Aqtóbe oblysynda búginge deıin turǵyndardyń 85%-y elektrondy medısınalyq tólqujatqa kóshirildi. Bul týraly Aqtóbe oblysynyń ákimi Berdibek Saparbaev Úkimettiń keńeıtilgen otyrysynda málimdedi, dep habarlaıdy Qamshy.kz aqparat agenttigi digitalkz.kz saıtyna silteme jasap

Oblys basshysynyń aıtýy boıynsha óńirde sıfrlandyrý salasy qarqyndy túrde júzege asyrylý ústinde, qazirgi kezde dárigerlerdiń esep berý formalarynyń 38-i elektrondy formaǵa kóshkenin, al qalǵan 67-si jyl sońyna deıin kóshiriletinin atap ótti.

«Barlyǵy 35 ındıkatordyń 30-y qazirgi tańda oryndaldy, onyń 5-de tómendeý bar bul boıynsha biz mınıstrlikpenen jumystar júrgizýdemiz. Olardyń ishinde qaterli isik, ana men balanyń ólimi, jedel járdem jóninen tómendeý oryn alǵan bolatyn bul jóninde túzetilý jumystary atqarylýda. Oblysta dári dárimekpen eshqandaı másele joq ol jóninen tıisti qorlarymyz jetkilikti», - dedi B. Saparbaev.

Sondaı-aq, kadrlarmen qamtamasyz etý jóninen qazir atalmysh oblysta 77 maman jetispeıdi. Batys qazaqstan óńirlik ýnıversıtetimenen kelisim shart boıynsha, osy jyly 66 maman oblysta qyzmet jolyn bastaǵaly otyr.

«Densaýlyq saqtaý salasyn kompútermen jabdyqtaý 90%-ǵa oryndalyp otyr, qosymsha 280 mln. teńge kóleminde qarjy bólindi, jyldyń aıaǵyna deıin medısına salasy tolyqtaı kompúterlermen jabdyqtalatyn bolady», – dedi oblys ákimi.

Aýrýhanalardaǵy kezekterdiń azaıýy, dárigerlerdiń qaǵazbastylyqtan arylyp, naýqastarǵa kóp kóńil bólýi óńirde medısınany sıfrlandyrýdyń birshama ońdy tustary ekenin oblys basshysy aıtyp ketti.

Esterińizge sala keteıik, Aqtóbe oblysynda qazirgi kezde shalǵaı aýyldarǵa ınternet jelisin jetkizý jumysy júrip jatyr. Ázirge aýdan ortalyǵynan alysta ornalasqan dárigerlik, feldsherlik ambýlatorıalarda, medısınalyq pýnktterde ınternet joq. Osy olqylyqtyń ornyn toltyryp, jyl sońyna deıin oblystaǵy barlyq medısınalyq mekemelerdi kompútermen qamtamasyz etip, ınternetke qosý josparlanyp otyr.

Budan ózge, aǵymdaǵy jyly biryńǵaı oblystyq sıtýasıalyq ortalyq qurý josparlanǵan. Munda medısınalyq mekemelerdiń aýrý-syrqaý, týý jáne t.b. boıynsha aqparatty kúndelikti túsip otyratyn bolady. Atalmysh júıeni engizý qaǵazsyz tehnologıany qamtamasyz etýge, elektrondy densaýlyq tólqujatyn qurýǵa, emdelýshiniń marshrýtyn ońtaılandyrýǵa múmkindik beredi dep kútilýde. Bul turǵyndarǵa kórsetiletin qyzmetter sapasyn jaqsartpaq.

Aıta ketelik, «Sıfrlyq Qazaqstan» memlekettik baǵdarlamasy aıasynda «aqyldy qalalardyń» tıptik tujyrymdamasy vıse-premer mınıstr Asqar Jumaǵalıevtiń bastamasymen Aqparat jáne komýnıkasıalar mınıstrligi jáne «Zerde» ulttyq ınfokommýnıkasıa holdıńimen júzege asyrylýda.