti tur.

«Resmı derekterde dúnıejúzi boıynsha óndiriletin elektr energıasynyń tórtten biri jańartylǵan qýat kózderine tıesili ekendigi anyq aıtylyp júr. Ǵalymdardyń boljamy boıynsha, 2050 jylǵa qaraı bul kórsetkish 80 paıyzǵa deıin jetedi. Qazir elimizde jalpy qýattylyǵy 336 MVt bolatyn jańartylatyn energıa kózderiniń 55 nysany jumys istep tur. Endi on jyldan keıin elimizdegi balamaly qýat úlesin 30 paıyzǵa jetkizý mindetin de qoıyp otyrmyz. Saıyp kelgende bul sharalar qorshaǵan ortany qorǵaýǵa, ekologıalyq tazalyqty qamtamasyz etýge yqpal eteri sózsiz. Demek, «jasyl» tehnologıalarǵa baǵyttalǵan ǵylymı jańalyqtardyń óndiriske ený prosesi kezek kúttirmeıtin negizgi qadamdar qatarynda bolýy tıis», - dep atap ótti Baqytjan Ertaev.