Búgin memleket basshysy jumys saparymen Pavlodar qalasyna bardy, dep jazady Qamshy.kz aqparat agenttigi Aqordanyń baspasóz qyzmetine silteme jasap.

Sapary barysynda Elbasy birqatar ónerkásip oryndaryn aralady. Buǵan qosa Nazarbaevqa jańadan ashylǵan Maraldy demalys ortalyǵy tanystyryldy. Atalǵan ortalyq qalanyń týrısik áleýetin damytý maqsatynda ashylǵan.

Alaıda prezıdentti Maraldydaǵy jaǵdaıǵa kóńili múlde tolmady. Oblys ákimi Bolat Baqaýovqa «mundaı masqarany eshkimge kórsetpe» dep buıyryp saldy.

«Qazir Bolat Maraldy demalys ortalyǵymen tanystyrdy. Bul masqara ǵoı! Uıat! Adamdar aıaqtarynan tik turyp júr, otyratyn oryn joq. Jınalǵan jurtty kórdiń be? Qonaq úıler túgili otyratyn oryn da joq qoı? Tipti shatyr da joq. Bul naǵyz masqara! Adamdardyń kóńilin aýlaıtyn oryn kórip turǵan joqpyn», - dedi Memleket basshysy.

Osyǵan oraı Nazarbaev Maraldyǵa ınfraqurylym júrgizý kerektigin eskertti.

«Onda aparatyn joldy jóndep, baılanys ornatyp, kádimgi bıznes jasaýǵa bolady. Sonda adamdar da kóptep jınalady. Nege pavlodarlyqtar ol jerde eki qabatty kotejder, kishigirim qonaq úıler salmaıdy? Qazaqstan boıynsha ınfraqurylymdy ne úshin damytyp otyrmyn? Infraqurylym úshin qordan 9 mlrd dollar bóldim. Qazaqstandaǵy 5,5 myń shaqyrym jol jóndelý kerek. Bes jyl ishinde 4,5 myń shaqyrym jol saldyq, áli 5 myń shaqyrym jol bar. Álemniń qarjylyq ınstıtýttary bizge senip, qarajat berip otyr.

Mine, qazir Astanadan Pavlodarǵa deıin 3 saǵatta jetip barasyń. Ári qaraı Baıanaýylǵa jeńil jetetindeı jol salynady. Munyń bári halyq úshin», - dedi prezıdent.

Maraldy Ertis alabyndaǵy tuzdy kól. Onyń batpaqtary birneshe dertke daýa. Aıta keterligi, revmatızm men bulshyq et aýrýlaryn jazady.