Kósh
«Ol eki minezi qaısy deseń, áýeli – ol zamanda el basy, top basy degen kisiler bolady eken. Kóshi-qondy bolsa, daý-janjaldy bolsa,bılik solarda bolady eken... Ekinshi minezi – namysqorlyq eken»
Abaı
Kósh bastaǵan bir ózi,
Eldiń basy, top basy,
Túzeldi me kósh ózi?
Sál aıaldap, toqtashy.
Ertip alyp baılardy,
Alǵa salǵan úıirdi,
Aıdadyń ba qoılardy,
Baıladyń ba sıyrdy?
Bos pa basy atyńnyń,
Túgel me er-turmanyń?
Órkeshine túıeniń
Artýly ma jıǵanyń?
Syrqat bar ma jol júrgen,
Dertke daýa em joq pa?
İldebaılap kún kórgen,
Jurtta qalǵan el joq pa?
Asýlardan asady
Sońǵy túıe júgi aýyr.
Ury joq pa tasada,
Ańǵarmaı ma qaraýyl?
Toı-dýmanǵa búgingi
Shashyla ma tapqanyń?
Qasqyrlarǵa jyryndy
Qurýly ma qaqpanyń?
Jetim qozy mańyrap,
Bota bozdap, zarlaı ma?
Jetilmegen qozy-laq
Quzǵynǵa jem bolmaı ma?
El arasy tynysh pa,
Bılik aıtar kúı bar ma?
Sharshaǵan daý-urysta,
Daýdy shesher bı bar ma?
Qoıan ajal tapsa da,
Meken qylǵan qamysty.
Kóp kiside joq sana,
Erler qaıda namysty?!
Baqtashynyń oıqastar
Iti qaıtyp úrmesin?!
Kósem serke qoı bastar
Jarǵa jyǵyp júrmesin.
Turatuǵyn qan oınap,
Qazaǵymnyń salty ma?
Bas aıaqty abaılap,
Qaraılaı júr artyńa.
Jırený
«Máskeýge barǵan qazaqtyń jigitteri men áıelderinen
qaı ulttan bolasyń dep surasań, qazaqpyn deýge arlanyp,
japonmyn deıdi... Bul ne?! Qazaqtan jırengendik. Aqyly
soǵan ólshengendik»
Eldes Omaruly
Mal baqqan, ǵylym baqqan, elin baqqan
İsimen adam kóp pe elge jaqqan?
Kıgenin, qydyrǵanyn, aldaǵanyn,
Jegenin otyrady etip maqtan.
Din baqqan, tilin baqqan, bala baqqan,
Kórgenmin kóp kisini qala jaqtan.
Din nashar, tili kemis, bala maqaý,
Ustazy kóp bolǵan soń elin satqan.
Synaptaı syrǵyp turǵan kúıge enedi,
Ózgeden ótirikti úırenedi.
Bolsa da túri qazaq, jurtqa mazaq,
Qazaqpyn dep aıtýǵa jırenedi.
Umytyp ult dástúrin, ata saltyn,
Saqtaýǵa peıili joq qazaq qalpyn.
Bas suǵyp jat jurttardyń noqtasyna,
Quldyqqa salmaqshy ma azat halqyn?!
Bı bılep, ánin aıtyp yńyrsyǵan,
Kóbeıdi qyz-kelinshek qylymsyǵan.
Qyzyna qyryq úıden tyıym salǵan
Babamyz qylǵan qalaı buryn shydam?!
Aqshanyń býyna eltip, bósip júrgen,
Kóbeıdi jigitter de tósin kergen.
Esi joq ataq qýyp, masaırasa,
Jan-jaqqa alaqtaıdy esi kirgen.
Táýba joq, shúkirlik joq bas amanda,
Kúnde toı, kúnde jıyn esalańǵa.
Toıdan da toımaı qaıtsa keıbireýi
Ókpe aıtar keıde tipti Jasaǵanǵa.
Oılaǵan jetem dese tilegine,
Senedi bilimi emes, bilegine.
Sezbeıdi qansha jastyń úmiti bar
Daq salyp ketetinin júregine.
Bar bolam, bastyq bolam, baı bolam dep,
Mansabyn kúni buryn saılaǵan kóp.
İlesken sol dúrmekke eldiń kóbi
Keleshek ne bolaryn oılaǵan joq.
Syr bermeı júrse-daǵy qansha júdep,
Qartaıyp, kúni jetpeı qaýsaǵan kóp.
Alaıda, kórgeni azap bizdiń qazaq
Daýryqpa, dańǵazadan sharshaǵan joq.
Aqylbek Shaıahmet
