Almaty ákimi Baýyrjan Baıbek «Nur Otan» partıasynyń qalalyq fılıalynyń qoǵamdyq qabyldaýynda azamattardy qabyldady.

Megapolıs basshysymen kezdesý kezinde Bostandyq aýdanynyń turǵyny Nadejda Erolskaıa «Iýjnyı» saıabaǵynyń janynan kópqabatty turǵyn keshenin salý týraly másele kóterdi. Kezdesýge qatysqan «Turkuaz Invest» kompanıasynyń bas dırektory Zekı Pılge bul jerdiń jeke menshiktiki ekenin, sondyqtan bir úıden 100 turǵynnyń qolyn jınaý prosedýrasynyń júrgizilgenin aıtty.

Taraptardy tyńdaǵan Baýyrjan Baıbek saıabaqqa jaqyn ornalasqan úıler turǵyndarynyń barlyǵynyń pikirin eskerý qajettigin atap ótti. Buryn ol saıabaqty jóndeý jobasyna aýdan turǵyndarynyń usynystaryn eskere otyryp túzetýler engizýdi tapsyrǵan edi.

«Sizder qoǵamdyq tyńdaýlar ótkizip, sodan keıin ǵana zańǵa sáıkes jaqyn ornalasqan úıler turǵyndarynyń basym kópshiliginiń ruqsatyn alýǵa tıissizder. «Nur Otan» partıasynyń Doktrınasynda Zańnyń ústemdigi – ádiletti qoǵamnyń negizi jáne barlyǵy úshin múmkindikterdiń birdeı bolýy atap kórsetilgen. 400-den astam turǵyn ákimdikke, partıaǵa ashyq hat jazyp, ózderiniń kelispeıtindikterin bildirgen edi. Sondyqtan 10 kún merzim ishinde qalalyqtar ótinish bildirgen «Nur Otannyń» alańynda qoǵamdyq tyńdaý ótkizip, zań júzinde sheshim qabyldaǵan jón», - dedi megapolıs basshysy.

Óz kezeginde qala ákiminiń orynbasary Sultanbek Mákejanov bul másele boıynsha Qalaqurylysy keńesi sheshiminiń keıinge shegerý jóninde sıpat alǵanyn, óıtkeni qurylysty júrgizýshi bir úı turǵyndarynyń ǵana kelisimin alyp, qoǵamdyq tyńdaýdy talapqa saı ótkizbegenin aıtty. Budan ózge, 2017 jyly Jerdi paıdalaný men qorǵaýdy baqylaý jónindegi Basqarma atalǵan aýmaqtyń uzaq ýaqyt paıdalanylmaýy saldarynan bul ýchaskege shekteý qoıǵan bolatyn.

Almaty ákimdiginiń «Saıran» avtovokzaly men qalalyq ıpodromdy tarıhı eskertkishterdiń aldyn - ala jasalǵan tizimine engizgeni belgili boldy. Bulardan ózge, QİYO «Atakenttiń» basqarýshy» kompanıasy jeke menshiktegi 8 gektar jer ýchaskesin tegin qaıtarý týraly mindetteme qabyldady. Buryn Almaty ákimdigi 23 gektar jerdi ýaqytsha jalǵa berý týraly kelisimniń kúshin joıǵan edi. Degenmen, kórme kesheniniń basshylyǵy «Qalalar jaıaý júrginshiler úshin» konsepsıasyna saı aımaqty kóriktendirý jumystaryn odan ári jalǵastyratyn bolady.

Qala ákiminiń jeke qabyldaýy kezinde Malıka Tashpýltovanyń Qazaqstan halyqtary Assambleıasynyń sońǵy sesıasynda jalǵyz basty jáne kópbalaly analar jumys isteıtin óziniń jeke naýbaıhanasyn ashqysy keletin usynysy qaraldy. Ótinim berýshi tıisti bıznes - josparyn jasaǵan soń Kásipkerlik jáne ındýstrıaldy – ınovasıalyq damý basqarmasy memlekettik qoldaýdyń sharalary aıasynda kómek kórsetetin bolady.

Aıta keterligi, jyl basynan beri qaraı qalada 12,3 myń jumyssyz ben óz betinshe áreket etýshi jumyspen qamtyldy, olardyń 40% -y áıelder. Jyl aıaǵyna deıin taǵy 32 myńnan astam adam jumysqa tartylady.

«Nur Otan» alańynda Naýryzbaı aýdanynyń turǵyny Bıbigúl Hodjanovanyń №192 jalpybilim beretin mekteptiń jaıaý ótpeli joly mańynan jaryqdıodty jaryq kózin ornatý men «dybysty jolaqtar» jasaý jónindegi usynysy durys sheshimin tapty.

Jalpy, sońǵy jyldary 105 jaıaý ótpeli joldar retke keltirildi, 49 km jańa jaryq kózderiniń jelileri tartyldy, 33,6 myń shyraq pen 5,5 myń baǵana aýystyryldy. Bıylǵy jyly taǵy 80 km jańa jeli tartylady.

Baýyrjan Baıbek almatylyq Alısher Mamedalıevtiń ruqsatsyz kólik turaqtarynyń jumysy jónindegi shaǵymyn da qarady. Shaǵymdanýshy №5 qalalyq klınıkalyq aýrýhananyń ońtústigine qaraı aqyly kólik turaǵynyń jumys isteıtinin, munda belgisiz jandardyń kólik turaǵynyń aqysyn qolma-qol jınap alyp, fıskaldy chekterdi bermeıtinin aıtty.

Almaty ákimi jeke qabyldaýy barysynda Alataý aýdanynyń turǵyny Aıgúl Tajıevanyń úı aýlasyndaǵy drenajdy júıeniń qanaǵattanǵysyz ekendigine alańdaýshylyq bildiretinin tyńdap, tıisti basqarmalarǵa ótinimdi keshendi qaraýdy tapsyrdy.

Aıta keterligi, sońǵy eki jylda qalada 732 aýla, 185 úı, 222 lıft jóndeýden ótti. Jyl aıaǵyna deıin abattandyrylǵan aýlalar sanyn 37%-ǵa jetkizý nemese olardyń jalpy sanynyń ishinen 1400 aýlany jóndeý josparlanǵan.