1979 jyl. Mekke. 20 qarasha kúni 400-450 muzdaı qarýlanǵan adam qasıetti Ál-Haram meshitine basyp kirip, syıynyp jatqan adamdarǵa oq jaýdyra jóneledi. Sol sátte qasıetti Qaǵba mańynda shamamen 9 myń adam bolǵan edi. Júz shaqtysy ólip, 3 myńy qashyp shyqqanymen, 6 myńdaı beıbit turǵyndy sodyrlar kepilge alady. Bul oqıǵa kúlli álemdi dúr silkindiredi. Óıtkeni musylmandar úshin qasıetti sanalatyn Mekkege shabýyl jasap, qasıetti Qaǵbany qyzyl qanǵa boıaǵandardyń ózi teris aǵymdaǵy musylmandar edi. Shabýyldy «Ál-Masdjıd Ál-Haram» uıymynyń basshysy Muhammed Ál-kahtanı uıymdastyrǵan bolatyn. Sol kúni tek qana Mekkede emes, Taıf, Tabýk aýdandarynda da jarylystar oryn alyp, tipti Haled sultannyń saraıynyń aldynda bomba ornatylǵan kólik jarylady. Ál-Kahtanı ózin «Mahdı», - dep jarıalaıdy. 6 myń tutqyndy meshittiń jertólesinde kepildikte ustap, bılik tarapynan qarsy jaýapty kútedi. Árıne, bılik sol kúni-aq arnaıy jasaqty shabýylǵa tastaıdy. Biraq odan túk shyqpaı, arnaıy jasaq 40 mınýtta qyrylyp qalady. Óıtkeni sodarlardyń qolynda pýlemet, granata, PTÝR-ge deıin bar edi.
Kelesi kúni Saýdıa 12 BTR men 5 tikushaq jáne 3000 arnaıy jasaqty meshitti azat etýge jiberedi. Eki saǵatqa sozylǵan shaıqas kezinde 3 BTR men 1 tikushaqtyń kózi joıylyp, shabýyl taǵy nátıjesiz aıaqtalady.
Amaly taýsylǵan Saýdıa Fransıaǵa qońyraý shalyp, kómek suraıdy. Fransıa prezıdenti Jıskar Desten «GIGN» antıterrorlyq jasaq basshysy Barrıldi Mekkege qupıa túrde jiberedi.
Barrıl óz adamdarynyń meshitti bir barlap shyǵýyn suraǵan sátte, máseleniń kókesi bastalady: «Musylman emesterge meshitke jaqyndamaq túgeli, Mekkege kirýge bolmaıdy» degen saýdıalyqtar jaýabyn estıdi. Ózderi kómek surap, ózderi ony tıimdi atqarýǵa kedergi bolýy aqylǵa syıymsyz edi. Biraq Saýdıa jasaqtarynń qolynan túk kelmeıtinin kórgen sultan Haled «fransýzdar ne aıtsa, sony isteńder», - dep qysqa qaıyrady.
Aqyry meshitti baqylap, sodyrlar men tutqyndardyń sanyn bilgennen keıin, Barrıl Fransıadan 3 tonna SB gazyn, 200 protıvogaz ben 50 kg jarylǵysh aldyrady. Bir apta boıy túrli shabýyl senarıin jasaǵan fransýzdar, aqyry 4 jeltoqsanda, 200 Pákistannan kelgen arnaıy jasaq, 500 saýdıa arnaıy jasaǵy jáne 60 fransýz jasaǵynyń kómegimen meshitti shabýyldaıdy. Tańǵy saǵat 9:00-de bastalǵan azat etý operasıasy 14:00-de aıaqtalady.
Shabýyl barysynda 2 tonna gaz qoldanylady. Arnaıy jasaqtan 95 adam opat bolǵan. Al sodyrlardan tek qana 68 tirideı qolǵa túsedi. Tutqyndardyń 150-200 (keı derekte 450-500) qaza tapqan. Qolǵa túsken fanatıkter ózderinń áreketterin durys sanap, qylmystary úshin ókinbeıtinderin tergeý barysynda negizdeıdi. Keıinnen barlyǵynyń ortalyq alańda bastary shabylady.
Fransýz gazetteri bul oqıǵadan keıin «Qaǵbanyń qanyn bir apta jýdy», «Musylman musylmandy óltirdi», «Islamdaǵy qasıetti meshitti nege musylmandar basyp aldy?» degen saryndaǵy maqalalardy qarsha boratady.
Rasymen, nege? Jaýap bireý. Teris aǵymdaǵy dinı kózqarastaǵylar úshin tipti qasıetti Mekke de, qadirli Qaǵba da túkke turmaıdy. Olar ózderiniń teris dinı kózqarasyn arttyrý ári moıyndatý úshin nege bolsa da barýǵa daıyn. Mekkeni atqylaǵandar, Qazaqstandy aıasyn ba?! Sondyqtan destrýktıvti dinı aǵymdardan barynsha saq bolǵan abzal jáne olarmen kúresti barynsha kúsheıtý kerek. Qatańdatý kerek. Sýrette sol oqıǵanyń kórinisteri.
Asqat Qasenǵalıdiń feısbýk paraqshasynan alyndy
