Almatyda Eýrazıalyq medıa forým barysynda QR Syrtqy ister mınıstri Qaırat Ábdirahmanov Sırıa daǵdarysyn retteýdegi Astana prosesiniń róli týraly aıtty, dep jazady Qamshy.kz
Mınıstr Astana prosesiniń birigeıligi retinde kelissózderge Reseı, Iran, Túrkıa sıaqty múddeli elderdiń qatysyp jatqanyn atap ótti.
«Nursultan Nazarbaevtyń tóraǵalyǵymen Astana prosesi múddeli taraptarmen qatar Sırıalyq opozısıany da qabyldap, olardyń arasynda kelisim júrgizýge tyrysyp jatyr. Bul taraptardyń kózqarastary bir-birine qarama-qaıshy. Astana prosesi kezinde opozısıalyq tarap zaldan shyǵyp ketkenin de aıtýǵa bolady. Keıin olar Nursultan Nazarbaevty qurmettegendikten jáne Qazaqstannyń osy prosestegi ashyq ári aıqyn beıtaraptyǵy úshin ǵana zalǵa kiretindigin málim etti», - dedi Q.Ábdirahmanov.
Astanada jasalǵan kelisim Sırıa daǵdarysyn sheshýge, shıelenis jalynyn aazaıtýǵa baǵyttalǵan.
Onyń aıtýynsha, bul Qazaqstannyń Eýropa men Azıa arasyndaǵy altyn kópir ekendigin dáleldese kerek.
«Qazir álemde qandaı jaǵdaıdy kórip otyrmyz? Elderdiń arasyndaǵy saıası, áskerı, ekonomıkalyq báseke beleń alyp barady. Bizdi halyqaralyq dıplomatıalyq mádenıettiń toqyrap bara jatqandyǵy alańdatady. Soǵan qaramastan Qazaqstan dostyq pen birliktiń, yntymaqtastyqtyń úlgisin kórsetip otyr», - dedi Qaırat Ábdirahmanov.
QR syrtqy ister mınıstri Qaırat Ábdirahmanov myrza forýmnyń birinshi májilisinde: "Qazaqstannyń ashyqtyǵy aqparat salasyndaǵy keıbir máselelerge tótep berip, týrbýlenttik pen boljamsyzdyqtyń artýy buqaralyq aqparat quraldaryna molynan múmkindik beretinin" aıta ketti. Ortalyq Azıa men Qazaqstannyń tynyshtyǵyna álem buqaralyq aqparat quraldary qyzyǵa qaraıtynyn, elbasymyz Nursultan Nazarbaevtyń syndarly saıasatynyń áseri ekenin de Qaırat Ábdirahmanov myrza aıtty.
Aıta ketý kerek, Almatyda Ortalyq Azıadaǵy táýelsiz dıalog alańy atalǵan Eýrazıa medıa forýmyna 60-tan astam elden 500 delegat qatysýda. Alqaly jıynda sarapshylar men saıasatkerler, ekonomıser men qoǵamdyq pikir ıeleri Qazaqstannyń, Eýrazıanyń, jalpy álemdik qaýymdastyqtyń ekonomıkalyq, geosaıası, mádenı-áleýmettik máselelerin talqylaıdy. Forýmnyń alǵashqy kúni sheberlik dáristerinen bastaldy.
Forým sheńberinde jaqyn jáne alys sheteldik, álemdik deńgeıdegi medıa sarapshylar, osy zamanǵy kókeıkesti máseleler jóninde taqyryptyq dáristerin oqydy. Atap aıtar bolsaq: "Mobıldik jýrnalısıkadan áleýmettik vırtýaldy shyndyqqa deıin", "Qaýipti aımaqtan reportaj jasaý", "Oqshaý Buqaralyq medıa. Sandyq dáýirdegi konvergenttik jýrnalısıka", "Jańalyqtar áleminiń keleshegi", "BAQ-tyń genderlik tepe-teńdigi", "Medıa evolúsıasy: blog salasynyń órkendeýi qaýip pe, álde progres pe?" sekildi taqyryptarda dárister oqyldy. Elimizdegi jýrnalısıka, medıa salasyna qadam basyp kele jatqan jastarymyzǵa tegin dáristerdi álemge belgili Iýsýf Omar, Tıra Shýbart, Ivona Raıhardt, Raıan Smıt, Gızem Iarbıl Gúrol syndy tulǵalar oqydy.
