Zeınep Ahmetovaǵa habarlasqanymyzda, shyny kerek, qatty ashýlandy. Shalbar úshin daý shyǵaryp júrgen jastarǵa nalydy.

Aqtóbelik tilshi Gúlsaıa Ybyraı shalbar kıip barǵany úshin suhbat bermeı qoıǵan Zeınep Ahmetovaǵa renishin bildirip, Facebook-tegi paraqshasynda jazba qaldyrǵan edi. Aıtýynsha, suhbat alý úshin aldymen «Óner ortalyǵyna» bettep, keıin 2 jarym saǵat kútip, taba almaı, aqyry tapqanda qýanyshy uzaqqa sozylmapty. Shalbar kıgeni úshin keshirim suraǵan jýrnalısti Zeınep Ahmetova elemepti-mys.

«...Qasyna jaqyndap, amandasyp, shalbar kıip kelgenime keshirim surap, bir aýyz pikir suradym. Maǵan jaqtyrmaǵan kúıi kóz tastady da, «shalbar kıgen jýrnalıske suhbat bermeımin» dedi. Tosylyp qaldym. Júrip ketti. Sonda kesheli beri suhbat alyp júrgen televızıonshıkter búrmeli kóılek kıip, basyna oramal taǵyp pa eken?», - dep jazdy Gúlsaıa Ybyraı.

Jeli qoldanýshylardyń arasynda Baýyrjan batyrdyń kelini Zeınep Ahmetovany jaqtaýshylar da, áreketin synaýshylar da tabyldy. Máselen, biri muny prınsıp dep túsinse, endi biri dıskrımınasıa dep túıin túıdi.

Kezinde Zeınep Ahmetovadan ózimniń de pikir alǵan sátim esime tústi. Muhtar Áýezov atyndaǵy drama teatrynda ótken bir aqynnyń 60 jyldyq mereıtoıyna barǵanmyn. Butymda shalbar... Teatrǵa shalbarmen bardy dep sóge kórmeńizder, josparlanbaǵan kesh ıakı jumystan aıaq asty jibergen bolatyn. Kesh aıaqtalǵan soń talaı aqyn-jazýshy men elimizdiń beldi tulǵalarynan bir aýyz pikir alýdy jón kórdim. Arasynda Zeınep Ahmetova da bar. «Maǵan búgingi kesh jaıly pikirińizdi aıtyńyzshy?» dep suraǵanymda keshten shabyttanyp shyqqan Zeınep hanym qýana-qýana pikir bildirdi. Bul oqıǵa esime túsken boıda munda bir gáp bar shyǵar degen oımen Zeınep Ahmetovanyń ózine habarlastym. Ol kisi oqıǵadan habardar eken, ashýǵa mindi. «Meniń aıtyp júrgen dúnıelerimdi qulaqtaryńa ilmeı, bir shalbarǵa bola sonsha daý týdyryp jatsyńdar ma?» dep qarymta suraq qoıdy. Ne degenmen jaǵdaıdy túsindirip, sol oqıǵa jóninde bir pikirin bileıin degen maqsatpen jaýabyn alýǵa tyrystym. Áńgime telefon arqyly bylaısha órbidi:

«Qyryq shaqty jýrnalıs jınalǵan kezdesýge bardym. Sol jerge kirer aldynda shalbar kıgen aıaǵy aýyr áıel keldi de suhbat berýimdi surady. Men shynymdy aıttym, onyń ústine zekip emes, kúlip aıttym: «Men shalbar kıgen qyzdarǵa suhbat bermeýshi edim. Qazir jýrnalısermen kezdesý bolady. Sonda kire ǵoı, keregińniń bárin alasyń» dedim. Al ol kirgen joq. Eger oǵan meniń suhbatym, áńgimem qajet bolsa, kirer edi. Biraq álgi jýrnalıs ol jerge tyrnaqtyń astynan kir izdep kelgen adam. Nege kirmedi kezdesýge? Keıin «maǵan zekidi» dep jazyp jiberipti. Men eshqashan zekip sóılemeımin, oıymdy ashyq aıtamyn. Shalbar kıgen qyzdarǵa da talaı aıttym: «Shalbar kıgen qyzdarmen túspeýshi edim, túseıin, biraq kelesi joly kóılegińdi kıip kel» deımin de túse beremin», - degen jazýshy ári qaraı shalbardyń zıany týraly aıtty.

«Shalbardyń qyz bala úshin qanshalyqty zıan ekenin aıtýdan jalyqpaımyn. Áıeldiń basyna, ásirese, jas qyzdardyń basyna tónip turǵan qaýip. Qazir beli, súıegi joq qyzdar kóbeıdi. Tyrystyryp shalbar kıgendikten beli men súıeginiń formasy ózgeredi. Myqyny joq adam erteń qalaı bala týady? Ondaıda balany soıyp alady. Ana men balanyń arasyndaǵy bizge kórine bermeıtin baılanys tolǵaqta jatqan shyǵar. Ájelerimiz «dúnıedegi eń qatty aýrý – tolǵaq, eń umtylatyn aýrý da – tolǵaq» dep aıtyp otyratyn. Shynynda solaı, qalaı bosanasyń, solaı umytasyń. Al temirmen kesip alynǵan jaǵdaıda qandaı kemdigi shyǵatynyn eshkim aıta almaıdy. Ana men balanyń arasyndaǵy baılanys úzile me, meıirim joıyla ma, belgisiz.

Álgi qyzdar ne qalasa, sony kısin. Maǵan kelip-keter eshteńe joq. Tek janym ashyǵandyqtan aıtamyn. Tyrysqan shalbar kıedi. Ol myqyndaǵy súıektiń formasyn ózgertedi. Áıel adamǵa san beretin quıryqtyń formasyn ózgertedi. Tyrysqan shalbardyń kesirinen ózdiginen bala týa almaı júr. Jurt muny «Zeınep apanyń minezi» dep oılaıdy. Men janym ashyǵandyqtan aıtamyn.

Aýrý balasyn alǵa tartyp, elden aıanysh kútýdiń ne qajeti bar. Maqsatym – babamnyń amanatyn erteńgi urpaqqa jetkizý. Shalbardy búgingi zamannyń kıimi dep aıtarsyzdar. Iá, men de kıemin. Alys jolǵa shyqqanda, taý jaqqa qydyrýǵa barǵanda, býyndarym bosasyn dep kelinderdiń aıtqanyna qaramaı eden jýǵanda kıemin. Ár nárseniń orny bar. Ásirese aıaǵy aýyr áıelge myqyndy qysyp kıý óte qaýipti. «Kúre tamyrdy» oqysa, ol qyz ózi de túsiner edi. Meniń kitaptarymdy oqymaǵan, oqysa da túsinbegen, túısinbegen, suhbat almaqshy. Aıta bersin...», - dep pikirin bildirdi Zeınep Ahmetova.