Almatyda Balalardy qorǵaý kúni balalar men jasóspirimderdiń mýzykalyq orkestrleri men ansámblderiniń parady boldy.
Jańarǵan Jibek joly boıyndaǵy merekelik sherýge 5 myńnan astam balalar qatysty. Qaıta jasalǵan Panfılov kóshesiniń boıymen barabanshylar, cherlıderler kolonnalary, úrlemeli orkestrler men bı ujymdary júrip ótti.
«Mundaı sharalar balalardyń boıynda ózara yntymaqty jáne mektepke degen senimdi kúsheıtedi, ekinshi jaǵynan oqýshylardyń shyǵarmashylyq jáne kreatıvtik áleýetin arttyrady. Parad osymen ekinshi ret ótip otyr, oǵan arnaıy repertýar, erekshe aranjırovkalar jasaldy. Balalar bul sharaǵa bar yntalarymen daıyndaldy», - dedi Bilim basqarmasy basshysynyń orynbasary Lázzat Jylkqbaeva.
Qala turǵyndary men qonaqtary aldynda otandyq estrada juldyzdary, sonyń ishinde Sáken Maıǵazıev, Serik Ibragımov, Nurbolat Abdýllın, Serikbol Saılaýbek, Beıbit Kýshkalıev, MýzArt Life, mekteptiń «SMart» balalar hory jáne kóptegen basqalar óner kórsetti. Eń kishkentaı qonaqtar úshin túrli ınteraktıvti oıyndar men konkýrstar uıymdastyryldy.
Aıta keterligi, 2 maýsymda «Shymbulaq» TSHK-da Family day uıymdastyrylady. Saǵat 11.00-den 12.30-ǵa deıin taý shańǵysy kýrortyndaǵy batýttar, skalodrom, kvadrasıkl men ponımen syrǵanaý, arqan parki, tenıs tegin bolady.
Dál osy kúni saǵat 11.00 den 23.00-ge deıin QBTÝ-dan tómen (Abylaı han – Qazybek bı – Panfılov – Áıteke kósheleriniń mańy) «Tátti Almaty» taǵam jasaýdyń otbasylyq festıvali ótedi, munda megapolıstiń tanymal meıramhanalary almatylyqtar men qala qonaqtaryna tátti taǵamdar usynady.
Aldaǵy demalys kúnderi qala turǵyndary men qonaqtary úshin Respýblıka Saraıy aldyndaǵy Abaı alańynda VI Halyqaralyq «The Spirit of Tengri»zamnaýı etnıkalyq mýzyka festıvali ótedi, oǵan 12 jaqyn jáne alys shetelden kelgen artıser qatysady. Konsertter 2 jáne 3 maýsymda saǵat 17.00-de bastalady. Kirý tegin.
