Jýyrda Oral qalasynda qaldyqtardy basqarý júıesin jandandyrý máselelerin talqylaǵan semınar-keńes ótti.
Sharada oblys ákiminiń birinshi orynbasary Igor Steksov Elbasynyń túrli qoqys qaldyqtaryn zamanaýı turǵyda paıdaǵa jaratý jónindegi tapsyrmasyn tilge tıek etip, óńirdegi bul baǵytta oń jumystar atqarylyp jatqanyn aıtty. Sondaı-aq ol osy salada eńbek etip júrgen oblystyq tabıǵı resýrstar jáne tabıǵat paıdalanýdy retteý basqarmasynyń qyzmetkeri Aısulý Abdrahmanova men «Kama-Sentr» JSHS dırektory Valerıı Goloýhovqa QR Energetıka mınıstrliginiń atynan «Qurmet belgisin» tabys etti.
Óz kezeginde sóz alǵan atalmysh jıynnyń moderatory, «Kaz Waste» qaldyqtardy basqarý boıynsha qazaqstandyq asosıasıasynyń atqarýshy dırektory Vera Mustafına óńirde munaı-gaz, taǵy basqa da kásiporyndar kóp bolǵandyqtan, óndiristik qaldyqtar da az emes ekenin atap ótti. Sondaı-aq qoqystardy túrine qaraı iriktep jınaýda aýdan men aýyldyq jerlerdegi atqarýshy organdar belsendilik tanytý qajettigin aıtty. Al oblystyq tabıǵı resýrstar jáne tabıǵat paıdalanýdy retteý basqarmasynyń basshysy Amangeldi Dáýletjanovtyń aıtýynsha, oblystaǵy qaldyqtar plasıka, shına, paıdalanylǵan maılar, qurylys materıaldary jáne tamaq ónimderi qaldyqtary bolyp túr-túrge bólingen. Negizinen aýdan ortalyqtaryna jalpy qaldyqtar men plasıkaǵa arnap qoqys jáshikteri qoıylýda. Máselen, Oral qalasynda plasıkalyq bótelkelerge arnalǵan 767, al 12 aýdanǵa túrli qaldyqtar jınaýǵa 317 konteıner ornatylǵan. Endigi jerde bul ıgi isterdiń aýyldyq okrýgterde de jandandyrý qajet. Ásirese, kóńilge qonymdy jumystar Tasqala men Bókeı ordasy aýdandarynda jaqsy jolǵa qoıylǵan eken. Búginde oblysta qatty turmystyq qaldyqtardy bólektep jınap, óńdeıtin 12 kásiporyn jumys jasaýda.
BQO ekologıa departamenti memlekettik ekologıalyq baqylaý bóliminiń bas mamany Tólegen Baqtyǵalıevtiń aıtýynsha, óńirdegi óndiris qaldyqtarynyń negizi burǵylaý qaldyqtary bolyp otyr. Jalpy oblysta óndiristik qaldyqtardy qaıta óńdeıtin birneshe kásiporyn bar. Óńirde paıda bolǵan óndiristik qaldyqtardy kádege jaratý jáne qaıta óńdeýdiń úlesi 33 paıyzdy quraıdy. Onyń aıtýynsha, oblysta jylyna orta eseppen 120-130 myń tonnadaı qatty turmystyq qaldyqtar (QTQ) jınaqtalady. Búginde olardyń jalpy mólsheri 6,5 myń tonnany qurap otyr. Jalpy QTQ-ny kádege jaratý úlesi – 2,14 paıyz. Aıtyp ótý kerek, birinshi jartyjyldyqta atalmysh departament tabıǵat paıdalanýshylarǵa 115 tekseris júrgizip, qaldyqtardy saqtaý talaptaryna qatysty 130 quqyqbuzýshylyq anyqtaǵan. Búginde berilgen 47 nusqama tolyǵymen oryndalǵan eken. Al salynǵan 34 aıyppuldyń jalpy somasy 2 325, 635 myń teńge qurap otyr.
