Ulttyq arnanyń aýqymdy ulttyq jobasy bıyl da jalǵasyn tabady, dep habarlaıdy Qamshy.kz aqparat agenttigi tilshisi.  

Kórermen kóz aıymyna aınalǵan «Men qazaqpyn» halyqaralyq baıqaýdyń jalpy irikteý kezeńi aıaqtalyp, televızıalyq nusqasynyń alǵashqy aınalymynyń túsirilimi búgin máresine jetti. 

Qazaqtyń dástúrli án aıtý, terme, kúı tartý ónerin nasıhattaý jáne dástúrli óner janashyrlarynyń mártebesin kóterý, umyt bolǵan ulttyq ónerdi jaryqqa shyǵarý, Álem qazaqtarynyń mádenı baılanysyn nyǵaıtýdy maqsat etken megajobaǵa bıyl irikteý kezeńinde 2 myńnan astam úmitker tilek bildirip, 800-den asa ónerpaz qatysqan. 

Qatysýshylardan zamanaýı nemese avtorlyq shyǵarmalardy emes, dástúrli halyq án, kúı, termelerin oryndaýdy talap etiledi. Baıqaýdyń alǵashqy aınalymyna 54 ónerpaz qatysqan, onyń ishinde Mońǵolıadan - 3, Reseıden - 2, Japonıadan - 1 qonaq qatysýshy, qalǵany óz elimizden. Búgingi kelesi kezeńge joldama alatyn 32 úmitkerdiń esimi belgili bolady.  

«İrikteý kezeńi belgili júıe boıynsha aýyl, aýdan, oblys, al odan shyqqandar respýblıkalyq televızıalyq túsirilimge joldama aldy. Odan bólek, halyqaralyq irikteý boldy. Qatysýshylardyń sanymen qatar, sapasy da joǵary dep aıtýǵa bolady. Bul - ádilqazylardyń sózi», - deıdi «Men qazaqpyn» jobasynyń avtory jáne bas prodúseri Qýanysh Súleımenov.  

Baıqaý sharty boıynsha 18 ben 40 jas aralyǵyndaǵy dástúrli ánshi, kúıshi, termeshiler baq synaýda. Qazylar alqasy quramynda memleket jáne qoǵam qaıratkeri Myrzataı Joldasbekov bastaǵan basqa da óner maıtalmandary bar. 

«Halyqaralyq jobanyń bıylǵy daıyndyq jumysy da erte bastaldy. Monǵolıada irikteý jumystaryn memlekettik mereıtoıdyń ústinen túsip, jaılaýda ótkizdik. Al, Reseıden irikteýdi Astrahan oblysynan jasadyq. Qytaıdan ókinishke oraı saıası jaǵdaıǵa baılanysty ónerpaz shaqyra almaı otyrmyz. İrikteý jumystary týraly kúndelik habar qyrkúıek aıynan bastap megajobamen birge kórsetiledi. Baǵdarlama qorytyndysy týraly jeltoqsan aıynda galakonsert ótedi», - deıdi baǵdarlama prodúseri Erjan Qojabekov. Onyń aıtýynsha baǵdarlamaǵa qatysýǵa qyzyǵýshylar sany óte kóp. Halyqaralyq joba kelesi jyly da jalǵasyn tabýy múmkin. Oǵan Túrkıadan, Ózbekstannan da ónerpazdar shaqyrylyp, aýqymy tipti de keńeıe túspek. 

Esterińizge salsaq, baǵdarlama qyrkúıek aıynan bastap demalys kúnderi keshki ýaqytta kórsetiledi.