Oral qalacyndaǵy mamandandyrylǵan HQKO onlaın rejimde qyzmet kórsete bastady. Óńirimizge arnaıy jumys saparymen kelgen QR Parlament Májilisiniń depýtattary Evgenıı Kozlov, Gleb Shegelskıı, Sergeı Sımonov, Snejanna Imasheva Zashaǵan kentindegi atalmysh  ortalyqtyń qyzmetimen  tanysty.

Oral shaharyndaǵy mamandandyrylǵan halyqqa qyzmet kórsetý ortalyǵyna onlaın rejimde júrgizýshi kýáligi men jeke kólikti esepten shyǵarý úshin  úıde otyryp-aq ótinish jiberip, daıyn qujatty ortalyqtan nemese Qazposhta arqyly alýlaryna bolady. Jergilikti turǵyndar úshin bul ýaqyt únemdeýdiń tıimdi joly tabylady. Munda  azamattar jeke  kólikterin 90 mınýttyń ishinde tirkep, júrgizýshi kýáligine eki saǵatta  qol jetkize alady.  Oral qalalyq mamandandyrylǵan HQKO-nyń jetekshisi Lýıza Qusaıynovanyń  aıtýynsha, munda kúnine shamamen 500-600 turǵynǵa qyzmet kórsetip, aıyna segiz myńǵa jýyq ótinishterdi qabyldaıdy. 

– Mamandandyrylǵan HQKO alǵash Qaraǵandyda  ashylǵan bolatyn. Búginde elimiz boıynsha barlyq óńirde bar.  Bul ortalyq – solardyń ishindegi eń jańa ári halyqqa qyzmet kórsetý ortalyqtarynyń ishindegi úzdikteriniń biri. Ortalyq ǵımaratynyń ishi óte keń, aýlasynda kólik júrgizýshiler úshin barlyq jaǵdaı jasalǵan. Elektrondyq qyzmet standarttarǵa saı jumys isteýde. Elektrondy kezekte júıeli jolǵa qoıylǵan. Mundaı ortalyqtar turǵyndar úshin tıimdi, – dedi QR Parlament májilisiniń  depýtaty  Snejanna Imasheva.

Depýtattar kezdesý barysynda Elbasy jarıalaǵan  áleýmettik bastamalardyń júzege asyrylý barysy, sıfrlandyrýdyń tıimdiligi  týraly aıtyp, arnaıy mamandandyrylǵan halyqqa qyzmet kórsetý ortalyǵynyń jumysyna  oӊ baǵasyn berdi.