Depýtat Qaırat Qudaıbergen Facebook paraqshasynda «Aqkent» turǵyn úı kesheni janynda aǵashtyń túbinen tabylǵan 5 jastaǵy Dinmuhammedtiń jaǵdaıy týraly jazdy.

«Búgin tańǵy 9-da «Balalarǵa arnalǵan shuǵyl medısınalyq kómek berý ortalyǵyna»  5 jastaǵy Dinmuhammedtiń jaǵdaıyn bilý úshin bardym. Ata-anasymen kezdestim. Aýrýhananyń bas dárigeri Qusaıynov Abaı Zákiruly balanyń densaýlyǵy týraly aıtyp berdi. Balanyń saýyǵyp ketýi 50-de 50. Keshe ol úshinshi deńgeıli komada boldy, búgin ekinshi deńgeıinde. 3, 5 jáne 7 kúnder óte aýyr jáne qaýipti. Qatty soqqydan  balanyń bir jaq bas súıegi ishke qaraı kirip ketken. Dárigerler soqqydan keıingi qandy isik pen bas súıektiń synyqtaryn alyp tastady. Soqqydan Dinmuhammedtiń mıy ise bastady. Eń úlken qaýip te osy.  Dárigerler qoldan kelgenshe tyrysyp jatyr, biraq jaǵdaı aýyr.

Biz sen úshin duǵa etemiz, balaqaı. Qylmysker jaqyn ýaqytta ustalady dep úmittenemin! Medıkter men quqyqqorǵaý organdaryna alǵys bildiremin» dep jazdy depýtat.

Esterińizge sala keteıik, adamdar aǵashtyń túbinen tósenishke oranǵan 5 jastaǵy balany baıqaǵan. Dinmuhammedti kólik qaǵyp ketken. Kólik júrgizýshisi balany qaǵyp ketkennen keıin aǵashtyń túbine tósenishke orap qaldyryp ketken. Qazir tekserý jumystary júrgizilip jatyr.

Buǵan deıin depýtat polısıa qylmyskerdiń kim ekeni anyqtaǵanyn jazǵan.