Qoǵam qaıratkeri, "Úı" qaıyrymdylyq qorynyń jetekshisi Arýjan Saın Facebook paraqshasynda 2011 jyly týǵan Aına esimdi qyzǵa qatysty málimet jarıalady, dep jazady Qamshy.kz aqparat agenttigi. 

"2016 jyldyń basynda qorǵa 2011 jyly týǵan Aına degen qyzdyń ákesi kómek surap keldi. Ol óńeshi kúıgen qyzyn shetelge emdelýge jiberýdi ótindi. Qor tártibi boıynsha balanyń ata-anasynan alynǵan barlyq medısınalyq jazbany túrli klınıkalarǵa joldadyq. Sonymen qatar úndistandyq «Fortıs» halyqaralyq klınıkalar jelisine qarasty Anna Verbınanyń «MedIndıa» bólimshesine jiberdik.

«MedIndıa» qyzmetkerleri bizdiń jibergen medısınalyq kóshirmelerimizdi kórip, jaǵasyn ustady. Biz qazaqstandyq dárigerlermen de sóılestik. Olar da sheteldik áriptesteriniń qorytyndysyn rastap otyr. Qorytyndyǵa sáıkes, jaraqattar ólimge alyp kelýi múmkin edi.

- 2012 jyldyń maýsym aıynda Aına bassúıek-mı jaraqatyn alǵan. Balanyń ózi qulap, mundaı jaraqat alýy ekitalaı.

- 2013 jyldyń qańtar aıynda (jasy bir jarymda edi) qyzdyń eńbeginen ıne tabylǵan.

- 2013 jyldyń mamyr aıynda (ekige de tolmaǵan) qyz ýly suıyqtyq ishken. Ádette balalar kezdeısoq sirke sýy nemese sirke qyshqylyn iship qoıǵanda jaman dámdi sezgennen keıin túkirip tastaıdy. Al Aınanyń óńeshinen bastap asqazyna deıin kúıgen. Mundaı jaǵdaı tek ol suıyqtyqty balaǵa májbúrlep ishkizgende ǵana bolady.

Sodan beri Aına óz betimen tamaqtana almaıdy. Tek zond arqyly ǵana belgili bir suıyq tamaqtardy ishedi. Bes jasynda qyzdyń salmaǵy segiz keliden sál ǵana asatyn.

- 2014 jyldyń sáýir aıynda (jasy – 2 jas 8 aı) qyzdyń arqasyna, kókirek tusyna ıne suǵylǵan. Onyń biri júregine jáne omyrtqasyna bir mıllımetr ǵana jetpeı qalǵan. Keıbir ınelerdi shyǵarý múmkin bolmady.

Qyzdy otbasyndaǵy bireý óltirgisi kelip júrgeni anyq bolǵandyqtan, barlyq jaǵdaıdy baıandap, Bas prokýratýraǵa hat jiberdik.

Biz qyzǵa kómektesýge tyrystyq. Balany Almatydaǵy Pedıatrıa jáne balalar hırýrgıasy ǵylymı ortalyǵyna jatqyzýdy talap ettik. Odan keıin «Fortıske» (Úndistan) jiberdik. Onda qyzdyń ákesi emnen bas tartyp, Qazaqstanǵa qaıtyp keldi.

Bas prokýratýra bizdiń shaǵymymyzdy OQO prokýratýrasyna jiberdi.

Biz óz hatymyzda myna máselelerdi kóterdik:

1. Balany otbasynan shuǵyl túrde oqshaýlaý. Qyzdyń mundaı kúıge túskenine ákesi de kináli bolýy múmkin nemese otbasynyń bir múshesin qorǵashtap júrgen bolýy ábden múmkin. Sol úshin quqyqqorǵaý organdaryna shaǵymdanbaı otyr.
2. Balanyń densaýlyǵyna júıeli túrde zaqym keltirilse de, aýdandyq aýrýhana, densaýlyq saqtaý departamenti, aýdan men oblystaǵy qamqorshylyq organdary jáne polısıa qajetti sharany qolǵa almady. Balaǵa qatysty barlyq jaǵdaıdy anyqtaıtyn tekserý jumystary júrgiziletinin bilse, otbasy qylmystyń izin jasyrý úshin qyzǵa zardabyn tıgizýi múmkin. Bala iz-túzssiz joǵalyp ketýi múmkin nemese órt bolyp, barlyq dáıek joıylýy múmkin. Al jergilikti organdary ýaqytty sozyp, bala qaýipti jaǵdaıda qalýy yqtımal.
3. Balany shuǵyl túrde Almatydaǵy Pedıatrıa jáne balalar hırýrgıasy ǵylymı ortalyǵyna jatqyzý qajet. Onda Aınanyń densaýlyǵyn qalpyna keltiriledi. Bizdiń qor qyzdy shetelge emdelýge jiberýge ázir.
4. Balanyń densaýlyǵyna zaqym keltirý jáne ómirine qaýip tóndirý boıynsha tergeý jumystaryn júrgizý úshin shara qoldaný qajet. Eger otbasy balaǵa qaýip tóndiretin bolsa, ata-anasynyń qyzdy kórýine shekteý qoıyp, odan keıin ata-ana quqyǵynan aıyryp, kinálilerdi jaýapqa tartý kerek.
5. Tergeý jumystaryn júrgizip, qyzdyń densaýlyǵyna zardap tıgizgenin jáne denesindegi ıneni kóre tura quqyqqorǵaý organdaryna shaǵymdanbaı, balanyń densaýlyǵy men ómirin qorǵaý úshin qajetti shara qoldanbaı, qyzdyń densaýlyǵyna odan da qatty zaqym kelýine jáne ómirine qaýip tónýine jol bergen medısınalyq mekemelerge jáne memlekettik organdarǵa qatysty tıisti sharalardy qoldaný. Jergilikti mekemelerdiń, densaýlyq saqtaý departamenti men qamqorshylyq organdarynyń balaǵa qaýip tóngenin túsinbeýi múmkin emes edi.

Bas prokýratýraǵa alǵashqy hat 2016 jyly qańtarda jiberildi. Dál sol jyldyń sáýir aıynda bizdiń keńsege kelgen Bala quqyqtary jónindegi ýákil Zaǵıpa Bálıevaǵa hatty berip jiberdik.

2017 jyldyń aqpan aıynda bas prokýrordyń orynbasary Andreı Kravchenkomen kezdesý barysynda jańadan jazylǵan hatty jańa taǵaıyndalǵan bas prokýror Jaqyp Asanovqa berip jiberdik.

Áli kúnge deıin Bas prokýratýradan Aınanyń jaǵdaıyna qatysty jaýap almadyq. Bizdiń shaǵymymyz Bas prokýratýraǵa emes, kámeletke tolmaǵan balalardyń quqyǵyn qorǵaý bólimine barady. Atalǵan bólimniń qyzmetkerlerine biz senimsizdik tanytyp otyrmyz. Sebebi bizdiń shaǵymymyzǵa qatysty (shamamen 2014 jyldan bastap) birde-bir jaǵdaı sońyna deıin jetkizilmegen. Bas prokýrorlar aýysyp turady. Al ol jerde burynǵy adamdar otyr. Telefon arqyly sóıleskende baıaǵy bir jaýapty estımiz. «Sizderge jaýap kelmeýi múmkin emes». Keshirińiz, biraq másele jaýapta emes, balalardyń qıyn jaǵdaıda qalǵanynda jáne olarǵa eshkimniń kómektespeı jatqanynda!

2017 jyldyń aqpan aıynda osy is tapsyrylǵan OQO-daǵy tergeýshimen sóılestim. Onyń esimi – Tofık. Ol qylmysty eshkim moıyndamaıtynyn aıtyp, menen ne qalaıtynymdy surady. Biz barlyǵy zań boıynsha bolǵanyn qalaımyz. Balanyń endigi joly tiri qalýy ekitalaı ekenin jáne qyzdy mundaı jaǵdaıǵa kimniń jetkizip otyrǵanyn anyqtaý óte qıyn ekenin jetkizdim.

Bizdiń prokýratýraǵa shaǵymdanǵanymyzdy estigen qyzdyń ákesi qatty ashýlandy. Hatty qaıtaryp alýdy talap etti.

Ol qyzdy emdeý úshin bárin istep jatqanyn jáne qyzǵa mundaı zaqymdy kim keltirgenin bilmeıtinin aıtady. Qyzdyń anasy bul otbasyda eshteńeni sheshpeıtin sekildi.

Áli kúnge deıin qyz týraly eshqandaı aqparat bilmeımiz. Tiri me, álde óli me, habarymyz joq. Qyzdyń ákesi telefon nómirin aýystyrǵan sekildi.

Qyzǵa qalaı kómektesý keregin bilmeımiz. Bul ispen quzyrly organdar aınalysýǵa tıis.

Dárigerler Aınanikindeı jaraqat alǵan balalardy kórgende birden polısıaǵa habarlasýy qajet edi.

Polısıa qylmystyq is qozǵap, qylmyskerdi tabady.

Prokýratýra balanyń quqyǵyn qorǵalýyn baqylaıdy.

Sot kúdiktiniń kináli nemese kináli emes ekenin anyqtap, jaza taǵaıyndaıdy.

Biraq munyń biri de bolmady. Tergeýshiniń esimi – Tofık. Múmkin dál osy tergeýshi Abaıdaǵy balaǵa qatysty isti júrgizgen shyǵar.

Qyzǵa qatysty iste eshqandaı shý bolmaǵandyqtan, Abaı aýylynyń 7 jastaǵy turǵynyna da nemquraıly qaraǵan shyǵar? Múmkin tek bul balalarǵa ǵana qatysty emes shyǵar.

Osy jazbany jazyp otyrǵan ýaqytta Qurmanǵazy Mýsirden qyzǵa baılanysty isti júrgizgen tergeýshi men álgi Tofıktiń nomeri birdeı degen aqparat keldi", dep jazdy Arýjan Saın.