Jaınamazdy tepken jattyqtyrýshynyń jat qylyǵy Myrzahmetov myrzanyń mazasyn qashyrdy. Dúıim elge din dushpany bop kóringen ustazdy uıatty áreketi úshin keshirim suratyp, kameranyń «aldyna keltirdi». Demalysta jatqan aımaq basshysynyń den qoıǵany jaqsy árıne. Osy oqıǵa bolǵany kúni-aq, teńbil dop treneri jumystan qýyldy. Jýrnalıserge jýymaı, qasha jónelgeni daýdyń dabysyn baspaı, odan saıyn otyn údete tústi. Birinshi kúni basy bálege qalǵan bapker ózi tikeleı baǵynatyn basqarama basshysyna túsinikteme berip túsip kele jatqan. 9 qabatty basqarmanyń baspaldaǵymen bar kúshimen júgirip, jýrnalıserge jetkizbeı ketken edi. Osylaısha, aıaq dop sheberi ekenin ańǵartqan Almat myrza, óz isine ókinetinin sol kúni-aq aıtýy kerek edi. İs sozylǵan saıyn sońyn tappaı, talqylana, taldana túsetini bar. Degenmen, adam bolǵan soń abdyraıdy, pende bolǵan soń qatelesedi. 
Áleýmettik jeli degenińiz ol - qudyqqa qulaǵan qulannyń qulaǵyna qurbaqa oınatatyn búgingi orta ǵoı. Aldymen: 
-!!- Jaınamazdy tepkeni úshin jazǵyrdyq;
-!!- Balalardy balaǵattaǵany úshin bastyrmalata sóktik;
-!!- Ádepsizdigin áńgime qyldyq;
-!!- Qala berdi qashqanyn qozǵadyq;
Endi kesirlenip baryp, keshirim suraǵanyn jazyp jatyrmyz. Osylaı da osylaı... ol taqyryp shubar-ala ortada shubatyla beredi eken. 
Bul jerde balalardyń da bále bop turǵanyn aıtqym keledi. Búginginiń baldary men burynǵynyń uldaryn tarazyǵa tartyp, metrmen ólshesek te, salmaǵy men sanasyn salystyrýǵa kelmeıdi. Arydan aıtaıyn endi...

«BİZDİŃ KEZİMİZDE BASYMYZǴA TABÝRETKA JARǴAN»
Daryndy balalardy daıarlaıtyn sport mektebinde bizdiń aýyldan da bir bores bala oqyǵan edi. 
Aýyldyń alyptaryn atyp jyǵatyn. Atan túıedeı bop aýylǵa sımaǵan soń, qarqyn kórseter qarsylas tabylar dep qalaǵa jibergenbiz «ysport yshkola» degenge. 2 toqsan oqydy ma, jazdy ma)) áıteýir áreń degende aýysyp qutyldym degen. Sol mektepten, sol mekteptiń jasy úlken jigitteri men muǵalimderinen. Nege degenbiz?... Áýeli, álim jettik degen. Áriden soń ustazdar tarapynan dórekilik kórsetip, dóńaıbat tanytatyndar bar degen. Opshym ol oqý ordasyn «kishigirim armıa» dep aıtqany bar edi. Iaǵnı, «ded obshına» degenniń dáýirlep turǵan kezi ǵoı. Múmkin, mektepte sol «saıasat» saqtalyp turǵan shyǵar. Al, erteń sizdiń de altyn asyqtaı ulyńyz sondaı sport mektebine barǵysy kelýi múmkin. Kúnniń kózi beıbit túsip turǵan zamanda «kún kórsetpeıtinder» aldynan shyqpasyn deseńiz, ondaı ortany shilı qatty jaqtaı bermeńiz. Degenmen, talaı myqty túlep ushqanyn meńzep, tózimi myqtylar tórge ozǵanyn aıtsańyz ol da oryndy. Biraq, «Bizdiń kezimizde» dep bastaıtyndar bar áńgimesin. Biz qashanǵy solaı sóıleımiz. Biz qashanǵy «Bizdiń kezimizde basymyzǵa tabýretka jarǵan, tas ýatqan» dep maqtana beremiz. Nege sizdiń basyńyzdan keshkendi balańyz kórýi kerek?!.

TASYǴAN SHÁINEK TÓGİLEDİ
Eger shyn máninde shynyqqandy shymyr qylatyn mektepterde jańadan kelgenderdiń jaǵasyna jarmasa beretinder bolsa, zábir kórýshilerdiń zyǵyrdany shyǵady. Ashýmen de aıtyp, aqylmen de iske asyrýy múmkin. Toqeteri, toqyldaýy. «Shydamnyń da shegi bar» dep atylatyndar az emes. Olar osylaısha, ustazdaryn «ustap alǵanǵa» uqsaıdy. Jasyryn kameraǵa jazyp alýy balalardyń da bále ekenin kórsetedi. Olar osy áreketimen muǵalimniń mártebesine de myltyq kezep ketkeni bar. Endi ustazdar emin-erkin bola almaı, oqýshylar aldynda oty sónip júrýi kerek pe? Bundaı jaǵdaılar balany basqa shyǵaratyny bar. Onsyz da keńestik kezdegi abyroıyn ańsap júrgen aǵartý mamandarynyń armany odan saıyn oryndalmaı barady. Ras, buryn balalar bezip ketetin ustazyn kósheden kórgende. Ol jaǵyn úlkender talaı tamsana aıtqan. 

MYQTY MAMANDY JEBERİP ALDYQ
Almat Baetov degen teńbil dop treneriniń 35 jyldyq jumys tájirıbesi bar. Talaı talanttardy túletken. Bir ǵana mysaly, fýtboldan Brazılıaǵa barǵan Qazaqstandyq balalardyń beseýi osy kisiniń shákirtteri. Osyndaı ustazdy ustap qala almadyq, «ustamy joq» dep. Bala mektepte sabaq oqýy kerek, meshitte namaz oqıtyny sekildi. Sportpen aınalysatyn jerde sportpen aınalysýy tıis. Ustazdarynyń uıymdastyryp jatqan jınalysyna ádeıi barmaı, balalar arandatyp, ashýlandyrǵan kórinedi. Al, ashý ústindegi adamdy «aqylmen istep» tazǵa otyrǵyzǵan. Namazoqyǵansyp. 
Py.Sy: Qudaıdan qoryqpaǵannan qoryq! Ateıs adam bolsań da, ózgeniń senimin óksheńmen baspa. Bala mektepte sabaq oqýy kerek, meshitte namaz oqıtyny sekildi. Ashýǵa berilseń, ashýyń qaıtqanda aqylyńnyń ashynǵany ashynǵan.

Danıar Álimquldyń feısbýk paraqshasynan