feleton

Keıingi kezde Buǵybaı aqyn qatty ózgerip júr. Qashan kórseń de basyn qaltyldatyp keremet keńsege qaraı ketip bara jatady.

Buǵybaıdyń alańǵasarlyǵy ǵana báz baıaǵy qalpy. Al tóbesine úıilip qala beretin bir ýys jıren shashyna eptep taraqtyń tisi tıip, jeıdesiniń jaǵasy útikteletin bolypty. Óleń oqyǵanda mańyraǵan qoıdikindeı sarǵaıyp astyńǵy tisteri ǵana kórinetin. Shıkil sary óńi narttaı bolyp qyzaryp shyǵa kelýshi edi. Qazir kesip jiberseń de qan shyqpaıtyn sıaqty topyraqbettenip turady. Aýyzdyń astyńǵy súıekteri de sál aǵarańdaıtyndaı ma, qalaı?.. «Kúnde «Kolgeıtpen» jýady» deıdi, qasynda otyrsa otyryp, tursa turyp, onyń kóleńkesindeı keıipke aınalyp ketken altyn tisti Myrzaqul.

Nege búıte qalǵan desem, bul Buǵybaıym álgi keremet keńse ishinde irkildep otyrǵan irilerdiń ústinen qaraıtyn bir sheneýnikke oda arnaǵan eken ǵoı! Qyzdy-qyzdymen arasynda «bul qazaq endi sizdeı ul týmaıdy» dep soǵyp jiberipti. Keıipkeri túbinde bir Allanyń ámirine moıynsunsa, sonymen birge tutas ult joıylyp ketetindeı qınalǵan sıqy ǵoı. Qaıtsin-aı, baıǵus!.. Al anaý irkit bóshkesindeı nemeler onysyn «artyq árpi joq pa eken?..» degen kúdik-kúmánmen jalpaqtaǵan jandaıshaptaryna qaıta-qaıta oqytyp, óz tilindegi mazmunyn aýdarma arqyly áreń uǵyp-bilip otyratyn kórinedi. «Nıche, gozgazettegi statálar. Sony netip... bylaı... ný, stıh ete salǵan. Poıdet» depti aqyr sońynda bilgishteý bireýi. Eki júz shýmaq odanyń rasynda da maqalalar jıyntyǵy ekenin qaıdan seze qoıǵan deseńshi, sabazyń!

Sonymen ne kerek, Buǵybaı ózgerdi. Ózgergenin kóz kórdi. Buryn kóshede túk túsinbeıtin qańǵybasqa eńireýik óleńderin ekilene oqyp, stýdent qyzdar jataqhanasynyń tusynda táltirektep júrgen kezderin umytqan. «Buǵybaıdyń odasy» deseń-aq boldy osy kúni, birinshi synyp oqýshysy da jatqa soǵyp beredi. Hıt! Onyń aldynda Nápsibek degen shal da birdeńe shatpaqtap júretin. Ózinen iri kisilerdi tal-terekke teńep. Ondaı oda «moda» emes qazir. Endi Buǵybaı bastaǵan jas býyn kele jatyr. Biraq, solardyń Búırekbaı atty bireýiniń «Ata qaz» degen odasy shıkileý shyǵypty. Nıche, gosgazetti bir-eki paraqtap jiberse, ol da odashylyq dástúr boıynsha Buǵybaı aǵasynan qalysa qoıaıyn dep turǵan joq. Odan keıin aıaq astynan Maltabek degen ásirebelsendi paıda bola ketip, ol bir kisiniń ózimen shektelmeı, báıbishesine, tipti, bala-shaǵasyna deıin jeke-jeke toqtalyp kórdi. Biraq, onyń odasyna oqyrmandar onsha mán bermeı, «Maltabek maltasyn ezip júr» dedi de qoıdy. Al keıipkerleri oqymady ma, álde, oqyp alyp yńǵaısyzdandy ma... áıteýir, eshqaısysy turaqty avtorlaryna resmı alǵys bildirmedi. Áıtpese, ol beıbaq toqaldardan basqa taqyryp qaldyrmaǵan bolatyn. Olardy jazýǵa uıalsa da úı almapty. Endi oppozısıoner bolyp ketýi múmkin.

Já, qazir Buǵybaı ne jazyp jatyr eken? Kórinbeı ketken túri jaman...

Erkeǵalı BOLATULY