Osyǵan deıin elimizde 26 sáýirde ótetin kezekten tys Prezıdent saılaýyna ózin-ózi usyný tártibi boıynsha Prezıdenttikke úmitker bolýǵa nıetti Murat Telibekovtiń málimdemesi birqatar qazaqstandyq BAQ-ta jarıalanǵan.
QHA usynysyn Úkimet músheleri jáne QR Prezıdenti maquldaǵannan keıin Qamshy.kz portalynyń tilshisi halyq arasynda ózin "QR Musylmandar odaǵynyń tóraǵasy" dep tanystyrǵan Murat Telibekov myrzadan suhbat alǵan bolatyn. Onda Murat myrza óziniń basqaryp otyrǵan uıymy "Ádilet basqarmasyna" tirkelgenin, quramynda 523 747 kisi múshe ekenin, óziniń kandıdatýrasyn 1 456 329 kisi usynǵanyn jáne aldaǵy saılaýǵa mindetti túrde qatysýǵa nıetti ekenin aıtqan bolatyn.
Belgili bolǵandaı, bir top azamat QMDB-ǵa «Musylmandar odaǵynyń» Dinı basqarmaǵa qatysy bar ma? M.Telibekovtyń musylmandar atynan ózin usynatyn quqyǵy bar ma? Deıtin mazmunda suraqtar joldaǵan.
Osy suraqtarǵa QMDB-nyń jaýaby mynadaı bolypty:
Birinshiden, bizdiń suraýymyz boıynsha Dinı basqarmaǵa Ádilet mınıstrligi tarapynan resmı jaýap hat kelip tústi.
Osy hatta «Qazaqstan musylmandar Odaǵynyń» uıym retinde esh jerde tirkelmegeni kórsetilgen.
Sondaı-aq, M.Telibekov qandaı da bir dinı birlestiktiń basshysy ne bolmasa múshesi retinde tirkelmegen.
Osy oraıda, QMDB M.Telibekovtyń ózin «Qazaqstan musylmandar odaǵynyń» basshysy retinde aıtýǵa jáne tirkelmegen uıymnyń atynan sóıleýge quqyǵy joq dep sanaıdy.
Sonymen qatar, BAQ ókilderinen endigi jerde M.Telibekovtyń esimin elimizdiń musylmandyq uıymdarmen baılanystyrmaýyn jáne barlyq aqparatty tolyqqandy tekserip otyrýyn suraımyz delingen.
Ekinshiden, qoǵamdaǵy dinı máseleler boıynsha pátýa shyǵaratyn resmı mekeme – QMDB Ǵulamalar Keńesi.
Osyǵan oraı, pátýa berý mártebesine ıe bolmaǵan jáne barlyq musylmandardyń atynan sóıleıtin adamnyń áreketterin QMDB quptamaıdy.
Bul – musylman úmbetiniń birligine syzat túsirip, bólinýine yqpal etedi. Musylman pendeniń adamdar arasynda búlik týdyrýy durys emes deıdi.
Paıǵambarymyz Muhammed (Allanyń oǵan ıgiligi men sálemi bolsyn) bir sózinde naǵyz musylmandy adamdarǵa tilimen de, isimen de zıan tıgizbegen pende dep sıpattaǵan dep dálel keltiredi.
