Aqtaý qalasynda Kaspıı mańy elderiniń besinshi samıtine Aqtaý qyzý daıyndalyp jatyr. Ilham Alıev, Hasan Roýhanı, Gýrbangýly Berdymuhamedov, Vladımır Pýtın sıaqty qonaqtardyń kelýi qurmetine Aqtaýda 7 mıllıonnan astam gúl otyrǵyzylypty. Jergilikti basylymdardyń jazýynsha bul týraly «Jasýlan flora» JSHS dırektory Jumagúl Omarova aıtqan. Egilgen gúldiń 40 paıyzy ǵana kóp jyldyq bolsa, 60 paıyzy bir jazdyq maýsymǵa ǵana arnalǵan.
Kásipker dırektordyń aıtýynsha, saıası sharany ótkizý úshin qalany gúlmen bezendirýge shaqyrý qalalyq ákimdikten túsken. Tapsyrysqa saı, qalalyq ákimshilik aldyna, 4, 14, 15 shaǵyn aýdandardaǵy jaǵalaýǵa, Renaissance qonaq úıi mańyna, «Grın park», «Oazıs» turǵyn úı keshenderine, Dostyq úıi men medısınalyq kolejge 25-ten astam gúl túri egilipti. Alaıda, gúl egýshi kompanıa basshysy bul jumystyń ońaıǵa soqpaǵanyn, gúl otyrǵyzýǵa qajetti jerlerden 200-den astam júk kóligi qoqys shyǵarǵanyn aıtqan. Tipti, Aqtaý qalasynyń 55 jyldyǵyna «Jasýlan flora» kompanıasy óz esebinen 100 mıllıondaı qarajat jumsap, 1,3 mıllıonnan astam gúl otyrǵyzǵan.
Aıta ketetin bolsaq, Qazaqstan Respýblıkasynyń Prezıdenti Nursultan Nazarbaevtyń shaqyrýymen samıtke Ázerbaıjan Respýblıkasynyń prezıdenti Ilham Alıev, Iran Islam Respýblıkasynyń Hasan Rýhanı, Reseı Federasıasynyń prezıdenti Vladımır Pýtın jáne Túrkimenstan prezıdenti Gýrbangýly Berdymuhamedov keledi.
Samıt barysynda taraptar Kaspıı teńiziniń quqyqtyq statýsy, Kaspııde ekonomıka, kólik, ekologıa, qaýipsizdik salalarynda yntymaqtastyq ornatý jáne basqa da máselelerdi talqylaıdy.
Samıttiń negizgi qorytyndy qujaty Kaspıı teńiziniń quqyqtyq statýsy týraly konvensıa bolady.
Konvensıany ázirleý jumysy 20 jyl boıy júrgizildi. Qujat jobasynda taraptardyń Kaspıı teńizindegi qyzmetiniń negizgi qaǵıdattary, teńiz akvatorıasyn, ulttyq sý túbi sektorlaryn bólý máseleleri, bıologıalyq resýrstardy, sý túbi men jer qoınaýlaryn ıgerýmen baılanysty áskerı yntymaqtastyq jáne sharýashylyq-ekonomıkalyq qyzmetti júrgizý, keme júrgizý, qorshaǵan ortany qorǵaý, teńizge qatysty ǵylymı zertteýler t.s.s. naqtylanǵan.
Kaspıı teńiziniń quqyqtyq statýsyn retteý Kaspıı aımaǵynyń saıası turaqtylyǵy men ekonomıkalyq damýyn qamtamasyz etý, onyń tabıǵı baılyǵyn saqtaý jáne kóbeıtý, biregeı geografıalyq ornalasýyn paıdalaný, jaǵalaý mańyndaǵy bes memlekettiń jan-jaqty yntymaqtastyq ornatýy turǵysynan startegıalyq mańyzdy bolyp tabylady.
Samıttiń aldynda Aqtaýda 10-11 tamyz aralyǵynda Arnaıy jumys tobynyń otyrysy jáne Kaspıı mańy memleketteriniń syrtqy ister mınıstrleriniń keńesi ótedi.
Kaspıı mańy elderiniń buǵan deıingi samıti 2014 jyly 29 qyrkúıekte Astrahanda ótken bolatyn. Alaıda Kaspıı teńiziniń statýsyn anyqtaý nátıje bermegen edi.
