Rahymjan Otarbaevtyń "Jas alash" gazetine bergen suhbatynda tilshi osy saýaldy qoıǵan. Bul saýalǵa R.Otarbaev: "

Erte me, kesh pe osy saýaldyń aldymnan shyǵatynyn sezip júretinmin. Jáne kóp qalamdastarymnyń kókeıin tesip júrgen nárse edi. Shyndyǵy bylaı. Aldymen aıtarym, men osy aıtýly eki  tulǵadan  ólsheýsiz jaqsylyq kórgen adammyn. Tizbelep ketsem, kópke sozylar. Aıtmatov pen Shahanovtyń dostyǵyn el biledi. Bishkekte elshilikte júrgen kezimiz. Eki aǵam áńgimelesip otyryp: «Osy birlesip kitap jazsaq qaıtedi?» – desti.

– Eki eldiń tarıhy men taǵdyryn qozǵaıyq, bıliktegilerdiń taǵy men baǵyn aıtaıyq, arasynda óz ómirimizdiń keıbir belesterin de kiristirip otyraıyq...

Sonymen bolashaq kitaptyń taraýlary men taqyryby taldandy. Men de óz oıymdy qostym. Keıbir derekterdi berdim. Sóıtip, árkim  óz úlesin jazatyn bop Shyqań Brússelge attandy. Muhań Bishkekte qaldy. Ekeýi eki jaqta jatyp alyp jarty jyl jazysty. Qoljazbalarynyń úzindisin bir-birine telefonmen oqysady. Kóbine kelisip, keıde tipti shekisip alady.

Shekisetinderi Muhtar aǵa jedel, shalt qımyldaıdy da, Shyqań bolsa asyǵar emes. Ózge jumysy, jazýy bastan asyp jatqan shyǵar. Sosyn biri qazaqsha, ekinshisi oryssha jazady. Sáıkessizdikter de az emes.

Alty aıdan soń  jazǵandaryn birlesip talqylady, taldady. Taraý-taraýǵa  biriktirdi. Sosyn Shyńǵys aǵa: –Rahymjan baýyr, sen meniń jazǵandarymdy  tigisin jatqyzyp qazaqshaǵa aýdar. Qol kómegińdi ber. Kitap aldymen Almatyda qazaqsha, sosyn baryp oryssha, qyrǵyzsha shyǵady, –dedi. Aýdaryp shyqtym. Muhańnyń jazǵanynan da sol aýdarmaǵa laıyqtap murtyn bastym. Stıldik jaqtan bir-birinen alshaq ketpesin dep. Bar-joǵy sol! Bul kitapqa meniń sińirgen  eńbegim 10-15 paıyz shamasynda-aq shyǵar. Men muny eki  tulǵanyń aldyndaǵy inilik paryzym, olardan kórgen  shapaǵatymnyń óteýi dep istedim. Basqa bóten  oı bolǵan joq.

Kezinde zamananyń qyryna ilinip, umyt bola jazdaǵan Muhtar Áýezovtiń «Qıly zaman» povesin Aıtmatov izdep taýyp, ózi orysshaǵa aýdaryp «Novyı mır» jýrnalyna jarıalap, ádebıetimizdiń asyl qazynasyna qaıta qosyp edi. Soǵan jaryla qýanǵan qazaqtyń,  men Shyńǵys aǵanyń 170 bettik oryssha jazǵanyn qazaqsha sóılete qoıyp em, Jeltoqsan oqıǵasy zulmatyn álem nazaryna alyp shyqqan Shahanovtyń qoljazbasynyń murtyn basa qoıyp em, munshama shamdanatynyn qaıdan bileıin?!

Meniń otarymnan qoı órgizgisi kep turatyn aǵalaryma ázirge aıtarym osy. Sol aǵalardan bir ataqty jazýshymyzdyń tórt-bes tarıhı romany  qalaısha bir-birine juǵyspas tórt-bes stılde  jazylǵanyn bizdiń de suraıtyn ýaqytymyz jeter bálkim?!" dep jaýap berdi.