Qazaq degen halyqtyń qonaqjaılylyǵyn, meıirbandyǵyn, kóńiliniń ashyqtyǵyn aıta bergiń keledi ǵoı, shirkin! Shańyraǵyna kelgen qonaǵyn qudaıyndaı syılaǵan halyq. Qashan da bar táttisin aldyna qoıyp, syı-qurmettiń eń bıigine bólegen. Al búgingi tańda qonaǵymyzǵa syı-qurmet kórsetip júrmiz be?
Ókinishke qaraı, Sovet úkimeti zamanynda ósken aǵalarymyz ben ápkelerimizdiń kóbi derlik "ózgeni syılaý" degendi "araq quıý" degen tirkespen sınonım etip alǵan. Úıine kim kelmesin, qazysynan buryn araǵy daıyn turatyn qanshama otbasyn kórdim. Álgisin shyǵarmasa, quımasa, seni adam qurly kórmeı tur degen túsinik qalyptasyp ketken ǵoı. Úıine qonaqtap barǵan týysy, dosy da sol bir ashshy sýsynnan dámetip turady eken. Sol arqyly óziniń sol otbasy úshin qanshalyqty syıly ekenin bile alady. Kez kelgen úıdiń sóresinde spırttik sýsyn bolýy tıis, áıtpese, qandaı týǵan kún, qandaı meıram, qandaı kesh? Onsyz durys qyzbaıdy ekensiń, al qyzbasań, keshtiń sáni kirmeıdi-mys.
Aınalaıyn, aǵataılarym, ápkelerim! Araqtyń densaýlyqqa zıan ekenin aıtpasam da, túsinetinderińizge shúbám joq. Bul - bir. Búgingi tańda adamnyń bári oqyǵan, saýaty bar, túsinedi. Allanyń da baryn, onyń paryzdaryn, qandaı asty halal-haram etip ara-jigin ashyp qoıǵan. Bul - eki. Sol ashshy sýsyndy iship alyp, bir-birine aıtqan tilekteri she?! "Osy aıtylǵan tilekter perishteniń, Allanyń qulaǵyna shalynsyn!" dep qoıady esterin bilmeı. Araq ishilgen shańyraqqa perishteńiz kóz qyryn da salmaıtyn shyǵar, qulaq túrmek túgili...
Qanshama azap, bále-jala sol bir araqtyń kesirinen bolyp jatty. Keı jandardyń ómirin jalmady (ózim kýá), keı otbasynyń shyrqyn buzdy, naǵyz berekesizdiktiń bastaýy da sol ashshy sýsynnan. Bir ókinishtisi, sonyń bárin olar jaqsy biledi, biraq qabyldaı almaıdy nemese moıyndaǵylary kelmeıdi...
Basqa da sebepteri bar shyǵar, kim bilsin! Ne de bolsa, es jıatyn kez-keldi. Qymyzyn iship, qoı baǵyp júrgen qazaqtyń sanasyn araqpen ýlaǵan Keńes úkimetiniń saıasatyna toqtaý salý kerek.
Kelgen qonaǵyńa araq quıyp kórge súıregenshe, qymyz usynyp tórge súıre, shapan jap, sóıtip alǵysqa bólen! Mine, naǵyz syılaǵannyń "kókesi"!
