Aqtóbelik jigit týǵan anasyn 9 jyl boıy izdegenine ókinetinin aıtty dep jazady Qamshy.kz aqparat agenttigi diapazon.kz saıtynyń deregin negizge alyp. Ol birneshe jyl boıy uıqysyz túnin, kúlkisiz kúnin ótkizdi, alaıda izdep taptym degen anasy úmitin aqtamady. Jigit tipti ókinip qaldy.
1993 jyly aqtóbelik jigitti anasy tastap ketedi. Alaıda BAQ arqyly ol anasymen qaıta qaýyshady.
"Men anam týraly málimetti "Odnaklassnıkı" áleýmettik jelisi arqyly taptym. Onyń túri maǵan uqsaıdy jáne Aqtóbede turady eken. Alǵashynda ol meniń anam ekenin moıyndamady. Biraq keıinnen ol bul aqparatty rastady", — deıdi Artýr.
Ol óz anasymen kezdesken kezde ómirin kúrt ózgertken oqıǵa týraly tolyǵyraq bildi.
"Bıologıalyq anam meni 16 jasynda dúnıege ákelgen. Ata-anasyna bul týraly aıta almaǵandyqtan, ápkesi sábıdi perzenthanaǵa tastaýdy usynǵan. Men de jas ákemin. Qalaı ǵana týǵan balasyn perzenthanaǵa op-ońaı tastap ketýge bolady? Osyny áli kúnge deıin túsinbeımin. Bir jaqsysy, osy kezde meniń qazirgi ata-anam asyrap aldy", — deıdi Artýr.
Artýr bıologıalyq anasymen qatar, onyń kúıeýimen, óziniń baýyrlarymen de tanysqan.
"Olar úlken otbasy. Menen keıin bıologıalyq anam úsh balany dúnıege ákelgen. Al ákemniń tóbelesten qaıtys bolǵanyn aıtty. Biraq ákem jatqan zıratty kórsetpedi. Bıologıalyq anamnyń meni tastap ketken soń birden úsh balany dúnıege ákelgenin estý jáne qabyldaý óte qıynǵa soqty. Men ony aqtap alýǵa tyrystym, túsingim keldi. Biraq... Ol tipti qarym-qatynasymyzdy retke keltirýge kishkentaı qadam da jasamady ǵoı", — dep qınalysyn jasyra almady Artýr.
Anasymen jolyqqannan keıin Artýr kóptegen sátsizdikke ushyraıdy. Jumysynan shyǵyp qalyp, áıelimen ajyrasty.
"Men sol kezden keıin qatty kúızeliske tústim. Ómirim astan-kesten boldy. 3-4 aıdyń ishinde jyndanyp ketýge sál-aq qaldym. Tipti kóshege shyqqym kelmeı, tórt qabyrǵada qamalyp otyrdym. Óz-ózimmen sóılestim. Neni durys jasamadym? Qaı jerden qatelik jiberdim? Osyǵan uqsas suraqtardy ózime qaıta-qaıta qoıdym. Týǵan anamnan jyly sóz estı almadym. Maǵan ol qoldaý bildirmedi. Biraq qazirgi ata-anam, aǵa jezdem únemi qasymnan tabyldy. Olar maǵan qoldaý bildirip, óz-ózime kelýime kómektesti. Olar bolmaǵanda, ne ister edim?! Bilmeımin. Qazirgi otbasym anamdy izdeýge múldem qarsylyq tanytpady, kerisinshe týǵan anammen jaqyn aralasýdy qalady. Arada kóp ýaqyt ótti. Biraq quryp ketkir, meniń ómirimdi kúrt ózgertken, meniń del-sal kúıime sebepker bolǵan týǵan anam ǵoı. Kishkentaı sábı ne úshin eresekterdiń qateligi úshin jazalanýy kerek? Olar beıkúná sábı emes pe? Men osy ómirdi, osy joldy ózim tańdap nemese surap alyppyn ba?! Kez kelgen adam óziniń týǵan anasy men ákesin izdeıtini belgili. Eger meniń ómirimde mańyzdy ózgerister oryn almaǵanda anamdy múmkin izdemeıtin de edim. Úılendim, ata-anamnan bólek shyqtym. Azdaǵan túsinispeýshilikter oryn aldy. Keıin ishki jan dúnıeme birdeńe jetispeıtinin sezdim. Alaıda qazir qatty ókinemin. Týǵan ata-anam meni tárbıelep, ósirgen jandar ekenin túsindim. Men olardyń ornyna basqa adamdardy qoıyp, solardy izdegenim úshin uıalamyn. Qazirgi ata-anamnyń aldynda uıattymyn. Qazir kezinde satqyndyq jasap, tastap ketken adamdy izdeýdiń de, keshirýdiń de qajeti joq ekenin bilem", — deıdi Artýr.
Sondaı-aq Artýr eki aqtóbelikke ata-anasyn tabýǵa kómektesken. Olardyń alǵashqy kezdesýine ózi de barǵan.
"Bir qyzdyń anasyn Orynborda ekenin anyqtadym. Anasy 15 jasynda bosanyp, sábıdi perzenthanaǵa tastap ketken. Alaıda onyń otbasy tastandy qyzdy qýana-qýana qarsy aldy. Tipti birge Aqtóbege kóshýdi josparlap otyr. Biz qazir bir-birimizben aralasyp turamyz. Men oǵan qyzyǵa da, qyzǵana da qaraımyn. Al ekinshi aqtóbeliktiń anasy ulyn kórgisi de kelmeıdi. Kezdesýden bas tartty. Ulyn tastap ketken áıeldiń jaǵdaıy jaqsy, ózi aýqatty turady. Sol sebepti týǵan ata-anasy tastap ketken jastarǵa olardy izdemeýge keńes beremin. Sebebi qatty ókinip qalýy múmkin. Mundaı jaıttar jıi bolady", — dep sózin aıaqtady Artýr.
