Iran Islam Respýblıkasy Gúlstan provınsıasynyń gýbernatory Manaf Hashemı bastaǵan ırandyq delegesıa Mańǵystaý óńirine keldi. Delegasıa quramynda memlekettik organ basshylary, týrızm, medısına, saýda-ónerkásip palatasynyń qyzmetkerleri de bar. Oblys ákimdigi baspasóz qyzmetiniń dereginshe, bıylǵy birinshi jartyjyldyqtyń qorytyndysy boıynsha Mańǵystaý oblysy men Iran arasyndaǵy jalpy taýaraınalymy 27,2 mln. AQSH dollaryn quraǵan. Onyń ishinde eksport – 4 mln. AQSH dollary, ımport – 23,2 mln.AQSH dollary.
Mańǵystaý óńiri Iranǵa 4 mln. AQSH dollar kóleminde astyq pen jarmalar, temeki buıymdary, qurylys materıaldary, bolat jáne basqa da taýarlardy eksporttaıdy. Al Irannan Mańǵystaý oblysyna: kókónister, jemis-jıdekter, aǵashtar, sporttyq qural-saımandar, jıhazdar jáne basqa da taýarlar ákelinedi. Irandyq delegasıa Aqshuqyr aýylyndaǵy balyq zaýytynda bolyp, Quryq portyn aralap, strategıalyq mańyzy zor nysannyń múmkindigimen tanysty. Quryq porty – elimiz úshin ǵana emes, kóptegen shet memleketter úshin de transkaspıı halyqaralyq dáliziniń jáne kólik-logıstıkalyq júıesiniń eń negizgi núktesi. Mańǵystaý oblysy men Gýlstan provınsıasy arasyndaǵy saýda-ekonomıkalyq baılanystardy damytý maqsatynda bıznes-forým ótti. Onda Mańǵystaý oblysynyń ákimdigi men Gúlstan provınsıasy arasynda, sondaı-aq «Atameken» Óńirlik kásipkerler palatasy men Gúlstan oblysynyń Saýda-ónerkásiptik palatasy arasynda ózara túsinistik pen yntymaqtastyq týraly eki memorandýmǵa qol qoıyldy. Óńir basshysy Eraly Toǵjanov óz sózinde:
"Elbasy N.Á.Nazarbav ekonomıkany ártaraptandyrý, shıkizattyq emes sektorǵa tikeleı ınvestısıalar tartý mindetin tikeleı júktedi. Arnaıy ekonomıkalyq aımaqtar ekonomıkany ártaraptandyrýdyń tıimdi jáne pármendi quraly bolyp tabylady. Búgingi «Aqtaý teńiz porty» arnaıy ekonomıkalyq aımaǵynda 500 mln. AQSH dollar somasynda 27 ınvestısıalyq joba iske asyrylýda. Bizdiń óńirdiń klımattyq jaǵdaıy, elektr energıasynyń qosymsha resýrsy úshin kún jáne jel elektr stansıalaryn salýǵa múmkindik beredi. Sondyqtan balamaly energıa kózderin damytý mańyzdy sektor. Agroónerkásip keshenine ınvestısıa salý úshin, atap aıtqanda jylyjaı sharýashylyqtaryn damytýda mol múmkindikter bar. Mańǵystaý óńiriniń geografıalyq jaǵynan qolaıly
ornalasýy, baı tarıhı murasy, kórikti jerleri, teńiz aıdyny, uzaq jaǵajaı maýsymy - týrısik aǵyndy molaıtyp eki el týrızminiń damýyna múmkindik mol", - dedi.
Shara barysynda birqatar kelissózder júrgizilip, egin, mal jáne qus sharýashylyǵy, tamaq ónerkásibi, ınjenerlik-tehnıkalyq qyzmetter, qurylys ónerkásibi, bıdaı, ósimdik maılaryn óndirý-satý, tehnıka, aǵash ónerkásibi, býyp-túıý ónerkásibi, ken, farmasevtıka, hımıalyq zattar, tabıǵat týrızmi men emdik týrızm salasy talqylandy.
