Qazaq ádebıeti aýyr qazaǵa dýshar boldy. Búgin Qazaqstan jazýshylar odaǵy basqarmasynyń múshesi. Halyqaralyq «Alash» ádebı syılyǵynyń laýreaty, «Eren eńbegi úshin», «Táýelsizdiktiń 10 jyly» medaldarynyń ıegeri Orazaqyn Asqar ómirden ozdy. 

1961-95 jyldary QR ǴA Tarıh, etnografıalyq jáne ar­heologıalyq ınstıtýtynda, Qazaqstan jazýshylar odaǵynda, respýblıkalyq Memlekettik kitap palatasynda, "Jalyn" baspasynda ár túrli jaýapty qyzmet atqardy. "Túńǵysh"(1964), "Meıirim" (1969), "Kúngeı" (1975), "Láıla" (1977), "Kókoraı" (1979), "Balqaraǵaı" (1981), "Sáýlet" (1984), "Taýdaıbol!" (1984), "Beljaılaý" (1985), "Órkesh" (1987), "Kerimsal" (1991), "Barkórneý" (1992), "Orbulaq" (2000), "Táýelsizdik tartýlary" (2001) atty jınaqtary jaryk kórdi. Asqar qazaqtyń qara óleń túrlerin uzaq jyldar boıy el ishinen jınap, jıyrma myń joldyq "Qara óleń" atty eki kitabyn jarıalady.

Shette júrgen baýyrlastarǵa

Shetelge ketseńder de baýyr basyp,
Qutty oryn tepsender de aýyrlasyp,
Atajurt shaqyrady tuqymym dep,
Qushaǵyn baıtaq dala, taýyń da ashyp.

Bólenip onda báriń baılyq, baqqa,
Tipti ıe bolsańdar da ataq, dańqqa,
Birge urpaq barsyn jarqyn bolashaqqa,
Buryńdar kóshti atameken jaqqa.

Qazaǵyń jetti ejelgi armanyna,
Jaǵdaıdyń qaramańdar bar, joǵyna,
İlinbeý úshin eldik birlik kerek
Eshqashan endi eshkimniń qarmaǵyna.

Ýaqytsha kórsender de qıynshylyq,
Myń artyq kún keshýden qorqyp-buǵyp,
Qoja bop óz jerińde óz elińe
Ne jetsin ter tógýge sony uǵyp.

Astynda óz aspanyń, óz týyńnyń,
Óz aýa, nárin jutyp óz sýyńnyń,
Qandastar qapy qalma, orny bólek
Kúnde óz ánuranyńmen oıanýdyń.

Mánge ıe sátteriń kóp elde ótetin,
Ozbyr joq sybaǵańnan kende etetin.
Bárimiz uıymdasyp kórkeıteıik
Qazaqtyń beıbit, derbes memleketin.

Úıren ana tilińdi!

Óz tilińsiz kórseń de óz kúnińdi,
Óz tilińsiz bolsań da asqan bilimdi.
Óz halqyńa bola almaısyń azamat,
Bilmeı turyp týǵan ana tilińdi.

Álde qalaı joǵaltsa ana balasyn,
Bala izdep tappaı ma óz anasyn.
Ógeı sheshe sekildi ózge til de ógeı,
Óz tilińmen erterek tap jarasym.

Sende aıyp joq, tiliń de emes kináli,
Eshkimniń joq bolsa da oǵan kúmáni.
Úırenbeseń, óz tilińdi bilmeseń.
Jazyqsyz-aq jazǵyryp el turady.

Qanyń janyń, qazaqy ulttyq túriń bar,
Senen úlgi alar qyzyń, ulyń bar.
Perzentisiń erkin, azat halyqtyń,
Táýelsiz el, mártebeli tiliń bar.

Ekeýińe 

Qıyn da emes, ońaı da emes úı bolý,
Oı bólý úıge, qamqorlyq jasap úırený,
Kóńilin tabý, qabaǵyn baǵý jaryńnyń,
Ekeý bop ómir súrýdiń jolyn ıgerý.

Bolady onda ishki de syrtqy – saıasat,
Aıaıyq jardy bireýdi eger aıasaq.
Jaqsy úıde bolmaq áskerı qatań qupıa,
Júrmeńder áste ishkini syrtqa jaıa sap.
Qashanda jarǵa keregi jyly nazaryń,
Jalǵyzsyratpa, tartqyzba kútý azabyn.
Men súıtip edim, sen nege búıtpeı júrsiń – dep
Saýdanyń úıge ornatpaý kerek bazaryn.

Asyǵystyqtan, ashýdan abzal bezingen,
Dos bolý kerek qashanda sabyr tózimmen.
Jar degen óziń, ózim dep tapqan jalǵyzdyń,
Keshirimdi bol, kelispeı júrme ózińnen.

Kıeli zat joq – jaryńnyń mahabbatynan,
Ekeýińdi de aıalaýǵa ony shaqyram.
Kósegeleriń kógersin! - bergen aq batam,
Beremin barlyq úlken úılerdiń atynan.

Ulym jatyr uıyqtap

Batyryndaı baıaǵy erteginiń,
Jatýyndy-aı uıyqtap,tentek ulym.
Sarbazdaraı saqtyqty serik etken,
Qysyp ustap sabynan semseriniń.

Synyp myltyq,
Maıysyp qylysh jatyr,
Turmastaı bop qulapty qrysty pil.
Arystan da aıyrylyp aıbatynan.

Úrkip baryp,
Buǵyp bir buryshta tur.
Mashınalar jurdaı bop dóńgelekten,
Syry kóship, ózinen óń de ketken.
Shashylǵan zat,aınala ańǵartady,
Kishigirim shaıqasty bólmede ótken.
Tóńkerilip bir shette jatyr tanki,
Aıýdyńda kókke ushqan ataq-dańqy.
Shaqyram dep tártipke tıtyqtaǵan
Shesheńniń de basy áne áńki-táńki.

Jaıly tósek izdemeı, jasyrynbaı,
Alańynda oıynnyń jatýyńdy-aı.
Demin alǵan jeńistiń maıdanynda
Erteginiń baıyrǵy batyryndaı!

Usynǵan: Ásel Bolatqyzy