Batys Qazaqstan oblysynyń Qaratóbe aýdanyndaǵy «Qunyskereı úńgiri» atalyp ketken tarıhı orynǵa alǵashqy QR-kod taqtaısha ornatyldy.
Qaratóbe aýdandyq jastarmen jumys jónindegi resýrstyq ortalyqtyń uıymdastyrýymen qoıylǵan QR-kod taqtaısha mol múmkindik bermek. Iaǵnı bul jerge kelgen kez kelgen adam smartfonmen arnaıy engizilgen sýretti skanerleý arqyly Qunyskereı úńgiri týraly tolyqtaı aqparatty ala alady. Aıta keterligi, bul Batys Qazaqstan oblysy boıynsha kıeli oryndarǵa qoıylǵan alǵashqy QR-kod. Aýdan jastarynyń aıtýynsha osyndaı taqtaıshany aýdan aýmaǵyndaǵy basqa da kıeli oryndarǵa ornatý josparlanýda. Qunyskereı úńgiri – Egindikól aýylynan 4-5 shaqyrym jerde ornalasqan. Óz kezeńinde bul úńgir bılik tarapynan qýǵynǵa ushyraǵan Qunyskereı batyrǵa pana bolǵan desedi. Jergilikti turǵyndar bul aıtýly tulǵanyń ǵajaıyp oqıǵasyn esterinde saqtap, osy jerdi Batys Qazaqstan oblysynyń kıeli jerlerine jatqyzady. Atalmysh taqtaıshanyń ornatylýyna baılanysty «Týǵan ólkem – tunǵan shejire» atty shara da ozdyrǵan bolatyn. Jıyn barysynda «Aýylym – altyn besigim» atty kórme uıymdastyrylyp, Qaratóbe aýdanynyń Egindikól aýylynyń tarıhy, kıeli jerleri men mektebi týraly úsh tilde baıandaldy. Kórmedegi «Aýylymyzdyń maqtanyshtary» bóliminde ólkeden shyqqan talantty tulǵalar men jaýyngerlerdiń ómir joly týraly aıtyldy. Sonymen qatar, mektep oqýshylarynyń «Qunyskereı tulǵasy» atty sahnalyq qoıylymy kórermen nazaryna usynyldy. Shaǵyn aýyldyń baı tarıhynan syr shertken sharada aýyl aqsaqaly Ertaı Serdalın sóz alyp uıymdastyrýshylarǵa alǵysyn bildirdi. Rýhanı jańǵyrý adamnyń týǵan jeriniń tarıhynan bastalatynyn aıtqan ol, jastardyń boıyna patrıottyq sezimdi uıalatýda osyndaı sharanyń mańyzdy ekenin atap ótti.
