Reseı soty Jomart Ertaevty Qazaqstanǵa berý týraly sheshim shyǵardy dep jazady Qamshy.kz aqparat agenttigi ria.ru saıtynyń deregin negizge alyp. Ázirge sot sheshimi zańdy kúshine enbegen. Al bıznesmenniń advokattary sotqa shaǵym túsirmek. 

Búgin Máskeý qalasynda Jomart Ertaevqa qatysty sot otyrysy ótti. 

"Máskeý qalalyq soty RF Bas prokýrory orynbasarynyń 2018 jyldyń 7 jeltoqsanyndaǵy Ertaevty Qazaqstan Respýblıkasynyń quzyretti organdaryna berý týraly sheshimin negizdi ári zańdy dep tanydy", dep habarlady Máskeý qalalyq sotynyń baspasóz hatshysy Ýlána Solopova. 

Aıta ketsek, Jomart Ertaev Qazaqstanda alaıaqtyq jáne Bank RBK bankinen 80 mıllıon dollar jymqyrýǵa qatysqany úshin aıyptalǵan bolatyn. 

Ertaevtyń advokattary sottyń bul sheshimimen kelispeıdi. Olardyń qatarynda Alekseı Petrov bar. Ol bul sheshimge qatysty joǵary sot ınstansıalaryna shaǵym túsirýdi josparlap otyr. 

Eske sala ketsek, 2018 jyldyń mamyrynda Qazaqstannyń Bas prokýratýrasynyń suranysymen Jomart Ertaev "Moskva Sıtı" mańynda ustalǵan bolatyn. Alaıda Máskeý soty ony birden qamaýǵa almaı, úı qamaqqa alǵan. Alaıda birneshe aıdan keıin úı qamaq ta óz kúshin joıdy. 

Araǵa biraz ýaqyt salǵan soń Jomart Ertaev Reseıden bosqyn mártebesin suraıdy.  Sosyn Qazaqstan azamattyǵynan bas tartý jóninde málimdeme jasady. 

Osyndaı jaıttardan keıin de Qazaqstan Bas prokýratýrasy Ertaevty 2017 jyly alǵan Reseıde turýǵa yqtıarhatynan aıyrýǵa qol jetkizdi. 

Al Jomart Ertaev bolsae óz kezeginde Qazaqstan bılik ókilderiniń qýǵyndaýyna ushyraǵanyn, sondaı-aq munyń básekelesteriniń múddesi úshin jasalǵan saıası sıpatqa ıe ekenin aıtyp, túrli málimdeme jasady. 

Eske salsaq, Qazaqstanda Jomart Ertaevqa 2018 jyldyń naýryz aıynda alaıaqtyq jasady degen aıyp taǵyldy. Ol kezge deıin elden ketip qalǵan kásipkerge halyqaralyq izdeý jarıalanǵan bolatyn. QR QK 177-baby 4-tarmaǵy boıynsha, Bank RBK bankinen 80 mıllıon jymqyrýǵa qatysqany úshin ol 10 jylǵa deıin bas bostandyǵynan aıyrylýy múmkin.