Bul – shahar bıligi qolǵa alǵan ekologıalyq tájirıbe, dep jazady 24.kz.

Meıramhanalar qoldanǵan maıdy jınap, óńdeýge jiberedi. Odan daıyndalǵan otyndy sý kólikteri paıdalanady. Qala ákimdigi osylaısha tarıhı eskertkishterge nuqsan keltiretin aýadaǵy zıandy qaldyqtyń mólsheri kúrt azaıatynyna úmit artyp otyr.

Maıǵa qýyrylǵan teńiz ónimderi Venesıada eń taraǵan taǵamdardyń qatarynda. Qaladaǵy meıramhanalardyń mázirine mindetti túrde qýyrylǵan as shaıany nemese kálmarlar kiredi. Al daıyndaý úshin kóp mólsherde ketetin ósimdik maıyn endi kádege jaratyp júr.  

Sımone Ventýrını, Venesıanyń ekonomıkalyq damýy jónindegi keńesshi:

- «Shyǵynsyz ekonomıka» úderisi júzege asyp jatyr. Endi qaldyqtardy da ózge óndiriste qoldanyp júr. Paıdalanǵan maıdy aǵyzyp jiberseńiz, aınalamyzdaǵy sýdy lastaıdy. Al otyn shyǵarýǵa qoldansaq, qorshaǵan ortaǵa paıdasyn tıgizedi.

Venesıada qoldanylǵan maıdy jınaýǵa arnaıy konteınerler ornatylǵan. Keıin óńdeý úshin zaýytqa jetkiziledi.

Djakomo Rıspolı, Eni Refining&Marketing bólim dırektory:

- Maıdy bir súzip alǵannan keıin bizdiń bıoóndiris zaýytyna jiberedi. Ol janarmaı shyǵarý úshin shıkizat retinde qoldanylady. Nátıjesinde daıyn bolǵan joǵary sapaly otynnyń 20 paıyzy ósimdik maıynan turady desek bolady.

Antonıo Ferrarı, kólik kompanıasynyń tehnıkalyq qyzmet kórsetý mamany:

- Zıandy qaldyqtardy azaıtatyn otyn túrine kóshý óte mańyzdy qadam bolýy múmkin. Qoldanylyp júrgen qozǵaltqyshtardy aýystyrmaı, jańa tehnologıalardy engizýge ketetin qarjyny únemdeımiz.  

Venesıa kanaldarymen júretin áıgili «vaporettıler» ylǵı adamǵa toly, sol sebepten janarmaıdy kóp mólsherde qajet etedi. Jolǵa shyqpas buryn 150 teplohodtyń árqaısysy ekologıalyq otyndy toltyryp quıyp alady. Bul tájirıbe jyldyń sońyna deıin jalǵasady.