Jastar jyly jarıalandy. Baıqaımyn, bıyl jas bolǵysy kelip júrgender kóp. "Kim biledi, naýqanshyldyqpen áldeqandaı bir járdemge ne qyzmetke, tym bolmaǵanda, marapatqa ıe bolyp qalam ba?" degen «mysyq dáme» shyǵar. Bir tanysym «jas dep kimdi aıtamyz?» dep qaldy. Endi bireýi «jasym 42-de, áli jas shyǵarmyn» dep qýaqylana kózin qysty. Maǵan salsa, qylshyldyǵan 40-qa deıingilerdiń bárin de jas der edim. Biraq, olaı emes qoı. Zańǵa júgineıik. Qazaqstan Respýblıkasynyń Prezıdenti 2015 jylǵy 9 aqpanda bekitken «Memlekettik jastar saıasaty týraly» zańynyń 1-baby 3-tarmaǵynda «jastar – Qazaqstan Respýblıkasynyń 14 jastan 29 jasqa deıingi azamattary» dep taıǵa tańba basqandaı jazylǵan. Osy Zańda «erli-zaıyptylardyń ekeýi de 29 jasqa tolmasa» jas otbasy, «29 jasqa tolmaǵan, tehnıkalyq jáne kásiptik, orta bilimnen keıingi, joǵary jáne joǵary oqý ornynan keıingi bilim berý uıymdarynda bilim beretin oqý baǵdarlamalaryn meńgergen jáne bilim týraly qujatta kórsetilgen mamandyq boıynsha úsh jyldan aspaıtyn ýaqyt jumys istep júrgen Qazaqstan Respýblıkasynyń azamatyn» jas maman dep túsindirilgen. Endeshe, «jas» dep 14-29 jas aralyǵyndaǵy ini-qaryndastarymyzdy aıtady ekenbiz. Keıbir derekterge súıensek, mundaı jastar jalpy halyqtyń 30 paıyzyn quraıtyn syńaıly. Keshegi, álimjettikke ǵana óresi jetip, óz qurdasyna judyryq ala júgirgen mektep oqýshylary da biz jas dep qabyldap otyrǵan – 13-14 jastaǵy jasóspirimder! Ókinishti...

Máselen, egıpettik Mozaııa Brıjes 13 jasynda-aq kóbelek-galstýk bıznesin jolǵa qoıyp, qarjy aınalymyn 200 myń dollarǵa (55 mln 600 myń tg) jetkizgen. Sol sıaqty ıspandyq Asıma Sırası 14 jasynda Ispanıadaǵy tik jartasty Open Your Mind shyńyn baǵyndyrǵan. Al amerıkalyq 14 jasar Ahmed Mohamedti uıqyashar saǵat oılap tapqany úshin Baraka Obamanyń ózi jeke qabyldaýyna shaqyrǵan. Djeıden Smıt 17 jasynda Djekı Chanmen birge «Karate-pasan» fılmine túsip, somdaǵan róli úshin 5 mln dollar qalamaqy alsa, qazir onyń jeke esepshotynda 14 mln kók qaǵaz jatyr. Qazaqty álemge tanytqan Dımash Qudaıbergen «Slaván bazarynda» Gran-prıdi utyp alǵan kezde nebári 21 jasta bolatyn. Bekzat 20 jasynda-aq Olımpıada chempıony atandy. Jastardyń ynta-jigerine, qabiletine qatysty aıta bersek, mundaı mysaldar kóp.

Qane, 14 jas pen 29 jas aralyǵyndaǵy zamandastarym, biz bıikterdi baǵyndyrýǵa, jańalyq ashýǵa, elimizdi órkendetýge, qurby-dostarymyzdy mańyzdy isterge jumyldyrýǵa daıynbyz ba!? Joq, álde, úlkender jaǵy ázirlep bergen naýqanshyl sharalardan asa almaı, jaltaqtyqpen jyl ótkizemiz be?

Bekjigit Serdáli, Facebook paraqshasynan