Kúntizbege qarap ne kórdińiz? «Eki» degen sandy» dep jaýap qatyp, qyzyq suraq qoıǵanyma nalıtyn shyǵarsyz. Nalymańyz, dál búgin jigerińizdi qum qylmaýǵa ýáde berińizshi. Óıtkeni shildeniń ekisi qazaqtyń rýhshyl, jigerli aqyny, sý jańa Túrkistan oblysynyń týmasy Muhtar Shahanovtyń týǵan kúni. Óz óleńin tik turyp, tamaǵyn jyrtyp, ıdeıasyn bar dúnıe-bolmysymen jetkizetin Shahanov tiri turǵanda nesine qynjylamyz?! Shahanovsha aıtsaq, turmystyń tapshylyǵyn kóp kórsek te, jurtqa etken jaqsylyǵymyz qaıtpaı, sengenimiz satyp, baqytsyz bolyp qalsaq ta ómir súrý kerek. Sebebi mynaý ǵalamda óz soryńdy óziń jeńbeseń, arman jetkizbeıdi eken. Demek ómirdiń barlyq sátsizdikteri baqytsyzdyq emes. Muny da aıtqan ótkir oıly Shahanov. Endeshe adýyndy jyrlarymen boıǵa qýat, janǵa rýh syılaǵan aqyndy dúnıe esigin ashqan kúnimen quttyqtaı otyryp poezıaǵa bomba óleńderimen silkinis syılaǵany úshin barsha Qazaq eli atynan alǵys aıtamyz. Shahanovtyń jyrlaryn jatqa aıtyp júrgen balalar máńgúrtızmnen ada, maldyq sanadan erkin, qaısar daýysty qazaqtyń azamaty bolyp ósip shyǵatynyna kámil senemiz.

Baıqaımysyń

Baıqaımysyń,
Baıqaımysyń
Myna ǵajap tamashany:
Bir adamǵa baılanysty bir adamnyń bolashaǵy.
Baıyppenen kóz jiberseń asaý jyldar órisine,
Bir adamǵa baılanysty bir adamnyń jeńisi de.
Bul zamanı qaǵıdanyń múmkin be eken kónermegi,
Qozy Kórpesh aman tursa, Baıan sulý óler me edi?
Isataıdy jeńbese jaý, Mahambetti jeńer me edi,
Qaıran aqyn taǵdyrynyń soqqysyna kóner me edi?
Qaıran aqyn — suńqar qıal, narkesken ol,batyl arman,
Isataıdan aırylǵanda jer baýyrlap jatyp alǵan
Budan asqan qaıǵyly tún qonǵan emes basyna onyń,
Dosy barda alshysynan turýshy edi asyǵy onyń.
O, sumdyq - aı,
Jaýlyq sezim parasatty panalapty,
Isataıdyń ólimimen Mahambetti jaralapty...
Qadirlim - aý,
Kóz jibershi asaý jyldar órisine,
Bir adamǵa baılanysty bir adamnyń jeńisi de.
Keıde meni muqatpaq bop jaýlar seni jamandaıdy,
Al eger sen jamandalsań bul, árıne, maǵan qaıǵy.
Basymyzǵa shıyr - shıyr kún týǵanda qus tanaly,
Keıde meni jeńý úshin jaýlar saǵan kúsh salady.
Taıǵaq ómir joldarynda súringende tirek alar,
Súıenishim sen ekenin aıtpastan - aq biledi olar.
Álemniń bar ajarynan bizge dostyq symbattylaý
Men jadyrap júrsin deseń, sen myqty bol,
Qymbattym - aý.

Jazıra Baıdaly