Oblys ákimi Altaı Kólginovtiń aýdandarǵa sapary jalǵasyp jatyr, dep habarlaıdy Qamshy.kz aqparat agenttigi. Osy aptada bastalǵan aýdandarǵa sapary aıasynda ol Jańaqala jáne Jánibek, Bókeı ordasy aýdandaryna bardy. Ákimniń Qaztalov aýdanyna sapary aýdan ortalyǵyndaǵy saz mektebiniń qurylys jumystarymen tanysýdan bastaldy.
Nomınaldyq qýaty 24 oqýshyǵa arnalǵan saz mektebiniń jobalyq quny 87 mln.615,9 myń teńge. Bul jobaǵa oblystyq búdjet esebinen ázirge 44 mln.500 myń teńge bólinip, qurylys jumystaryn «JolaýshyJol» JSHS júrgizýde. Aldaǵy ýaqytta saz mektebinde bı, mýzykalyq aspattardy úıretý synyptary, konserttik zaly, garderob, sanıtarlyq toraby iske qosylady dep josparlanýda.
Qurylys nysanyn aralap kórgen oblys ákimi, aýyl aqsaqaldary, máslıhat depýtattary jáne qoǵamdyq uıym ókilderimen kezdesti. Kezdesýde oblys ákimi: Qaztalov aýdanynda aýqymdy jobalar júzege asýda. Ózderińiz kórip otyrǵandaı, Jalpaqtaldan asqan qatqyl tabandy jol aýdan ortalyǵyna 35 shaqyrym qaldy. Ol joldyń da qurylysy bastalyp ketti. Aldaǵy ýaqytta ortalyqtaryńyzǵa kelip jetedi. Sonymen qatar bıylǵy jyly aýdandaryńyzda 13 eldi mekendi kógildir otynǵa qosý jumystaryn bastap jatyrmyz. Sonyń syrtynda Qaztalov, Jalpaqtal aýyldarynyń ishki joldaryn jasaýdy da qolǵa alynýda. Budan basqa turǵyn úı qurylysy da bar,- dedi.
Kezdesý barysynda Qaztalov aýdanynyń ákimi Abat Shynybekov aýdanymyzda atqarylyp jatqan jumystar týraly áńgimelep berse, aýyl aqsaqaldary osyndaı jumystar úshin oblys ákimine el atynan alǵystaryn bildirdi.
Budan keıin óńir basshysy at basyn Bozoba-Qaıyńdy baǵytyndaǵy Qaraózen ózeni arqyly ótetin qalqymaly kópir baǵytyna burdy.
Burynǵy qalqymaly kópirdiń isten shyǵýyna baılanysty Qaıyńdy, Bolashaq aýyldyq okrýgteriniń turǵyndaryna aýdan ortalyǵymen qatynas qıyndap, Jalpaqtal arqyly aınalma jolmen júrýge týra keldi. Mine, sol máseleniń túıini sheshilip, jańadan jasalǵan qalqymaly kópir 15 mamyr kúni ashylǵan bolatyn. Bul qalqymaly kópirdi Vladımır Samsonov jetekshilik etetin «Oral jóndeý kompanıasy» JSHS 52 mln. 724 myń teńgege salǵan. Uzyndyǵy 42 metr, eni 6 metr, júk kóterýi 20 tonnaǵa deıin jetetin kópir qurylysy sapaly salynǵan. Osy qalqymaly kópir arqyly ótken jolaýshylar Qaıyńdy, Bolashaq aýyldary arqyly Tasqala-Oral baǵytyndaǵy tas jolǵa tikeleı shyǵa alady.
Aqpáter aýylynda byltyrǵy jyldan beri «Aqbulaq» baǵdarlamasy boıynsha taza aýyz sý qubyrynyń rekonstýksıalaý jumystary júrgizilýde. Respýblıkalyq búdjetten qarjylandyryp jatyrǵan bul jobaǵa 239 mln.689,4 myń teńge bólinip, uzyndyǵy 18,731 shaqyrymdy quraıtyn sý qubyry taza aýyz sýymen 1014 adamdy qamtymaq. Osy jumystardyń basynda bolǵan oblys basshysy merdiger «BatysgazStroı» JSHS-niń ókilderimen kezdesti.
Kaztalov aýdanynda júzege asyp jatqan aýqymdy jobanyń biri – Kırov-SHejin kanalynyń 3-shi kezeńin qaıta qurý jumystary. 3-kezeń jumystarynyń uzyndyǵy 47,9 shaqyrymdy quraıtyn bul kanal iske qosylǵan kezde Reseıdiń Edil ózeninen keletin sý táýeldiligin azaıtyp, Jaıyq sýyn Qaraózenge ákelý maqsaty tur. Bul jumystarǵa respýblıka búdjetinen 1 mlrd.967,98 mln kóleminde qarjy jumsalyp otyr. Atalǵan jobany júzege asyrý jyl saıyn Jaıyqtan Qaraózenge 50 mln.tekshe metr kóleminde sý aıdaýǵa, bul óz kezeginde jylyna 600-700 mln.teńge búdjet qarajatyn únemdeýge múmkindik beredi. Qurylys jumystaryn merdiger «AzıaTehStroı» JSHS júrgizip jatyr. Kırov-SHejin kanalynyń qaıta qurý jumystaryn óz kózimen kórgen oblys ákimi: Qazirgi atqarylyp jatqan jumystardy ýaqytyn da jáne sapaly aıaqtaýymyz qajet. Alda 4-shi kezeńniń jumystarynyń jospary tur,- deı kele merdigerge tapsyrma berdi.
Óńir basshysynyń sońǵy aıaldaǵan nysany Jańajol aýlyndaǵy kireberis jáne aýyl ishindegi kóshelerdiń joldaryn kúrdeli jóndeý jumystary. Jańajol aýylynyń kire berisi men Jalpaqtal aýylyna aparatyn shyǵa beris joldaryna jáne aýyl ishindegi 3 kóshege uzyndyǵy 7,5 km bolatyn qatqyl tabandy jol salý jumystary bastalǵan. Sonymen qatar 4 kóshege jaıaý júrginshi joly da jasalyp jatyr. Bul qurylys jobasyna respýblıkalyq búdjet esebinen 704 mln.887 myń teńge qarajat bólinip, qurylys jumystary júrgizilýde.
